Mohamed Salah : ലിവര്പൂളില് പുതിയ ഉയരങ്ങളില് മുഹമ്മദ് സലാ; മുന്നില് ഒരേയൊരു ഇതിഹാസം
Synopsis
സലാ തിളങ്ങിയപ്പോള് ഇംഗ്ലീഷ് പ്രീമിയര് ലീഗ് ഫുട്ബോളില് ബ്രൈറ്റണിനെതിരെ ലിവര്പൂള് ജയം സ്വന്തമാക്കി
ബ്രൈറ്റണ്: ഇംഗ്ലീഷ് ക്ലബ് ലിവര്പൂളിലെ (Liverpool FC) ഗോള്നേട്ടത്തിൽ പുതിയ ഉയരങ്ങളിലേക്ക് മോ സലാ (Mohamed Salah). ക്ലബിനായി ഏറ്റവും കൂടുതൽ ഗോളുകളില് പങ്കാളിയാകുന്ന രണ്ടാമത്തെ താരമെന്ന നേട്ടത്തില് സലാ എത്തി. ബ്രൈറ്റണിനെതിരായ (Brighton) മത്സരത്തിലാണ് സലായുടെ നേട്ടം. ലിവര്പൂളിലെ 171 കളിയിൽ 158 ഗോളുകളിലാണ് സലാ പങ്കാളിയായത്. 115 ഗോള് നേടിയ സലായുടെ പേരില് 43 അസിസ്റ്റ് ഉണ്ട്.
212 ഗോളുകളില് പങ്കാളിയായ ഇതിഹാസ താരം സ്റ്റീവന് ജെറാര്ഡിന്റെ പേരിലാണ് ക്ലബ് റെക്കോര്ഡ്. 120 ഗോള് നേടിയ ജെറാര്ഡ് 92 ഗോളിന് വഴിയൊരുക്കി. 504 മത്സരങ്ങളിലാണ് ജെറാര്ഡിന്റെ ഗോള് നേട്ടം. ലിവര്പൂലിലെ അഞ്ച് സീസണിൽ നാലാം തവണയാണ് സലാ 20 ഗോളുകള് തികയ്ക്കുന്നത്. 2017ലാണ് ഈജിപ്ഷ്യന് താരം ലിവര്പൂളിൽ ചേര്ന്നത്.
സലാ തിളങ്ങിയപ്പോള് ഇംഗ്ലീഷ് പ്രീമിയര് ലീഗ് ഫുട്ബോളില് ബ്രൈറ്റണിനെതിരെ ലിവര്പൂള് ജയം സ്വന്തമാക്കി. ബ്രൈറ്റണിനെ മറുപടിയില്ലാത്ത രണ്ട് ഗോളിന് ലിവര്പൂള് തോൽപ്പിക്കുകയായിരുന്നു. 19-ാം മിനിറ്റില് ലൂയിസ് ഡയസ് ആദ്യ ഗോള് നേടി. 61-ാം മിനിറ്റില് പെനാല്റ്റിയിലൂടെ സൂപ്പര്താരം മുഹമ്മദ് സലാ ഗോള്പ്പട്ടിക തികച്ചു. പ്രീമിയര് ലീഗില് മാഞ്ചസ്റ്റര് യുണൈറ്റഡിന് ശേഷം 2000 ഗോള് തികയ്ക്കുന്ന ക്ലബാകാനും ലിവര്പൂളിന് കഴിഞ്ഞു. യുണൈറ്റഡിന് 2172 ഉം ലിവര്പൂളിന് 2000 ഉം ഗോളുകളാണുള്ളത്.
ജയത്തോടെ മാഞ്ചസ്റ്റര് സിറ്റിയുമായുള്ള പോയിന്റ് വ്യത്യാസം മൂന്നാക്കി ചുരുക്കാന് ലിവര്പൂളിനായി. 28 കളിയിൽ സിറ്റിക്ക് 69 ഉം ലിവര്പൂളിന് 66 ഉം പോയിന്റുണ്ട്. സീസണിൽ 10 കളി ആണ് ബാക്കിയുള്ളത്. അതേസമയം മത്സരത്തിനിടെ സലായ്ക്ക് പരിക്കേറ്റത് ലിവര്പൂളിന് ആശങ്കയാണ്.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!