സാംസങ്ങിന്‍റെ പുതിയ താരങ്ങൾ; മൂന്ന് ഡിവൈസുകൾ വരുന്നു?

സാംസങ്ങിന്റെ ഗാലക്സി എസ്26 എഫ്ഇ, ഗാലക്സി ടാബ് എസ്12 പ്ലസ്, ഗാലക്സി എ07എസ് എന്നീ പുതിയ ഡിവൈസുകൾ ഉടൻ വിപണിയിലെത്തിയേക്കും. ഗൂഗിൾ പ്ലേ കൺസോൾ പട്ടികയിൽ ഈ ഉപകരണങ്ങൾ പ്രത്യക്ഷപ്പെട്ടതോടെയാണ് ലോഞ്ച് സൂചനകൾ ശക്തമായത്. ചില മോഡലുകൾക്ക് ഇന്ത്യയിൽ ബി ഐ എസ് സർട്ടിഫിക്കേഷനും ലഭിച്ചിട്ടുണ്ട്.

സാംസങിന്റെ പുതിയ തലമുറ ഡിവൈസുകൾ വിപണിയിലെത്താൻ ഒരുങ്ങുന്നതായി സൂചന. ഗാലക്സി എസ്26 എഫ്ഇ, ഗാലക്സി ടാബ് എസ്12 പ്ലസ്, ഗാലക്സി എ07എസ് എന്നീ മൂന്ന് ഉപകരണങ്ങൾ ഗൂഗിൾ പ്ലേ കൺസോളിലെ സപ്പോർട്ടിംഗ് ഡിവൈസുകളുടെ പട്ടികയിൽ പ്രത്യക്ഷപ്പെട്ടതായിട്ടാണ് റിപ്പോർട്ടുകൾ. വിവിധ രാജ്യങ്ങളിലേക്കുള്ള മോഡൽ വകഭേദങ്ങളും പട്ടികയിൽ കണ്ടെത്തിയിട്ടുണ്ട്. എന്നാൽ ഈ പുതിയ ഡിവൈസുകളുടെ ഔദ്യോഗിക ലോഞ്ച് തീയതി സാംസങ് ഇതുവരെ സ്ഥിരീകരിച്ചിട്ടില്ല.

ഗാലക്സി എസ്26 എഫ്ഇയ്ക്ക് അഞ്ച് വകഭേദങ്ങൾ

ഗാലക്സി എസ്26 എഫ്ഇ അഞ്ച് വ്യത്യസ്ത മോഡൽ നമ്പറുകളിലാണ് പട്ടികയിൽ പ്രത്യക്ഷപ്പെട്ടതെന്നാണ് റിപ്പോർട്ട്. അന്താരാഷ്ട്ര വിപണിക്കായി എസ് എം-എസ്741ബി, ദക്ഷിണ കൊറിയയ്ക്കായി എസ് എം-എസ്741എൻ എന്നീ മോഡലുകളാണ് പറയപ്പെടുന്നത്. അമേരിക്കയിൽ കാരിയർ പതിപ്പിന് എസ് എം-എസ്741യു, അൺലോക്ക് ചെയ്ത പതിപ്പിന് എസ് എം-എസ്741യു1 എന്നീ മോഡൽ നമ്പറുകളും കാനഡയ്ക്കായി എസ് എം-എസ്741ഡബ്ല്യു മോഡലും പ്രതീക്ഷിക്കുന്നു. “ആർ14എസ്” എന്ന കോഡ് നാമത്തിലാണ് ഗാലക്സി എസ്26 എഫ്ഇ പട്ടികയിൽ ഇടം നേടിയിരിക്കുന്നതെന്നാണ് വിവരം. വിവിധ വിപണികൾക്കായി ഒരേസമയം മോഡലുകൾ തയ്യാറാക്കുന്നത് ഡിവൈസിന്റെ ആഗോള ലോഞ്ചിനുള്ള ഒരുക്കങ്ങളുടെ സൂചനയായാണ് വിലയിരുത്തപ്പെടുന്നത്.

ഗാലക്സി ടാബ് എസ്12 പ്ലസ്; വൈഫൈ, 5ജി പതിപ്പുകൾ

ഗാലക്സി ടാബ് എസ്12 പ്ലസാണ് റിപ്പോർട്ടിൽ ശ്രദ്ധ നേടുന്ന മറ്റൊരു ഉപകരണം. ടാബ്ലെറ്റിന്റെ വൈഫൈ, 5ജി പതിപ്പുകൾ ഗൂഗിൾ പ്ലേ കൺസോളിൽ പ്രത്യക്ഷപ്പെട്ടതായാണ് വിവരം. വൈഫൈ പതിപ്പിന് എസ് എം-എക്സ്840 എന്ന മോഡൽ നമ്പറും “ജിടിഎസ്12പിവൈഫൈ” എന്ന കോഡ് നാമവുമാണ് റിപ്പോർട്ട് ചെയ്തിരിക്കുന്നത്. 5ജി പതിപ്പുകൾക്ക് എസ് എം-എക്സ്846ബി, എസ് എം-എക്സ്846ഇ, എസ് എം-എക്സ്846എൻ, എസ് എം-എക്സ്848യു എന്നീ മോഡൽ നമ്പറുകളാണ് പറയുന്നത്.

