'അവനൊരു തുടക്കം കിട്ടിയാല്‍ മതി, പിന്നെ കത്തിക്കയറിക്കോളും', ഫോമിലല്ലാത്ത ഓപ്പണർ അഭിഷേക് ശര്‍മയെ പിന്തുണച്ച് ഇന്ത്യൻ പരിശീലകന്‍

ടി20 ലോകകപ്പിൽ തുടർച്ചയായി മൂന്ന് മത്സരങ്ങളിലും പൂജ്യത്തിന് പുറത്തായെങ്കിലും ഓപ്പണർ അഭിഷേക് ശർമ്മയിൽ പൂർണ്ണ വിശ്വാസമുണ്ടെന്ന് ബൗളിംഗ് കോച്ച് മോണി മോർക്കൽ.

അഭിഷേകിനെ കൈവിടില്ല

ടി20 ലോകകപ്പ് സൂപ്പർ 8 ഘട്ടത്തിലേക്ക് കടക്കുമ്പോൾ ഇന്ത്യൻ ടീമിലും ആരാധകര്‍ക്കിടയിലും വലിയ ചർച്ചയാകുന്നത് ഓപ്പണർ അഭിഷേക് ശർമ്മയുടെ മങ്ങിയ പ്രകടനമാണ്. ടൂർണമെന്‍റിൽ ഇതുവരെ കളിച്ച മൂന്ന് ഇന്നിംഗ്സുകളിലും പൂജ്യത്തിന് പുറത്തായ താരം കടുത്ത സമ്മർദ്ദത്തിലാണെങ്കിലും, സൂപ്പര്‍ 8 പോരാട്ടങ്ങളില്‍ അഭിഷേകിനെ കൈവിടില്ലെന്ന സൂചനയാണ് ടീം മാനേജ്മെന്‍റ് നല്‍കുന്നത്.

ഓപ്പണർ അവന്‍ തന്നെ

നാളെ അഹമ്മദാബാദിൽ ദക്ഷിണാഫ്രിക്കയ്‌ക്കെതിരെ നടക്കാനിരിക്കുന്ന ഇന്ത്യയുടെ ആദ്യ സൂപ്പർ 8 പോരാട്ടത്തിൽ അഭിഷേക് തന്നെയാകും ഓപ്പണറായി ഇറങ്ങുകയെന്ന് ബൗളിംഗ് കോച്ച് മോണി മോർക്കൽ വാര്‍ത്താ സമ്മേളനത്തില്‍ വ്യക്തമാക്കി.

അഭിഷേകില്‍ ചര്‍ച്ചയില്ല

അഭിഷേകിനെ മാറ്റുന്നതിനെക്കുറിച്ച് ടീമിനുള്ളിൽ യാതൊരു ചർച്ചയും നടന്നിട്ടില്ല. അവൻ ഒരു ലോകോത്തര താരമാണ്. നെറ്റ്സിൽ അവൻ മികച്ച രീതിയിൽ പന്ത് നേരിടുന്നുണ്ട്. ടൂർണമെന്‍റിൽ ഇതുവരെ മറ്റ് താരങ്ങൾ ഉത്തരവാദിത്തം ഏറ്റെടുത്തത് ഭാഗ്യമായി. അഭിഷേക് ഫോമിലേക്ക് തിരിച്ചെത്താൻ ഒരു തുടക്കം മാത്രമേ ആവശ്യമുള്ളൂ. പിന്നെ അവന്‍ കത്തിക്കയറു. അഭിഷേകിന്‍റെ ബാറ്റിംഗ് കാണികൾക്ക് ആവേശം പകരുന്നതാണെന്നും ടീമിന് വേണ്ടിയും ആരാധകർക്ക് വേണ്ടിയും വരും മത്സരങ്ങളിൽ അഭിഷേക് മികച്ച പ്രകടനം പുറത്തെടുക്കുമെന്നും മോർക്കൽ കൂട്ടിച്ചേർത്തു.

ഇടംകൈയ്യൻമാരുടെ ആധിക്യം വെല്ലുവിളിയോ?

അസിസ്റ്റന്‍റ് കോച്ച് റയാൻ ടെൻ ഡോഷേറ്റ് നേരത്തെ ചില ആശങ്കകൾ പങ്കുവെച്ചിരുന്നു. അഭിഷേക് ശർമ്മ, ഇഷാൻ കിഷൻ, തിലക് വർമ്മ എന്നിങ്ങനെ ആദ്യ മൂന്ന് സ്ഥാനങ്ങളിലും ഇടംകൈയ്യൻ ബാറ്റർമാർ വരുന്നത് എതിരാളികൾക്ക് കാര്യങ്ങൾ എളുപ്പമാക്കുന്നുണ്ടെന്ന് മോര്‍ക്കലും സമ്മതിച്ചു. അഭിഷേക് ശര്‍മ, ഇഷാന്‍ കിഷന്‍, തിലക് വര്‍മ എന്നീ ഇടം കൈയന്‍മാരാണ് ടോപ് 3യില്‍ ഇന്ത്യക്കായി ഇറങ്ങുന്നത്. നാലും അഞ്ചും നമ്പറില്‍ സൂര്യകുമാറും ഹാര്‍ദ്ദിക്കും കഴിഞ്ഞാൽ വീണ്ടും ശിവം ദുബെ, റിങ്കു സിംഗ്, അക്സര്‍ പട്ടേല്‍, വാഷിംഗ്ടണ്‍ സുന്ദര്‍, അര്‍ഷ്ദീപ് സിംഗ് എന്നിവരെല്ലാം ഇടം കൈയന്‍മാരാണ്.

