ISL 2021-22 : ക്രഡിറ്റ് ആശാന്, വുകോമനോവിച്ചിന് കീഴിൽ ഗോൾ സ്കോറിംഗ് മെച്ചപ്പെട്ടു: സഹൽ അബ്‌ദുൽ സമദ്

ISL 2021-22 : 2016ന് ശേഷം ആദ്യമായി അവസാന നാലിലെത്തിയ കേരള ബ്ലാസ്റ്റേഴ്‌സിന് ഇന്ന് എഫ്‌സി ഗോവയ്‌ക്കെതിരെ സമ്മര്‍ദമൊന്നുമില്ലാതെ കളിക്കാം

പനാജി: ഐഎസ്എല്ലില്‍ (ISL 2021-22) പരിശീലകന്‍ ഇവാൻ വുകോമനോവിച്ചിന് (Ivan Vukomanovic) കീഴിൽ ഗോൾ സ്കോറിംഗ് മെച്ചപ്പെട്ടുവെന്ന് കേരള ബ്ലാസ്റ്റേഴ്‌സിന്‍റെ (KBFC) മലയാളിതാരം സഹൽ അബ്‌ദുൽ സമദ് (Sahal Abdul Samad). പ്ലേയിംഗ് ഇലവനിൽ ഇടംപിടിക്കാനായി താരങ്ങൾ തമ്മിലുള്ള മത്സരം ടീമിന് ഗുണം ചെയ്യുമെന്നും സഹൽ പറഞ്ഞു. ഐഎസ്എല്‍ സീസണില്‍ ടീമിന്‍റെ അവസാന ഗ്രൂപ്പ് മത്സരത്തില്‍ എഫ്‌സി ഗോവയെ ബ്ലാസ്റ്റേഴ്‌സ് (FC Goa vs Kerala Blasters) ഇന്ന് നേരിടാനിരിക്കേയാണ് സഹലിന്‍റെ പ്രതികരണം. 

2016ന് ശേഷം ആദ്യമായി അവസാന നാലിലെത്തിയ കേരള ബ്ലാസ്റ്റേഴ്‌സിന് ഇന്ന് എഫ്‌സി ഗോവയ്‌ക്കെതിരെ സമ്മര്‍ദമൊന്നുമില്ലാതെ കളിക്കാം. അവസാന മത്സരത്തിലെ ജയപരാജയം ബ്ലാസ്റ്റേഴ്‌സിനെ ബാധിക്കില്ല. 33 പോയിന്‍റുമായി ബ്ലാസ്റ്റേഴ്‌സ് നാലാം സ്ഥാനക്കാരായി ഇന്നലെ സെമിയിലെത്തിയിരുന്നു. നിര്‍ണായക മത്സരത്തില്‍ ഹൈദരാബാദ് എഫ്‌സി ഒന്നിനെതിരെ രണ്ട് ഗോളിന് മുംബൈ സിറ്റി എഫ്‌സിയെ തകര്‍ത്തതോടെയാണിത്. 

ഐഎസ്എല്ലില്‍ 40 പോയിന്‍റുമായി ജംഷ്‌ഡ്‌പൂര്‍ എഫ്‌സിയാണ് തലപ്പത്ത്. ഹൈദരാബാദ് എഫ്‌സി 38 പോയിന്‍റുമായി രണ്ടാമതും 37 പോയിന്‍റുമായി എടികെ മോഹന്‍ ബഗാന്‍ മൂന്നാമതും 33 പോയിന്‍റുമായി ബ്ലാസ്റ്റേഴ്‌സ് നാലാമതും നില്‍ക്കുന്നു. നാല് ടീമുകളും സെമിയിലെത്തി. അതേസമയം തിങ്കളാഴ്‌ച നടക്കുന്ന എടികെ മോഹന്‍ ബഗാന്‍-ജംഷഡ്‌പൂര്‍ എഫ്‌സി അവസാന പോരാട്ടം ഗ്രൂപ്പ് ചാമ്പ്യന്‍മാരെ തീരുമാനിക്കും.

ജയം വിട്ടൊരു പരിപാടിയില്ല: വുകോമനോവിച്ച്

ഗോവയ്‌ക്കെതിരെ ജയം മാത്രം ലക്ഷ്യമിട്ടാവും കേരള ബ്ലാസ്റ്റേഴ്‌സ് ഇറങ്ങുകയെന്ന് കോച്ച് ഇവാന്‍ വുകോമനോവിച്ച് വ്യക്തമാക്കി. പരിക്കേറ്റ താരങ്ങളുടെ അഭാവം മറികടക്കാന്‍ ബ്ലാസ്റ്റേഴ്‌സിന് കഴിയുമെന്നും വുകോമനോവിച്ച് പറഞ്ഞു. ഗോവയ്‌ക്കെതിരെ ഇറങ്ങുമ്പോള്‍ അല്‍വാരോ വാസ്‌ക്വേസ്, ഹോര്‍ജെ പേരരെ ഡിയാസ്, പ്യൂട്ടിയ എന്നിവര്‍ സസ്‌പെന്‍ഷന്‍റെ വക്കിലാണ്. ഒരിക്കല്‍ക്കൂടി മഞ്ഞക്കാര്‍ഡ് കണ്ടാല്‍ ഇവര്‍ക്ക് അടുത്ത മത്സരം നഷ്‌ടമാവും. ഇതൊക്കെ കളിയുടെ ഭാഗം മാത്രമാണെന്നാണ് ഇവാന്‍ വുകോമനോവിച്ച് കരുതുന്നത്.