ചാർജ് തീർന്നു പോകുമെന്ന പേടി വേണ്ട! 7,200mAh ഭീമൻ ബാറ്ററിയുമായി വിവോ Y6a ചൈനീസ് വിപണിയിൽ; ഉടൻ ഇന്ത്യയിലേക്കും വരുമോ?

പ്രമുഖ സ്മാർട്ട്ഫോൺ നിർമ്മാതാക്കളായ വിവോ, ചൈനയിൽ പുതിയ Y6a മോഡൽ അവതരിപ്പിച്ചു. 7,200mAh എന്ന ഭീമൻ ബാറ്ററി, 50 മെഗാപിക്സൽ ക്യാമറ, 120Hz റിഫ്രഷ് റേറ്റുള്ള ഡിസ്‌പ്ലേ എന്നിവയാണ് ഈ ഫോണിന്റെ പ്രധാന ആകർഷണങ്ങൾ. സ്നാപ്ഡ്രാഗൺ 4 ജെൻ 2 ചിപ്‌സെറ്റിൽ പ്രവർത്തിക്കുന്ന ഫോണിന് IP68, IP69 റേറ്റിംഗുകളുമുണ്ട്.

പ്രമുഖ സ്‍മാർട്ട്ഫോൺ നിർമ്മാതാക്കളായ വിവോ ചൈനീസ് വിപണിയിൽ പുതിയ വിവോ Y6a സ്‍മാർട്ട്ഫോൺ അവതരിപ്പിച്ചു. കമ്പനിയുടെ പ്രീമിയം ഫോൾഡബിൾ മോഡലായ വിവോ X ഫോൾഡ് 6 പുറത്തിറങ്ങുന്നതിന് മുന്നോടിയായാണ് പുതിയ വൈ- സീരീസ് ഫോൺ അവതരിപ്പിച്ചിരിക്കുന്നത്. വൻ കപ്പാസിറ്റിയുള്ള 7,200mAh ബാറ്ററി, 50 മെഗാപിക്സൽ ബാക്ക് ക്യാമറ, 120Hz റിഫ്രഷ് റേറ്റുള്ള ഡിസ്പ്ലേ എന്നിവയാണ് ഈ ഫോണിന്റെ പ്രധാന സവിശേഷതകൾ.

ചൈനയിൽ ഈ ഫോൺ 8GB റാമും 256GB സ്റ്റോറേജും ഉൾപ്പെടുന്ന ഒറ്റ വേരിയന്റിലാണ് ലഭ്യമാക്കിയിരിക്കുന്നത്. 1,999 ചൈനീസ് യുവാൻ (ഏകദേശം 28,000 രൂപ) ആണ് വില. ഗാലക്സി സിൽവർ, ഒബ്സിഡിയൻ ബ്ലാക്ക്, ഫീനിക്സ് വെൽക്കംസ് ഗോൾഡ് എന്നീ മൂന്ന് നിറങ്ങളിൽ ഫോൺ ലഭ്യമാണ്. ആൻഡ്രോയിഡ് 16 അധിഷ്ഠിതമായ ഒഖിജിൻ ഓഎസ് 6 ഓപ്പറേറ്റിംഗ് സിസ്റ്റത്തിലാണ് വിവോ Y6a പ്രവർത്തിക്കുന്നത്. 6.75 ഇഞ്ച് HD+ LCD ഡിസ്പ്ലേ ആണ് ഫോണിലുള്ളത്. 120Hz റിഫ്രഷ് റേറ്റും പരമാവധി 1,200 നിറ്റ്സ് ബ്രൈറ്റ്നസും ഡിസ്പ്ലേയ്ക്ക് നൽകിയിരിക്കുന്നു. കൂടാതെ IP68, IP69 റേറ്റിംഗുകൾ ലഭിച്ചതിനാൽ പൊടിയിലും വെള്ളത്തിലും നിന്ന് മികച്ച സംരക്ഷണം ലഭിക്കുമെന്ന് കമ്പനി അവകാശപ്പെടുന്നു.

പ്രോസസറിന്റെ കാര്യത്തിൽ, ക്വാൽക്കം സ്‍നാപ്‍ഡ്രാഗൺ 4 ജെൻ 2 ചിപ്സെറ്റാണ് ഫോണിന് കരുത്ത് പകരുന്നത്. 4 നാനോമീറ്റർ സാങ്കേതികവിദ്യയിൽ നിർമ്മിച്ച ഈ പ്രോസസറിനൊപ്പം അഡ്രിനോ 613 ജിപിയു , 8GB LPDDR4X റാം, 256GB UFS 3.1 സ്റ്റോറേജ് എന്നിവയും ഉൾപ്പെടുത്തിയിട്ടുണ്ട്. സുരക്ഷയ്ക്കായി സൈഡ്- മൗണ്ടഡ് ഫിംഗർപ്രിന്റ് സെൻസറും ഫേസ് അൺലോക്കും നൽകിയിട്ടുണ്ട്. ഫോട്ടോഗ്രാഫിക്കായി 50 മെഗാപിക്സൽ പ്രധാന ക്യാമറയാണ് പിന്നിൽ നൽകിയിരിക്കുന്നത്. ഓട്ടോഫോക്കസും 10 മടങ്ങ് വരെ ഡിജിറ്റൽ സൂമും ഇതിൽ ലഭ്യമാണ്. മുൻവശത്ത് 8 മെഗാപിക്സൽ സെൽഫി ക്യാമറയും ഉണ്ട്. മുൻ-പിൻ ക്യാമറകൾ ഉപയോഗിച്ച് പരമാവധി 1080p വീഡിയോ റെക്കോർഡ് ചെയ്യാനാകും.

7,200mAh കപ്പാസിറ്റി ബാറ്ററിയാണ് ഫോണിന്റെ ഏറ്റവും വലിയ പ്രത്യേകത. ഇത് 44W വയർഡ് ഫാസ്റ്റ് ചാർജിംഗ് സപ്പോർട്ട് ചെയ്യുന്നു. 5G, 4G എൽടിഇ, ഡ്യുവൽ-ബാൻഡ് വൈ-ഫൈ, ബ്ലൂടൂത്ത് 4.2, യുഎസ്‍ബി ടൈപ്പ്-സി പോർട്ട്, ജിപിഎസ്, ഇൻഫ്രാറെഡ് ബ്ലാസ്റ്റർ തുടങ്ങിയ കണക്റ്റിവിറ്റി സൗകര്യങ്ങളും ഫോണിലുണ്ട്. ബാറ്ററി, IP68, IP69 റേറ്റിംഗ്, ഉയർന്ന റിഫ്രഷ് റേറ്റുള്ള ഡിസ്പ്ലേ എന്നിവ മുൻനിർത്തിയാണ് വിവോ പുതിയ Y6aയെ വിപണിയിലെത്തിച്ചിരിക്കുന്നത്. നിലവിൽ ചൈനീസ് വിപണിയിൽ മാത്രമാണ് ഈ ഫോൺ അവതരിപ്പിച്ചിട്ടുള്ളത്. മറ്റ് രാജ്യങ്ങളിലെ ലഭ്യതയെക്കുറിച്ച് കമ്പനി ഇതുവരെ ഔദ്യോഗികമായി പ്രഖ്യാപിച്ചിട്ടില്ല.