നെയ്‌മറിനും എംബാപ്പെയ്‌ക്കും ഹാട്രിക്, ട്രിപ്പിള്‍ അസിസ്റ്റുമായി മെസി! ആറാടി പിഎസ്‌ജി; ലാലിഗയില്‍ റയലിന് ജയം

സ്‌പാനിഷ് ലീഗിൽ ഗെറ്റാഫയെ റയൽ മാഡ്രിഡ് എതിരില്ലാത്ത രണ്ട് ഗോളിന് തോൽപ്പിച്ചു

പാരിസ്: സൂപ്പർ താരങ്ങളായ നെയ്‌മറിന്‍റെയും (Neymar) കിലിയൻ എംബാപ്പെയുടേയും (Kylian Mbappe) ഹാട്രിക് മികവിൽ ഫ്രഞ്ച് ലീഗ് വണ്ണിൽ (Ligue 1) പിഎസ്‌ജിക്ക് (PSG) തകർപ്പൻ ജയം. ക്ലെർമോണ്ടിനെ (Clemont Foot) ഒന്നിനെതിരെ ആറ് ഗോളിന് പിഎസ്‌ജി (PSG) തകർത്തു. ഹാട്രിക് അസിസ്റ്റുമായി ലിയോണല്‍ മെസിയും (Lionel Messi) താരമായി. 71 പോയിന്‍റുമായി പട്ടികയിൽ തലപ്പത്ത് തുടരുകയാണ് പിഎസ്‌ജി. പതിനേഴാംസ്ഥാനത്താണ് ക്ലെർമോണ്ട്

സ്‌പാനിഷ് ലീഗിൽ ഗെറ്റാഫയെ റയൽ മാഡ്രിഡ് എതിരില്ലാത്ത രണ്ട് ഗോളിന് തോൽപ്പിച്ചു. കാസെമിറോ, ലൂക്കാസ് വാസ്ക്വസ് എന്നിവരാണ് സ്കോറർമാർ. കാസെമിറോ 38-ാം മിനുറ്റിലും വാസ്‌ക്വസ് 68-ാം മിനുറ്റിലുമാണ് വല ചലിപ്പിച്ചത്. 72 പോയിന്‍റുമായി പോയിന്‍റ് പട്ടികയിൽ മുന്നിലാണ് റയൽ. രണ്ടാംസ്ഥാനത്തുള്ള സെവിയ്യയേക്കാള്‍ 12 പോയിന്‍റിന്‍റെ ലീഡുണ്ട് റയലിന്. 

ജർമൻ ലീഗ് ഫുട്ബോളിൽ ബയേൺ മ്യൂണിക്കിന്‍റെ ജൈത്രയാത്ര തുടരുന്നു. ബയേൺ ഏകപക്ഷീയമായ ഒരു ഗോളിന് ഓഗ്സ്ബർഗിനെ തോൽപിച്ചു. എൺപത്തിരണ്ടാം മിനിറ്റിൽ സൂപ്പർതാരം റോബർട്ട് ലെവൻഡോവ്സ്‌കിയാണ് നിർണായക ഗോൾ നേടിയത്. 29 കളിയിൽ 69 പോയിന്‍റുമായാണ് ബയേൺ ലീഗിൽ ഒന്നാംസ്ഥാനത്ത് തുടരുന്നത്.