ആ വിസ്‌മയം വരുന്നു, സാംസങ് ഗാലക്‌സി ട്രൈ-ഫോൾഡ് സ്‌മാര്‍ട്ട്‌ഫോണ്‍ അവതരണം ഒക്‌ടോബറില്‍?

സാംസങ് ഗാലക്‌സി സ്സെഡ് ട്രൈ-ഫോൾഡ് 2025-ലെ അപെക് ഉച്ചകോടിയിൽ അവതരിപ്പിക്കും എന്ന് റിപ്പോര്‍ട്ട്, ഗാലക്‌സി നിരയിലെ ആദ്യ ട്രിപ്പിള്‍ ഫോള്‍ഡബിള്‍ മൊബൈല്‍ ഫോണ്‍ കാത്ത് ആരാധകര്‍. 

സോള്‍: 2019-ൽ ഗാലക്‌സി സ്സെഡ് ഫോൾഡ് സീരീസ് പുറത്തിറക്കിയതുമുതൽ ഫോള്‍ഡബിള്‍ സ്‍മാർട്ട്‌ഫോണുകളുടെ വിപണിയിൽ മുൻപന്തിയിലാണ് ദക്ഷിണ കൊറിയൻ ടെക് ഭീമനായ സാംസങ്. ബ്രാന്‍ഡിന്‍റെ ആദ്യത്തെ ട്രൈ-ഫോൾഡ് സ്‍മാർട്ട്‌ഫോണുമായി ഒരു പുതു ചരിത്രം കുറിക്കാൻ ഒരുങ്ങുകയാണ് സാംസങ്. ഈ വർഷം അവസാനത്തോടെ സാംസങിന്‍റെ ട്രൈ-ഫോൾഡിംഗ് സ്‌മാർട്ട്‌ഫോൺ അവതരിപ്പിക്കപ്പെടും എന്നാണ് പുതിയ റിപ്പോർട്ടുകൾ. 2025 ഒക്‌ടോബര്‍ 31 മുതൽ നവംബർ ഒന്നുവരെ ദക്ഷിണ കൊറിയയിലെ ജിയോങ്‌ജുവിൽ നടക്കാനിരിക്കുന്ന ഏഷ്യ-പസഫിക് സാമ്പത്തിക സഹകരണ (APEC) ഉച്ചകോടിയിൽ സാംസങ് ഗാലക്‌സി സ്സെഡ് ട്രൈ-ഫോൾഡ് സ്‍മാർട്ട്‌ഫോൺ പ്രദർശിപ്പിച്ചേക്കാമെന്ന് ദക്ഷിണ കൊറിയയിലെ യോൻഹാപ്പ് ന്യൂസ് ഏജൻസി റിപ്പോർട്ട് ചെയ്യുന്നു.

സാംസങ് ഗാലക്‌സി സ്സെഡ് ട്രൈഫോൾഡ്: ഇതുവരെ നമുക്കറിയാവുന്ന കാര്യങ്ങൾ

സാംസങിന്‍റെ ട്രൈ-ഫോൾഡ് സ്‍മാർട്ട്‌ഫോൺ കമ്പനിയുടെ നിലവിലുള്ള ബുക്ക്-സ്റ്റൈൽ ഫോൾഡബിൾ ഗാലക്‌സി സ്സെഡ് സീരീസ് സ്‌മാർട്ട്‌ഫോണുകളിൽ നിന്നുള്ള ഒരു പരിണാമം ആയിരിക്കുമെന്ന് പ്രതീക്ഷിക്കുന്നു. ഈ സ്‍മാർട്ട്ഫോണിന് ഗാലക്‌സി സ്സെഡ് ട്രൈഫോൾഡ് എന്ന് പേരിടാൻ സാധ്യതയുണ്ട്. ഏറെ പ്രതീക്ഷയോടെ കാത്തിരിക്കുന്ന ഈ ഹാൻഡ്‌സെറ്റ് പൂർണ്ണമായും തുറക്കുമ്പോൾ ജി-സ്റ്റൈൽ ഇൻവേർഡ് ഫോൾഡിംഗ് ഡിസൈനും 9.96 ഇഞ്ച് ഡിസ്‌പ്ലേയും ഉണ്ടായിരിക്കുമെന്ന് പ്രതീക്ഷിക്കുന്നു.

