സർക്കാർ ചെലവുകൾക്ക് ബ്ലോക്ക് ചെയിൻ പേയ്മെന്‍റ് സംവിധാനവുമായി ദക്ഷിണ കൊറിയ

ചില പൊതുചെലവുകൾക്കായി ബ്ലോക്ക് ചെയിൻ അടിസ്ഥാനമാക്കിയ പേയ്മെന്‍റ് സംവിധാനം അവതരിപ്പിക്കാൻ ദക്ഷിണ കൊറിയൻ സർക്കാർ ഒരുങ്ങുന്നു. ഈ പരീക്ഷണ പദ്ധതി, സർക്കാർ ചെലവുകളിൽ സുതാര്യത വർദ്ധിപ്പിക്കാനും ദുരുപയോഗം കുറയ്ക്കാനും ലക്ഷ്യമിടുന്നു.

സോള്‍: ചില പൊതുചെലവുകൾക്കായി ബ്ലോക്ക് ചെയിൻ സാങ്കേതികവിദ്യ അടിസ്ഥാനമാക്കിയ പേയ്മെന്‍റ് സംവിധാനം അവതരിപ്പിക്കാൻ ദക്ഷിണ കൊറിയ സർക്കാർ പദ്ധതിയിടുന്നു. ഡിസ്‌ട്രിബ്യൂട്ടഡ് ലെഡ്‍ജർ ടെക്‌നോളജി (DLT) ഉപയോഗിക്കുന്ന ഈ പരീക്ഷണ പദ്ധതി ഒരു റെഗുലേറ്ററി സാൻഡ്ബോക്‌സിന്‍റെ കീഴിൽ നടപ്പാക്കുമെന്ന് രാജ്യത്തിന്‍റെ സാമ്പത്തിക-ധനകാര്യ മന്ത്രാലയം (MOEF) അറിയിച്ചു.

ഈ പൈലറ്റ് പദ്ധതി 2026-ലെ നാലാം പാദത്തോടെ പൂർണ്ണമായ നടപ്പാക്കലിലേക്ക് എത്തിക്കാനാണ് സർക്കാർ ലക്ഷ്യമിടുന്നത്. ആദ്യഘട്ടത്തിൽ സെജോംഗ് നഗരത്തിലാണ് പരീക്ഷണം ആരംഭിക്കുക. സർക്കാർ ചെലവുകളുടെ സമയപരിധി, ഉപയോഗിക്കാവുന്ന വിഭാഗങ്ങൾ തുടങ്ങിയവ മുൻകൂട്ടി നിശ്ചയിച്ച വ്യവസ്ഥകൾ ഉൾപ്പെടുത്തി നിയന്ത്രിത രീതിയിലാണ് പദ്ധതി പ്രവർത്തിക്കുക.

സർക്കാർ പ്രവർത്തനച്ചെലവുകൾക്കായി ഉപയോഗിക്കുന്ന ഡെപ്പോസിറ്റ് ടോക്കണുകളുടെ ഉപയോഗം വ്യാപിപ്പിക്കുന്നതിനാണ് ഈ നീക്കം എന്ന് സാമ്പത്തിക-ധനകാര്യ മന്ത്രാലയം വിശദീകരിക്കുന്നു. നിലവിൽ സർക്കാർ ചെലവുകൾ പ്രധാനമായും സർക്കാർ നൽകിയ ക്രെഡിറ്റ്, ഡെബിറ്റ് കാർഡുകൾ വഴി നടത്തപ്പെടുകയും പിന്നീട് റിപ്പോർട്ടിംഗ് സംവിധാനത്തിലൂടെ നിരീക്ഷിക്കുകയും ചെയ്യുന്നു. എന്നാൽ പുതിയ സംവിധാനം ചെലവുകൾ കൂടുതൽ സുതാര്യമാക്കുകയും ദുരുപയോഗ സാധ്യത കുറയ്ക്കുകയും ചെയ്യുമെന്നാണ് പ്രതീക്ഷിക്കുന്നത്.

ഡെപ്പോസിറ്റ് ടോക്കണുകൾ ഉപയോഗിക്കുമ്പോൾ മുൻകൂട്ടി നിശ്ചയിച്ച സമയപരിധികളും ബിസിനസ് വിഭാഗങ്ങളും നിർവചിച്ച് ബ്ലോക്ക്‌ചെയിൻ സാങ്കേതികവിദ്യ ഉപയോഗിക്കുന്നത് ചെലവുകളുടെ നടപ്പാക്കൽ കൂടുതൽ സുതാര്യമാക്കും എന്നും കൂടാതെ ഇടനിലക്കാരില്ലാത്ത പേയ്മെന്‍റ് ഘടന ചെറുകിട വ്യാപാരികൾക്ക് ഫീസ് ഭാരം കുറയ്ക്കാനും സഹായിക്കും എന്നും സാമ്പത്തിക-ധനകാര്യ മന്ത്രാലയം വിശദീകരിക്കുന്നു.

ഈ പദ്ധതി വിജയകരമായാൽ സർക്കാർ ചെലവുകളുടെ മറ്റ് മേഖലകളിലേക്കും വ്യാപിപ്പിക്കുമെന്ന് സൂചനയുണ്ട്. ഇതിലൂടെ പൊതുധനകാര്യ മാനേജ്മെന്റിൽ ഡിജിറ്റൽ കറൻസി അടിസ്ഥാനമാക്കിയ സംവിധാനങ്ങൾ കൂടുതൽ ശക്തിപ്പെടുത്തുകയാണ് ലക്ഷ്യം. ദക്ഷിണ കൊറിയ കഴിഞ്ഞ വർഷം സ്റ്റേബിൽകോയിൻ പുറത്തിറക്കുന്നതിനുള്ള പദ്ധതികളും പ്രഖ്യാപിച്ചിരുന്നു. ഇത് രാജ്യത്തെ സജീവമായ ഡിജിറ്റൽ ആസ്‍തി വിപണിക്ക് കൂടുതൽ പ്രോത്സാഹനം നൽകിയിരുന്നു. കൂടാതെ, ഇലക്ട്രിക് വാഹന ചാർജിംഗ് അടിസ്ഥാനസൗകര്യ സബ്‌സിഡികൾക്കായി ടോക്കണൈസ്‍ഡ് ഡെപ്പോസിറ്റുകൾ ഉപയോഗിച്ച പരീക്ഷണവും മുമ്പ് ആരംഭിച്ചിരുന്നു.

2030-ഓടെ ട്രഷറി ഫണ്ടുകളുടെ നാലിലൊന്ന് ഡിജിറ്റൽ കറൻസിയിലേക്ക് മാറ്റുക എന്ന ദീർഘകാല ലക്ഷ്യവും മന്ത്രാലയം വ്യക്തമാക്കിയിട്ടുണ്ട്. ഇതോടെ പൊതുധനകാര്യ മേഖലയിലെ ഡിജിറ്റൽ പരിവർത്തനം കൂടുതൽ വേഗത്തിലാകുമെന്ന് സർക്കാർ വിലയിരുത്തുന്നു. ഈ പുതിയ പൈലറ്റ് പദ്ധതി വിജയകരമാകുകയാണെങ്കിൽ, ബ്ലോക്ക്ചെയിൻ സാങ്കേതികവിദ്യ സർക്കാർ ധനകാര്യ സംവിധാനങ്ങളിൽ പ്രധാന പങ്ക് വഹിക്കുന്ന ഒരു മാതൃകയായി ദക്ഷിണ കൊറിയ മാറുമെന്നാണ് നിരീക്ഷകരുടെ അഭിപ്രായം.