ISL Final : മഞ്ഞയണിഞ്ഞ് മമ്മൂട്ടിയും മോഹൻലാലും; ആഹ്ളാദവും നന്ദിയുമറിയിച്ച് കേരള ബ്ലാസ്റ്റേഴ്സ്
Synopsis
ഇന്ന് രാത്രി 7.30ന് ഗോവയിലെ ഫറ്റോര്ഡ സ്റ്റേഡിയത്തിലാണ് ഹൈദരാബാദ് എഫ്സി-കേരള ബ്ലാസ്റ്റേഴ്സ് ഫൈനല്
മഡ്ഗാവ്: ഐഎസ്എല്ലില് (ISL 2021-22) കിരീടപ്പോരാട്ടത്തിന് ആശംസകളറിയിച്ച ചലച്ചിത്രതാരങ്ങളായ മമ്മൂട്ടിക്കും (Mammootty) മോഹന്ലാലിനും (Mohanlal) നന്ദി പറഞ്ഞ് കേരള ബ്ലാസ്റ്റേഴ്സ് (Kerala Blasters). 'താങ്ക്യൂ മമ്മൂക്കാ, ലാലേട്ടാ' എന്നാണ് ബ്ലാസ്റ്റേഴ്സിന്റെ ട്വീറ്റുകള്.
'കാൽപ്പന്തിന്റെ ഇന്ത്യൻ നാട്ടങ്കത്തിൽ കേരള ദേശം പോരിനിറങ്ങുമ്പോൾ ലോകമെങ്ങുമുള്ള മലയാളികളെപ്പോലെ ഞാനും ഒപ്പമുണ്ട്. ഇന്നത്തെ രാവ് നമുക്ക് ആഹ്ളാദത്തിന്റേതാകട്ടെ...പതിനൊന്ന് ചുണക്കുട്ടികളുടെ പടയോട്ടത്തിനായി കാത്തിരിക്കുന്നു...കേരള ബ്ലാസ്റ്റേഴ്സ് ടീമിന് വിജയാശംസകൾ' എന്നും ബ്ലാസ്റ്റേഴ്സ് ടീം അംഗങ്ങളുടെ ചിത്രത്തിനൊപ്പം മമ്മൂട്ടി സോഷ്യല് മീഡിയയില് കുറിച്ചിരുന്നു. 'മഞ്ഞപ്പടയുടെ വിജയത്തിനായി, ജനകോടികൾക്കൊപ്പം, പ്രാർത്ഥനയോടെ' താനും ഉണ്ടാകുമെന്ന് മോഹൻലാൽ ഫേസ്ബുക്കിൽ കുറിച്ചു.
ഇന്ന് രാത്രി 7.30ന് ഗോവയിലെ ഫറ്റോര്ഡ സ്റ്റേഡിയത്തിലാണ് ഹൈദരാബാദ് എഫ്സി-കേരള ബ്ലാസ്റ്റേഴ്സ് ഫൈനല്. മത്സരത്തിന് മുമ്പ് പരിക്ക് ബ്ലാസ്റ്റേഴ്സ് ആരാധകരെ ആശങ്കപ്പെടുത്തുന്നുണ്ട്. നിര്ണായക സമയത്ത് രണ്ട് സൂപ്പര് താരങ്ങള് പരിക്കിന്റെ പിടിയിലാണ്. ബ്ലാസ്റ്റേഴ്സിന്റെ മുന്നോട്ടുള്ള കുതിപ്പില് മുഖ്യപങ്കുവഹിച്ച അഡ്രിയാന് ലൂണയും സഹല് അബ്ദുല് സമദും. ഇരുവരും കളിക്കുമോ എന്നുള്ള കാര്യത്തില് വ്യക്തത വന്നിട്ടില്ല. സഹല് ഫിറ്റാണെന്നും ഇന്നലെ പരിശീലനം ആരംഭിച്ചെന്നുമാണ് പരിശീലകന് പറഞ്ഞത്. ലൂണ മെഡിക്കല് സംഘത്തോടൊപ്പം തുടരുകയാണെന്നും വാര്ത്തകള് പുറത്തുവന്നു.
സെമിയില് ലീഗ് വിന്നേഴ്സ് ഷീല്ഡ് നേടിയ ജംഷഡ്പൂര് എഫ്സിയെ ഇരുപാദങ്ങളിലുമായി 2-1ന് തോല്പ്പിച്ചാണ് കേരള ബ്ലാസ്റ്റേഴ്സ് ഫൈനലിലെത്തിയത്. ഹൈദരാബാദ് എഫ്സിയാകട്ടെ കഴിഞ്ഞ സീസണിലെ റണ്ണറപ്പുകളായ എടികെ മോഹന് ബഗാനെ 3-2ന് തോല്പ്പിച്ച് ഫൈനലിലെത്തി. ലീഗ് ഘട്ടത്തില് ഏറ്റുമുട്ടിയപ്പോള് ബ്ലാസ്റ്റേഴ്സും ഹൈദരാബാദും ഓരോ കളിയില് ജയിച്ചു. ഐഎസ്എല് ഫൈനലില് കേരള ബ്ലാസ്റ്റേഴ്സിന് മഞ്ഞ ജേഴ്സി ഇടാനാവില്ല. ലീഗ് ഘട്ടത്തില് കൂടുതല് പോയിന്റ് നേടിയതിനാല് ഹൈദരാബാദിന് ഹോം ജേഴ്സിയായ മഞ്ഞ കുപ്പായം ധരിക്കാം.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!