വരാനിരിക്കുന്ന ഉപകരണത്തിന് മൂന്ന് ഭാഗങ്ങളായി മടക്കാവുന്ന ഒരു ജി-സ്റ്റൈൽ ഡിസൈൻ ഭാഷ ഉണ്ടായിരിക്കാൻ സാധ്യതയുണ്ട്. പൂർണ്ണമായും നിവർത്തിയ രൂപത്തിൽ 9.96 ഇഞ്ച് സ്‌ക്രീനും മടക്കിയ രൂപത്തിൽ 6.54 ഇഞ്ച് ഡിസ്‌പ്ലേയും ഉണ്ടായിരിക്കുമെന്നും അഭ്യൂഹമുണ്ട്. സിലിക്കൺ-കാർബൺ ബാറ്ററിയാണ് ഇതിന്‍റെ സവിശേഷത. സ്‌നാപ്ഡ്രാഗൺ 8 എലൈറ്റ് ചിപ്പും 200 മെഗാപിക്‌സൽ പ്രൈമറി സെൻസർ അടങ്ങുന്ന ട്രിപ്പിൾ ക്യാമറ യൂണിറ്റും ഈ ഫോണിൽ ഉണ്ടാകും. മുകളിൽ ഒരു യുഐ 8 സ്‌കിൻ ഉള്ള ആൻഡ്രോയ്‌ഡ് 16 ഉപയോഗിച്ചായിരിക്കും ഈ ഹാൻഡ്‌സെറ്റ് പുറത്തിറങ്ങുക.

ഈ വർഷം ജനുവരിയിൽ നടന്ന ഗാലക്‌സി അൺപാക്ക്ഡ് ഇവന്‍റിൽ തങ്ങളുടെ ആദ്യ ട്രൈ-ഫോൾഡ് സ്‌മാർട്ട്‌ഫോണിന്‍റെ ടീസർ സാംസങ് പുറത്തിറക്കിയിരുന്നു. ഈ വിഭാഗത്തിൽ മുന്നിൽ നിൽക്കാനുള്ള സാംസങിന്‍റെ അടുത്ത വലിയ കുതിച്ചുചാട്ടമായിരിക്കും ട്രൈ-ഫോൾഡ്. നിലവിൽ, ഉപഭോക്താക്കൾക്ക് ട്രൈ-ഫോൾഡ് സ്‌മാർട്ട്‌ഫോണുകൾ വാഗ്‌ദാനം ചെയ്യുന്ന ഒരേയൊരു സ്‍മാർട്ട്ഫോൺ കമ്പനി വാവെയ് മാത്രമാണ്.

ഇന്ത്യൻ ലോഞ്ച് എപ്പോൾ?

അതേസമയം, ഈ ഫോണിന്‍റെ വിൽപ്പന തുടക്കത്തിൽ ചൈനയിലും ദക്ഷിണ കൊറിയയിലും മാത്രമായിരിക്കും എന്നും പ്രാരംഭ ഉത്പാദനം ഏകദേശം 50,000 യൂണിറ്റുകളായി പരിമിതപ്പെടുത്തിയേക്കാമെന്നും റിപ്പോർട്ടുകൾ പറയുന്നു. എങ്കിലും, ഇന്ത്യ ഉൾപ്പെടെയുള്ള ആഗോള വിപണികളിൽ ആവശ്യകതയെ ആശ്രയിച്ച് ഘട്ടം ഘട്ടമായി സാംസങ് അവതരിപ്പിക്കാനും സാധ്യതയുണ്ട്.