പൗരത്വ നിയമഭേദഗതി: രാജ്യതലസ്ഥാനം നിശ്ചലം; പൊലീസ് വെടിവെപ്പില് രണ്ട് മരണം
First Published Dec 20, 2019, 9:42 AM IST
പൗരത്വ നിയമത്തിനെതിരെയുള്ള പ്രതിഷേധം നേരിടാനുള്ള പൊലീസ് നടപടികളെ തുടര്ന്ന് ദില്ലിയില് കനത്ത ഗതാഗതക്കുരുക്ക്. ദേശീയ തലസ്ഥാനത്തിന്റെ വിവിധ ഭാഗങ്ങളിലായി ലക്ഷക്കണക്കിന് വാഹനങ്ങളാണ് കുടുങ്ങി കിടക്കുന്നത്. കൂടുതല് പ്രതിഷേധക്കാര് സമരമുഖത്തേക്ക് എത്തുന്നത് തടയാന് ദില്ലി പൊലീസ് ഗതാഗതനിയന്ത്രണം ഏര്പ്പെടുത്തുകയും ചെയ്തതോടെയാണ് ദില്ലിയില് വാഹനങ്ങള് പെരുവഴിയില് കുടുങ്ങിയത്. എയര്ഹോസ്റ്റസുമാരും പൈലറ്റുമാരും അടക്കമുള്ള ജീവനക്കാര് ട്രാഫിക് ജാമില്പ്പെട്ടതോടെ ഇന്ഡിഗോ എയര്ലൈന്സിന്റെ 19 വിമാനങ്ങളും റദ്ദാക്കി. ഇതിനിടെ മംഗളൂരുവില് പൊലീസ് സ്റ്റേഷന് അക്രമിക്കാന് ശ്രമിച്ചെന്നാരോപിച്ച് പൊലീസ് നടത്തിയ വെടിവെപ്പില് രണ്ട് പേര് കൊല്ലപ്പെട്ടു.
പ്രതിഷേധം നിയന്തിക്കാനായി ദില്ലി പൊലീസ് ചെങ്കോട്ടയിലും മധ്യദില്ലിയിലെ ചില ഭാഗങ്ങളിലും നിരോധനാജ്ഞ പ്രഖ്യാപിച്ചിരുന്നു. പിന്നാലെ ഇവിടെ പ്രതിഷേധത്തില് പങ്കെടുക്കാനെത്തിയവരേയും പൊലീസ് കസ്റ്റഡിയില് എടുത്തു. പ്രതിഷേധക്കാരെ കണ്ടെത്താന് മേഖലയിലേക്ക് വന്ന എല്ലാ വാഹനങ്ങളും പൊലീസ് പരിശോധിച്ചിരുന്നു. എന്നിട്ടും പ്രതിഷേധക്കാര് എത്തുന്നത് തുടര്ന്നതോടെ പൊലീസ് ദില്ലിയിലേക്കുള്ള വിവിധ റോഡുകള് ബ്ലോക്ക് ചെയ്യുകയായിരുന്നു. കാണാം ദില്ലിയിലെ പ്രതിഷേധങ്ങള്.