ഇന്ത്യയിലും സർട്ടിഫിക്കേഷൻ

ഗാലക്സി ടാബ് എസ്12 പ്ലസിന്റെ ചില മോഡലുകൾ ഇന്ത്യയിലെ ബി ഐ എസ് സർട്ടിഫിക്കേഷൻ ഡാറ്റാബേസിലും പ്രത്യക്ഷപ്പെട്ടതായി റിപ്പോർട്ടുകൾ ഉണ്ട്. എസ് എം-എക്സ്840, എസ് എം-എക്സ്846ബി മോഡലുകളാണ് ഇന്ത്യയുമായി ബന്ധപ്പെട്ട് കണ്ടെത്തിയിരിക്കുന്നത്. ദക്ഷിണ കൊറിയയിലും അമേരിക്കയിലും മറ്റ് വകഭേദങ്ങൾ സർട്ടിഫിക്കേഷൻ നടപടികളിലൂടെ കടന്നുപോയതായും റിപ്പോർട്ടുകളുണ്ട്. ഇതോടെ ഗാലക്സി ടാബ് എസ്12 പ്ലസിന്റെ വിപണി പ്രവേശനത്തിനുള്ള തയ്യാറെടുപ്പുകൾ സാംസങ് സജീവമായി നടത്തുന്നുവെന്ന സൂചനയാണ് ലഭിക്കുന്നത്.

ഗാലക്സി എ07എസിനും വരവിന്റെ സൂചന

ബജറ്റ് വിഭാഗത്തിൽ എത്തുമെന്ന് കരുതുന്ന ഗാലക്സി എ07എസിനും ഗൂഗിൾ പ്ലേ കൺസോളിൽ ഇടം ലഭിച്ചതായി റിപ്പോർട്ട്. “എ07വിഇ” എന്ന കോഡ് നാമത്തിലാണ് മോഡൽ പട്ടികയിൽ പ്രത്യക്ഷപ്പെട്ടത്. അന്താരാഷ്ട്ര വിപണിക്കായി എസ് എം-എ077എഫ്, ലാറ്റിൻ അമേരിക്കൻ വിപണിക്കായി എസ് എം-എ077എം എന്നീ വകഭേദങ്ങളാണ് റിപ്പോർട്ട് ചെയ്യുന്നത്. ഈ മോഡൽ നമ്പറുകൾ നേരത്തെ വിവിധ സർട്ടിഫിക്കേഷൻ പട്ടികകളിലും പ്രത്യക്ഷപ്പെട്ടിരുന്നു.

ലോഞ്ച് തീയതി സ്ഥിരീകരിച്ചിട്ടില്ല

ഗൂഗിൾ പ്ലേ കൺസോൾ, വിവിധ സർട്ടിഫിക്കേഷൻ ഡാറ്റാബേസുകൾ എന്നിവയിലെ സാന്നിധ്യം സാംസങ് ഈ ഡിവൈസുകളുടെ ഒരുക്കങ്ങൾ മുന്നോട്ടുകൊണ്ടുപോകുന്നു എന്നതിന്‍റെ സൂചനയാണ്. എന്നാൽ ഗാലക്സി എസ്26 എഫ്ഇ, ഗാലക്സി ടാബ് എസ്12 പ്ലസ്, ഗാലക്സി എ07എസ് എന്നിവയുടെ ഔദ്യോഗിക ലോഞ്ച് തീയതി സാംസങ് ഇതുവരെ പ്രഖ്യാപിച്ചിട്ടില്ല. അതിനാൽ നിലവിൽ പുറത്തുവന്ന വിവരങ്ങളെ ലോഞ്ചിനുള്ള ശക്തമായ സൂചനകളായി മാത്രം കാണുന്നതാണ് ഉചിതം. ഔദ്യോഗിക പ്രഖ്യാപനം വന്നതിന് ശേഷമേ വില, ഫീച്ചറുകൾ, ഇന്ത്യയിലെ ലഭ്യത തുടങ്ങിയ കാര്യങ്ങളിൽ വ്യക്തത ലഭിക്കുകയുള്ളൂ.