വിവോ എക്‌സ് ഫോൾഡ് 6: അമ്പരപ്പിക്കും കരുത്തുമായി വരുന്നു

വിവോയുടെ പുതിയ ഫോൾഡബിൾ ഫോണായ എക്‌സ് ഫോൾഡ് 6, 7,000mAh ബാറ്ററിയും മെച്ചപ്പെട്ട ഡ്യൂറബിലിറ്റിയുമായി ജൂൺ 26-ന് ചൈനയിൽ അവതരിപ്പിക്കും. IPX8, IPX9 വാട്ടർ റെസിസ്റ്റൻസ്, 200 മെഗാപിക്സൽ ക്യാമറ, മീഡിയടെക് ഡൈമെൻസിറ്റി 9500 പ്രോസസർ എന്നിവയാണ് ഫോണിന്റെ മറ്റ് പ്രധാന ആകർഷണങ്ങൾ.

വിവോയുടെ പുതിയ ഫോൾഡബിൾ സ്മാർട്ട്ഫോണായ വിവോ എക്‌സ് ഫോൾഡ് 6 ജൂൺ 26ന് ചൈനയിൽ ഔദ്യോഗികമായി അവതരിപ്പിക്കും. ലോഞ്ചിന് ദിവസങ്ങൾ മാത്രം ബാക്കി നിൽക്കെ, ഫോണിന്റെ പ്രധാന സവിശേഷതകൾ കമ്പനി ടീസറുകളിലൂടെ പുറത്തുവിട്ടിരിക്കുകയാണ്. കഴിഞ്ഞ വർഷം പുറത്തിറങ്ങിയ വിവോ എക്‌സ് ഫോൾഡ് 5നെ അപേക്ഷിച്ച് ബാറ്ററി ശേഷിയിലും ഡ്യൂറബിലിറ്റിയിലും ശ്രദ്ധേയമായ മെച്ചപ്പെടുത്തലുകളുമായാണ് പുതിയ മോഡൽ എത്തുന്നതെന്ന് കമ്പനി അവകാശപ്പെടുന്നു.

വിവോയുടെ മുതിർന്ന ഉദ്യോഗസ്ഥനായ ഹാൻ ബോക്സിയാവോ പങ്കുവെച്ച വിവരങ്ങൾ പ്രകാരം, എക്‌സ് ഫോൾഡ് 6ൽ 7,000mAh ശേഷിയുള്ള ‘ബ്ലൂ ഓഷ്യൻ’ ബാറ്ററിയാണ് ഉൾപ്പെടുത്തിയിരിക്കുന്നത്. എക്‌സ് ഫോൾഡ് 5ൽ ഉണ്ടായിരുന്ന 6,000mAh ബാറ്ററിയെക്കാൾ വലിയ ശേഷിയാണിത്. സ്‍മാർട്ട്ഫോൺ വ്യവസായ രംഗത്ത് ആദ്യമായി അഞ്ചാം തലമുറ സിലിക്കൺ അനോഡ് സാങ്കേതികവിദ്യ ഉപയോഗിച്ച ബാറ്ററിയാണിതെന്നും കമ്പനി വ്യക്തമാക്കുന്നു.

കൂടുതൽ ശക്തമായ ബാറ്ററി ഉപയോഗിച്ചതിലൂടെ ഉയർന്ന ലോഡിലുള്ള ഉപയോഗ സാഹചര്യങ്ങളിൽ 9.8 മണിക്കൂർ വരെ പ്രവർത്തന സമയം ലഭിക്കുമെന്ന് വിവോ പറയുന്നു. മുൻ മോഡലിനെ അപേക്ഷിച്ച് ബാറ്ററി പ്രകടനത്തിൽ 30 ശതമാനം വരെ പുരോഗതിയുണ്ടാകുമെന്നും കമ്പനി അവകാശപ്പെടുന്നു. മൈനസ് 20 ഡിഗ്രി സെൽഷ്യസ് പോലുള്ള അതിശൈത്യ കാലാവസ്ഥയിലും സ്ഥിരതയാർന്ന ബാറ്ററി പ്രകടനം ഉറപ്പാക്കുന്ന തരത്തിലാണ് സാങ്കേതികവിദ്യ വികസിപ്പിച്ചിരിക്കുന്നതെന്നും വ്യക്തമാക്കുന്നു.

ഡ്യൂറബിലിറ്റിയുടെ കാര്യത്തിലും വിവോ എക്‌സ് ഫോൾഡ് 6 ശ്രദ്ധ നേടുന്നു. ഫോണിന് IPX8, IPX9 വാട്ടർ റെസിസ്റ്റൻസ് റേറ്റിംഗുകൾ ലഭിക്കും. തുടർച്ചയായ മടക്കലിലും തുറക്കലിലും സ്ഥിരത ഉറപ്പാക്കുന്ന ഭാരം കുറഞ്ഞ ഹിഞ്ച് സംവിധാനവും ഫോണിൽ ഉൾപ്പെടുത്തിയിട്ടുണ്ട്. കൂടാതെ, യൂണിവേഴ്സൽ സിഗ്നൽ ആംപ്ലിഫിക്കേഷൻ സിസ്റ്റം 3.0 എന്ന പുതിയ കമ്മ്യൂണിക്കേഷൻ സാങ്കേതികവിദ്യയും ഫോണിൽ ഉണ്ടാകും. പ്രത്യേകമായി വികസിപ്പിച്ച 1+4 കമ്മ്യൂണിക്കേഷൻ ചിപ്പ്സെറ്റിന്റെ സഹായത്തോടെ ഹൈസ്പീഡ് ട്രെയിനുകൾ, ഉയരം കൂടിയ കെട്ടിടങ്ങളിലെ ലിഫ്റ്റുകൾ, ഹൈവേകൾ തുടങ്ങിയ സ്ഥലങ്ങളിൽ മികച്ച സിഗ്നൽ സ്വീകരണവും ആശയവിനിമയവും ലഭിക്കുമെന്നാണ് കമ്പനി പറയുന്നത്.

ബ്ലാക്ക് ഗോൾഡ്, ബ്ലൂ ഹോൾ, പോളർ നൈറ്റ്, സാൾട്ട് ലേക്ക് എന്നീ നാല് നിറങ്ങളിൽ ഫോൺ ലഭ്യമാകും. 3nm സാങ്കേതികവിദ്യയിൽ നിർമ്മിച്ച മീഡിയടെക് ഡൈമെൻസിറ്റി 9500 സൂപ്പർ എഡിഷൻ പ്രോസസറാണ് ഫോണിന്റെ കരുത്ത്. 200 മെഗാപിക്സൽ പ്രധാന ക്യാമറ ഉൾപ്പെടുന്ന ക്വാഡ് റിയർ ക്യാമറ സംവിധാനവും ഫോണിൽ ഉണ്ടായിരിക്കും.

ജൂൺ 26ന് നടക്കുന്ന ലോഞ്ചിന് മുന്നോടിയായി ചൈനയിൽ പ്രീ-ഓർഡറുകൾ ആരംഭിച്ചിട്ടുണ്ട്. മുൻകൂട്ടി ബുക്ക് ചെയ്യുന്ന ഉപഭോക്താക്കൾക്ക് പ്രത്യേക വിലക്കിഴിവുകളും ഏകദേശം 20,000 രൂപ വരെയുള്ള ട്രേഡ്-ഇൻ ആനുകൂല്യങ്ങളും ലഭ്യമാക്കുമെന്ന് വിവോ അറിയിച്ചു.