പ്രളയമുന്നറിയിപ്പില് കേരളം; വടക്കന് മേഖലയില് വ്യാപക നാശനഷ്ടം
First Published Aug 6, 2020, 11:39 AM IST
തുടര്ച്ചയായ മൂന്നാമത്തെ വര്ഷവും മണ്സൂണ് കാലത്ത് കേരളത്തില് അതിവര്ഷം തുടരുകയാണ്. മലപ്പുറം, വയനാട്, കോഴിക്കോട് അടക്കമുള്ള മലബാര് മേഖലയില് കനത്ത മഴയാണ് പെയ്യുന്നത്. സംസ്ഥാനത്ത് കാലവര്ഷം ശക്തമായി തുടരുന്നു. വടക്കന് കേരളത്തിന് ഇന്ന് കനത്ത മഴക്ക് സാധ്യതയുണ്ടെന്ന് കാലാവസ്ഥ നിരീക്ഷണകേന്ദ്രം അറിയിച്ചു. കോഴിക്കോട്, വയനാട് ജില്ലകളില് റെഡ് അലര്ട്ട് പ്രഖ്യാപിച്ചു. എറണാകുളം മുതല് കാസര്കോട് വരെയുള്ള മറ്റ് വടക്കന് ജില്ലകളില് ഓറഞ്ച് അലര്ട്ടായിരിക്കും. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളില് യെല്ലോ അലര്ട്ടും പ്രഖ്യാപിച്ചിട്ടുണ്ട്. കേരള തീരത്ത് കാറ്റിന്റെ വേഗം 40 മുതല് 50 കി.മി. വരെയാകാന് സാധ്യതയുളളതിനാല് മത്സ്യത്തൊഴിലാളികള് കടലില് പോകരുതെന്നും കാലവസ്ഥ നിരീക്ഷണകേന്ദ്രം മുന്നറിയിപ്പ് നല്കിയിട്ടുണ്ട്. അതേസമയം, ദേശീയ ദുരന്തനിവാരണ സേനയുടെ രണ്ട് യൂണിറ്റുകള് ഇന്ന് കേരളത്തിലെത്തും. ഇന്നലെ നാല് എന്ഡിആര്എഫ് യൂണിറ്റുകള് സംസ്ഥാനത്ത് എത്തിയിരുന്നു.