ലഖിംപൂർ ഖേരി; കൊല്ലപ്പെട്ട മാധ്യമപ്രവര്ത്തകന്റെ വീട്ടില് സിദ്ദു നിരാഹാര സമരത്തില്
First Published Oct 9, 2021, 2:33 PM ISTസംസ്ഥാന തെരഞ്ഞെടുപ്പ് അടുത്തിരിക്കെ ഉത്തര്പ്രദേശില് കേന്ദ്രമന്ത്രി അജയ് മിശ്രയുടെ മകന് ആശിശ് മിശ്ര കര്ഷകര്ക്ക് നേരെ വാഹനമോടിച്ച് കയറ്റി നാല് കര്ഷകരെ കൊലപ്പെടുത്തിയ കേസില് ആശിഷ് മിശ്രയെ (Asish Mishra) ക്രൈംബ്രാഞ്ച് ഓഫീസില് ചോദ്യം ചെയ്യുകയാണ്. അതിനിടെ പഞ്ചാബ് കോണ്ഗ്രസ് അധ്യക്ഷന് നവജ്യോത് സിംഗ് സിദ്ദു , അതെ സംഭവത്തിനിടെ കൊല്ലപ്പെട്ട മാധ്യമപ്രവര്ത്തകന്റെ വീട്ടില് അനിശ്ചിതകാല നിരാഹാരം തുടങ്ങി. സംഭവത്തില് അഞ്ച് പേരെ ഇതുവരെയായി യുപി പൊലീസ് കസ്റ്റഡിയില് എടുത്തു. ആശിശ് മിശ്രയേയും കസ്റ്റഡിയില് എടുത്തേക്കുമെന്നാണ് പുറത്ത് വരുന്ന സൂചനകള്. കൊലപാതകമടക്കമുള്ള വകുപ്പുകളാണ് കേന്ദ്രആഭ്യന്തര സഹമന്ത്രിയുടെ മകനെതിരെ ചുമത്തിയിരിക്കുന്നത്. കേസുകള് കെട്ടിച്ചമച്ചതാണെന്നും ചോദ്യം ചെയ്യലിനോട് സഹകരിക്കുമെന്നും ഇന്നലെ കേന്ദ്രമന്ത്രി അജയ് മിശ്ര മാധ്യമങ്ങളോട് പറഞ്ഞിരുന്നു. ചിത്രങ്ങള് പകര്ത്തിയത് ഏഷ്യാനെറ്റ് ന്യൂസ് ക്യാമറാമാന് വസിം സെയ്ദി.