Bhavana: തിരിച്ചു വരവിന് ഭാവന; ഫോട്ടോഷൂട്ട് ചിത്രങ്ങള്‍ പങ്കുവച്ച് താരം

സാമൂഹിക മാധ്യമങ്ങളിലൂടെ തെന്നിന്ത്യന്‍ സിനിമാ നടി ഭാവന (Bhavana) പങ്കുവയ്ക്കുന്ന ചിത്രങ്ങളെല്ലാം ആരാധകര്‍ ഏറ്റെടുക്കാറുണ്ട്. ഏറ്റവും ഒടുവില്‍ ഭാവന പങ്കുവച്ച ചിത്രങ്ങളും ഇന്ന് സാമൂഹ്യമാധ്യമങ്ങളില്‍ തരംഗമാണ്. 'കാരണം, ദിവസാവസാനം ഒരു വിധിയും ഇല്ലാതെ ബന്ധിപ്പിക്കുന്നത് ഞാനും എന്റെ ആത്മാവുമാണ് !!!' എന്ന ക്യാപ്ഷനോടെയാണ് ഭാവന തന്‍റെ ചിത്രങ്ങള്‍ പങ്കുവച്ചിരിക്കുന്നത്. നിരവധി പേരാണ് ചിത്രങ്ങള്‍ക്ക് കമന്‍റുകളുമായെത്തിയത്. ഒന്നരലക്ഷത്തിന് മേലെ ലൈക്കുകളാണ് ഭാവനയുടെ സാരി ചിത്രങ്ങള്‍ക്ക് ലഭിച്ചത്. വസ്ത്രവും സ്റ്റൈലും ഒരുക്കിയത് അഭിനവാണ്. എസ്ബികെ ഷുഹൈബാണ് ഫോട്ടോഗ്രാഫി. ഹെയര്‍ ഡ്രസ് ഫെമി ആന്‍റണി. ഷനീമാണ്  പിആര്‍ വര്‍ക്ക്.   

ഒരിടവേളയ്ക്ക് ശേഷം ഭാവന വീണ്ടും മലയാളത്തില്‍ സജീവാകാൻ ഒരുങ്ങുകയാണെന്ന് വാര്‍ത്തകള്‍ വന്നിട്ട് അധികമായില്ല. 

'ന്‍റിക്കാക്കാക്കൊരു പ്രേമണ്ടാര്‍ന്ന്' എന്ന സിനിമയിലൂടെയാണ് ഭവന മലയാളത്തിലേക്ക്  തിരിച്ചുവരുന്നതായി നേരത്തെ പറഞ്ഞിരുന്നത്. എന്നാല്‍ ഇപ്പോള്‍ ഭദ്രൻ സംവിധാനം ചെയ്യുന്ന പുതിയ ചിത്രത്തിലും ഭാവന പ്രധാന കഥാപാത്രമാകുന്നുവെന്നാണ് റിപ്പോര്‍ട്ട്. 

ഭദ്രന്‍റെ 'ഇഒ' (EO) എന്ന ചിത്രത്തിലാണ് ഭാവന അഭിനയിക്കുന്നത്. ഷെയ്ൻ നിഗം ആണ് ചിത്രത്തില്‍ നായകനായി അഭിനയിക്കുന്നത്.

'ഇഒ എലിയാവൂ കോഹൻ' എന്ന ജൂതനായിട്ടാണ് ഷെയ്‍ൻ അഭിനയിക്കുന്നത്. ഗൗതം വാസുദേവ് മേനോനും ചിത്രത്തില്‍ ഒരു പ്രധാന കഥാപാത്രമായി അഭിനയിക്കുന്നതായി റിപ്പോര്‍ട്ടുണ്ട്.

സുരേഷ് ബാബു ആണ് ചിത്രത്തിന്‍റെ തിരക്കഥ. 'ന്‍റിക്കാക്കാക്കൊരു പ്രേമണ്ടാര്‍ന്ന്' എന്ന ചിത്രം സംവിധാനം ചെയ്യുന്നത് നവാഗത സംവിധായകന്‍ ആദില്‍ മൈമൂനത്ത് അഷ്റഫാണ്. 

ഭാവനക്കൊപ്പം ഷറഫുദ്ധീനും കേന്ദ്ര കഥാപാത്രമായുണ്ട്. ബോണ്‍ഹോമി എന്‍റര്‍ടൈന്‍മെന്‍റ്സിന്‍റെ ബാനറില്‍ റെനീഷ് അബ്ദുള്‍ഖാദറാണ് 'ന്‍റിക്കാക്കാക്കൊരു പ്രേമണ്ടാര്‍ന്ന്'  എന്ന ചിത്രം നിര്‍മ്മിക്കുന്നത്.  ശ്യാം മോഹനാണ് എക്സിക്യൂട്ടീവ് പ്രൊഡ്യൂസര്‍. 