സ്പിന്നർമാരെ നേരിടാൻ ഇന്ത്യ റെഡി

ടൂർണമെന്‍റിൽ ഇതുവരെ സ്പിന്നർമാരെ നേരിടുന്നതിൽ ഇന്ത്യൻ ബാറ്റർമാർക്ക് ചെറിയ പിഴവുകൾ സംഭവിച്ചിട്ടുണ്ടെങ്കിലും, വരും മത്സരങ്ങളിൽ ടീം താളം കണ്ടെത്തുമെന്ന് മോര്‍ക്കല്‍ പറഞ്ഞു.സത്യം പറഞ്ഞാൽ, ഇതുവരെ ഞങ്ങൾ കളിച്ച പിച്ചുകൾ പന്തിനെ അടിച്ചുതകർക്കാൻ അത്ര എളുപ്പമുള്ളതായിരുന്നില്ല. മുംബൈയിൽ ഞങ്ങൾ അത് പരീക്ഷിച്ചപ്പോൾ തിരിച്ചടിയുണ്ടായി. എന്നാൽ പതുക്കെ ഒരു അടിത്തറയുണ്ടാക്കിയാൽ അവസാന ഓവറുകളിൽ റൺസ് കണ്ടെത്താൻ നമുക്ക് സാധിക്കും. സ്പിന്നിനെതിരെ വിചാരിച്ച പോലെ ആധിപത്യം പുലർത്താൻ കഴിഞ്ഞിട്ടില്ല എന്നത് ശരിയാണ്. എങ്കിലും അനുകൂലമായ സാഹചര്യത്തിൽ ബാറ്റർമാർ ഫോമിലേക്ക് തിരിച്ചെത്തുമെന്ന് എനിക്ക് ഉറപ്പുണ്ട്.

ഫീൽഡിങ് നിർണ്ണായകം

അടുത്ത ഘട്ടത്തിൽ ഫീൽഡിങ്ങിനാണ് ടീം കൂടുതൽ പ്രാധാന്യം നൽകുന്നതെന്ന് മോര്‍ക്കല്‍ പറഞ്ഞു. സമീപകാല മത്സരങ്ങളിൽ ക്യാച്ചുകൾ കൈവിട്ടതും ഫീൽഡിങ്ങിലെ പിഴവുകളും ടീമിന് തിരിച്ചടിയായിരുന്നു. ടൂർണമെന്‍റിന്‍റെ നിർണ്ണായക ഘട്ടത്തിൽ ക്യാച്ചുകൾക്ക് വലിയ പ്രാധാന്യമുണ്ടെന്ന് മോർക്കൽ ഓർമ്മിപ്പിച്ചു. എളുപ്പമുള്ള ക്യാച്ചുകൾ എന്നൊന്നില്ല. പകുതി സാധ്യതയുള്ള (50-50) ക്യാച്ചുകൾ പോലും കൈക്കലാക്കാൻ താരങ്ങൾ ശ്രമിക്കണം. ഒരു ക്യാച്ചിന് മത്സരത്തിന്‍റെ ഗതി തന്നെ മാറ്റാൻ കഴിയും-മോര്‍ക്കല്‍ പറഞ്ഞു.

വരുൺ ചക്രവർത്തിക്ക് പ്രശംസ

സ്പിന്നർ വരുൺ ചക്രവർത്തി ടീമിന്‍റെ പ്രധാന വിക്കറ്റ് വേട്ടക്കാരനാണെന്നും എന്നാൽ മറ്റ് ബൗളർമാരുടെ പിന്തുണ ഇതിൽ നിർണ്ണായകമാണെന്നും മോർക്കൽ വ്യക്തമാക്കി.വരുൺ ഒരു മികച്ച വിദ്യാർത്ഥിയെപ്പോലെയാണ്. ഓരോ ബാറ്ററെക്കുറിച്ചും കൃത്യമായ ഹോംവർക്ക് ചെയ്താണ് അവൻ മൈതാനത്തിറങ്ങുന്നത്. വീഡിയോ ദൃശ്യങ്ങൾ കണ്ട് ബാറ്റർമാരുടെ ദൗർബല്യങ്ങൾ മനസ്സിലാക്കാൻ അവൻ കൂടുതൽ സമയം ചെലവഴിക്കുന്നു. ടൂർണമെന്‍റിൽ ഇതുവരെ 4 മത്സരങ്ങളിൽ നിന്ന് 9 വിക്കറ്റുകൾ വീഴ്ത്തിയ വരുൺ, വിക്കറ്റ് വേട്ടക്കാരിൽ രണ്ടാം സ്ഥാനത്തുണ്ട്. ജസ്പ്രീത് ബുമ്രക്കൊപ്പം ടീം ഏറ്റവും കൂടുതൽ വിശ്വസിക്കുന്ന ബൗളറാണ് വരുണെന്ന് മോർക്കൽ പറഞ്ഞു.

വാഷിംഗ്ടൺ സുന്ദറിന്‍റെ തിരിച്ചുവരവ്

പരിക്കിന് ശേഷം ടീമിലേക്ക് തിരിച്ചെത്തിയ വാഷിംഗ്ടൺ സുന്ദറിന്റെ പ്രകടനത്തിലും മോര്‍ക്കല്‍ സംതൃപ്തി പ്രകടിപ്പിച്ചു. നെതർലൻഡ്‌സിനെതിരായ മത്സരത്തിൽ മികച്ച രീതിയിൽ പന്തെറിഞ്ഞ സുന്ദർ പൂർണ്ണ കായികക്ഷമത കൈവരിച്ചതായും സൂപ്പർ 8 ഘട്ടത്തിൽ ടീമിന് കൂടുതൽ കോമ്പിനേഷനുകൾ പരീക്ഷിക്കാൻ ഇത് സഹായിക്കുമെന്നും മോര്‍ക്കല്‍ കൂട്ടിച്ചേർത്തു.