ചാമ്പ്യന്സ് ലീഗില് മാഞ്ചസ്റ്റര് യുണൈറ്റഡ് ഇന്നിറങ്ങും; ബയേണ് മ്യൂണിക്കിനും ഇന്ന് ആദ്യ മത്സരം
Synopsis
ചാമ്പ്യൻസ് ലീഗിൽ ഇന്ന് മാഞ്ചസ്റ്റർ യുണൈറ്റഡും ബയേൺ മ്യൂണിക്കും തങ്ങളുടെ ആദ്യ മത്സരങ്ങൾക്കിറങ്ങുന്നു. യുണൈറ്റഡ് സബായെയും ബയേൺ ബോഡോയെയും നേരിടും. കഴിഞ്ഞ മത്സരങ്ങളിൽ ബാഴ്സലോണ, പിഎസ്ജി, ലിവർപൂൾ എന്നിവർ വിജയം നേടിയിരുന്നു.
സൂറിച്ച്: ചാമ്പ്യന്സ് ലീഗില് ഇന്നും പ്രധാന ടീമുകള്ക്ക് മത്സരമുണ്ട്. ബയേണ് മ്യൂണിക്കും മാഞ്ചസ്റ്റര് യുണൈറ്റഡും ഇന്ന് ആദ്യ മത്സരത്തിന് ഇറങ്ങും. ജര്മന് ചാമ്പ്യന്മാരായ ബയേണ് മ്യൂണിക്കിന്റെ ആദ്യ എതിരാളികള് നോര്വേ ക്ലബ് ബോഡോ. സ്വന്തം കാണികള്ക്ക് മുന്നില് ഇറങ്ങുന്ന ബയേണിനെ പിടിച്ചുകെട്ടുക ബോഡോയ്ക്ക് ഒട്ടും എളുപ്പമാവില്ല. ഹാരി കെയ്ന്, ജമാല് മുസ്യാല, മികേല് ഒലിസെ, ലൂയിസ് ഡിയാസ്, ജോഷ്വ കിമ്മിച്ച് തുടങ്ങിയവര് അണിനിരക്കുന്ന ബയേണ് കളിയുടെ സര്വമേഖലയിലും ആധിപത്യം സ്ഥാപിക്കാന് ശേഷിയുളളവര്.
ഹാരി കെയന്റെ സ്കോറിംഗ് മികവിനെയാവും ബോഡോ ഏറെ ഭയപ്പെടേണ്ടിവരുക. പെനാല്റ്റി ഏരിയയില് അര്ധാവസരം പോലും ഗോളാക്കിമാറ്റുന്ന ഹാരി കെയ്ന് സീസണിലെ നാല് കളിയില് രണ്ട് ഗോള്നേടിക്കഴിഞ്ഞു. 2023ന് ശേഷം ആദ്യമായി ചാമ്പ്യന്സ് ലീഗിലേക്ക് തിരിച്ചെത്തുന്ന മാഞ്ചസ്റ്റര് യുണൈറ്റഡിന്റെ എതിരാളികള് ലീഗിലെ അരങ്ങേറ്റക്കാരായ അസര്ബൈജാന് ക്ലബ് സബാ. യുണൈറ്റഡിന്റെ ഹോംഗ്രൗണ്ടായ ഓള്ഡ് ട്രാഫോര്ഡിലാണ് മത്സരം.
ക്യാപ്റ്റന് ബ്രൂണോ ഫെര്ണാണ്ടസ്, ബ്രയാന് എംബ്യൂമോ, ബെഞ്ചമിന് സെസ്കോ എന്നിവരുടെ പ്രകടനം മൈക്കല് കാരിക്ക് പരിശീലിപ്പിക്കുന്ന യുണൈറ്റഡിന് നിര്ണായകം. രണ്ട് കളിയും തുടങ്ങുക രാത്രി പന്ത്രണ്ടരയ്ക്ക്. മറ്റ് പ്രധാന മത്സരങ്ങളില് ഇറ്റാലിയന് ക്ലബ് റോമ, ഫെനര്ബാഷിനെയും പി എസ് വി ഐന്തോവന്, ഷക്താര് ഡോണിയസ്കിനെയും നേരിടും.
ബാഴ്സലോണയ്ക്ക് ജയം
ബാഴ്സലോണയ്ക്ക് തകര്പ്പന് തുടക്കം. ബാഴ്സലോണ ആദ്യ മത്സരത്തില് ഒന്നിനെതിരെ അഞ്ച് ഗോളിന് ഫെയനൂര്ദിനെ തകര്ത്തു. റഫീഞ്ഞയുടെ ഇരട്ടഗോള് മികവിലാണ് ബാഴ്സയുടെ ജയം. 3, 57 മിനിറ്റുകളിലായിരുന്നു റഫീഞ്ഞയുടെ ഗോളുകള്. ഇതോടെ സീസണിലെ അഞ്ച് കളിയില് റഫീഞ്ഞയ്ക്ക് ഏഴ് ഗോളായി. കരീം അഡെയേമി, യുവതാരം ലമീന് യമാല്, ഈ സീസണില് ടീമിലെത്തിയ ഗബ്രിയേല് ജെസ്യൂസ് എന്നിവരാണ് ബാഴ്സയുടെ ഗോളുകള് നേടിയത്. കളി തീരുന്നതിന് തൊട്ടുമുന്നേ ആയിരുന്നു ഫെയനൂര്ദിന്റെ ഗോള്.
നിലവിലെ ചാമ്പ്യന്മാരായ പിഎസ്ജിക്കും വിജയത്തുടക്കം. സീസണിലെ ആദ്യ മത്സരത്തില് സ്ലോവന് ബ്രാറ്റിസ്ലാവയെ ഒന്നിനെതിരെ ആറ് ഗോളുകള്ക്കാണ് പിഎസ് ജി തോല്പ്പിച്ചത്. പിഎസ്ജിക്കായി ഫെറാന് ടോറസ് ഹാട്രിക് നേടി. ഒസ്മാന് ഡെംബലെ രണ്ടും, ഫാബിയന് റൂയിസ് ഒരു ഗോളും നേടി. മറ്റൊരു മത്സരത്തില്, ലിവര്പൂള് സ്പാനിഷ് കരുത്തരായ അത്ലറ്റിക്കോ മാഡ്രിഡിനെ പരാജയപ്പെടുത്തി. ഒന്നിനെതിരെ രണ്ട് ഗോളുകള്ക്കായിരുന്നു ലിവര്പൂളിന്റെ ജയം. പതിനേഴാം മിനിട്ടില് അത്ലറ്റിക്കോ മാഡ്രിഡ് മുന്നിലെത്തിയെങ്കിലും ഡൊമിനിക് സൊബോസ്ലായ് ആദ്യ പകുതിയില് തന്നെ ലിവര്പൂളിനെ ഒപ്പമെത്തിച്ചു.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!