അരുണ്‍ റുഷ്‍ദി ആണ് ചിത്രത്തിന്‍റെ ഛായാഗ്രഹണം നിര്‍വ്വഹിക്കുന്നത്. പോള്‍ മാത്യൂസ്, നിശാന്ത് രാംടെകെ, ജോക്കര്‍ ബ്ലൂസ് എന്നിവര്‍ ചേര്‍ന്നാണ് സംഗീതം ഒരുക്കിയിരിക്കുന്നത്. 

വരികള്‍ എഴുതുന്നത് വിനായക് ശശികുമാറും, ശബ്‍ദലേഖനവും ഡിസൈനും ശബരിദാസ് തോട്ടിങ്കലും, സ്റ്റില്‍സ് രോഹിത് കെ സുരേഷുമാണ്.  സംവിധായകന്‍ ആദില്‍ മൈമൂനാഥ് അഷ്റഫ് തന്നെയാണ് രചനയും. 

സംവിധായകൻ തന്നെയാണ് എഡിറ്റിംഗും. തിരക്കഥയില്‍ കൂടെ പ്രവര്‍ത്തിച്ചട്ടുള്ള വിവേക് ഭരതനാണ് സംഭാഷണം എഴുതിയിരിക്കുന്നത്. അനീസ് നാടോടി കലാ സംവിധാനം.

ഈ മാസം ആറാം തിയതിയായിരുന്നു ഭാവനയുടെ ജന്മദിനം. സിനിമാ മേഖലയില്‍ നിന്നുള്ള നിരവധി പേരാണ് നടിക്ക് ആശംസകളുമായെത്തിയത്. 

താന്‍ കണ്ടിട്ടുള്ളതില്‍ വച്ച് ഏറ്റവും ശക്തയായ സ്ത്രീ എന്നായിരുന്നു മഞ്ജു വാര്യര്‍ ഭാവനയെ കുറിച്ച് പറഞ്ഞത്. "ചിത്രം മങ്ങിയതായിരിക്കാം, പക്ഷേ വികാരങ്ങൾ യഥാർത്ഥമാണ്. ജന്മദിനാശംസകൾ ഭാവന!!! ഞാൻ ഇതുവരെ കണ്ടിട്ടുള്ളതിൽ വച്ച് ഏറ്റവും ശക്തയായ സ്ത്രീയോട്! ഞാൻ നിന്നെ സ്നേഹിക്കുന്നു, നിനക്കത് അറിയാമെന്ന് എനിക്കറിയാം." സംയുക്ത വർമ്മയോടും ഭാവനയോടും ഒപ്പമുള്ള ചിത്രം പങ്കുവച്ചുകൊണ്ട് മഞ്ജു വാര്യര്‍ എഴുതി. 

ജിമ്മില്‍ വര്‍ക്കൗട്ട് ചെയ്യുന്നതിന്‍റെ വീഡിയോ മുമ്പ് സാമൂഹിക മാധ്യത്തിലൂടെ ഭാവന പങ്കുവെച്ചിരുന്നു. ഏറെ പേരാണ് വീഡിയോയ്ക്ക് പിന്തുണയുമായി എത്തിയത്. എല്ലാവര്‍ക്കും പ്രചോദനമേകുന്ന ഒരു വീഡിയോ എന്നായിരുന്നു സാമൂഹിക മാധ്യമങ്ങളില്‍ നിന്നുള്ള പ്രതികരണങ്ങള്‍. 

അഞ്ച് വര്‍ഷത്തെ നീണ്ട ഇടവേളയ്‍ക്ക് ശേഷമാണ് ഭാവന വീണ്ടുമൊരു മലയാള സിനിമയില്‍ നായികയായെത്തുന്നത്. ഇക്കാരലയളവില്‍ ഇതരഭാഷാ ചിത്രങ്ങളില്‍ ഭാവന അഭിനയിച്ചിരുന്നു. 

അഞ്ച് വര്‍ഷങ്ങള്‍ക്ക് ശേഷം മലയാള സിനിമയിലേക്കുള്ള ഭാവനയുടെ തിരിച്ച് വരവിനായി ആരാധകരും കാത്തിരിക്കുകയാണ്.