തദ്ദേശത്തിലെ 'ന്യൂ ജൻ' തരംഗം; തെരഞ്ഞെടുപ്പ് ഫലം വൈബാക്കിയ ജെൻസികൾ, ഓഫ് റോഡ് റൈഡര്‍ മുതൽ വൈറൽ മുഖങ്ങൾ വരെ

സമൂഹ മാധ്യമങ്ങളിലെ ട്രോളുകൾക്ക് മാത്രം ഒതുങ്ങേണ്ടവരല്ല തങ്ങളെന്ന് തെളിയിച്ചിരിക്കുകയാണ് കേരളത്തിലെ ജെൻസി. തദ്ദേശ തെരഞ്ഞെടുപ്പിൽ, യാഥാസ്ഥിതിക ചിന്തകളെയും സിറ്റിങ് സീറ്റുകളെയും അട്ടിമറിച്ച്, ഭരണത്തിൻ്റെ ചുക്കാൻ പിടിക്കാൻ അവർ മുന്നോട്ട് വന്നിരിക്കുന്നു

വൈഷ്ണ സുരേഷ് : വോട്ടവകാശം തിരിച്ചുപിടിച്ച് ഇടത് കോട്ട തകർത്ത പോരാളി

മുട്ടടയിലെ 25 വർഷം പഴക്കമുള്ള ഇടത് കോട്ട തകർത്ത് വൈഷ്ണ സുരേഷ് നേടിയ വിജയം ഒരു രാഷ്ട്രീയ അട്ടിമറി എന്നതിലുപരി, വ്യക്തിഗത പോരാട്ടത്തിൻ്റെ വിജയഗാഥ കൂടിയാണ്. സ്ഥാനാർത്ഥിയായി പ്രഖ്യാപിക്കപ്പെട്ട ഉടൻ തന്നെ, മേൽവിലാസം സംബന്ധിച്ച സാങ്കേതിക പ്രശ്‌നങ്ങൾ ചൂണ്ടിക്കാട്ടി വൈഷ്ണയുടെ പേര് വോട്ടർ പട്ടികയിൽ നിന്ന് ഒഴിവാക്കാൻ നീക്കം നടന്നു. ഇത് തനിക്കെതിരെയുള്ള രാഷ്ട്രീയ നീക്കമാണെന്ന് ആരോപിച്ച വൈഷ്ണ, നിയമപോരാട്ടത്തിനായി ഹൈക്കോടതിയെ സമീപിച്ചു. കോടതി ഇടപെടലിലൂടെ വോട്ടവകാശം തിരികെ നേടിയ വൈഷ്ണ, അതേ വാർഡിൽ സിറ്റിങ് കൗൺസിലറെ 397 വോട്ടുകൾക്ക് പരാജയപ്പെടുത്തി. "സത്യം ജയിക്കും" എന്ന് പ്രഖ്യാപിച്ച ഈ ജെൻസി നേതാവ്, നിയമപരമായി എങ്ങനെ പ്രതിരോധം തീർക്കാമെന്ന് പുതിയ തലമുറയ്ക്ക് കാണിച്ചുകൊടുത്തു.

റിയ ചീരാംകുഴി : ഓഫ്-റോഡിൽ നിന്ന് ജനകീയ വഴിയിലേക്ക്

അധ്യാപിക, ഫാഷൻ ഡിസൈനർ എന്നീ റോളുകൾക്കൊപ്പം ഓഫ്-റോഡ് ജീപ്പ് ഡ്രൈവർ എന്ന സാഹസിക റോൾ കൂടി വഹിക്കുന്ന റിയ ചീരാംകുഴി, പാലാ നഗരസഭയിലെ ശ്രദ്ധാകേന്ദ്രമായിരുന്നു. പരമ്പരാഗത രാഷ്ട്രീയ മുഖങ്ങളിൽ നിന്ന് വ്യത്യസ്തമായി, സ്വന്തം താൽപ്പര്യങ്ങളിൽ ഉറച്ചുനിൽക്കുന്ന, സധൈര്യം പൊതുരംഗത്തേക്ക് കടന്നു വന്ന ജെൻസി പ്രതിനിധിയാണ് റിയ. ദുർഘടമായ ഓഫ്-റോഡ് പാതകളെ കീഴടക്കുന്ന അതേ ധൈര്യത്തോടെ ജനകീയ പ്രശ്നങ്ങളെ നേരിടാൻ റിയ തയ്യാറായിരുന്നു. റിയയുടെ ഈ വ്യത്യസ്തമായ പ്രൊഫൈൽ യുവ വോട്ടർമാർക്കിടയിൽ വലിയ ചലനം സൃഷ്ടിച്ചു.

ദിയ പുളിക്കക്കണ്ടം: കുടുംബ പാരമ്പര്യത്തിലെ പുതിയ കണ്ണി

പാലാ നഗരസഭയിൽ അടുത്തടുത്ത വാർഡുകളിൽ ഒരു കുടുംബത്തിലെ മൂന്ന് പേർ വിജയിച്ച കൗതുകകരമായ സംഭവമാണിത്. ഇതിലെ ഏറ്റവും പ്രായം കുറഞ്ഞതും ശ്രദ്ധേയവുമായ വിജയം ദിയ പുളിക്കക്കണ്ടത്തിൻ്റേതാണ്. സാമ്പത്തിക ശാസ്ത്രത്തിൽ ബിരുദധാരിയും എം.ബി.എ. പഠനത്തിന് ഒരുങ്ങുകയും ചെയ്യുന്ന ദിയ, തൻ്റെ പിതാവ് മുമ്പ് പ്രതിനിധീകരിച്ച വാർഡാണ് തിരിച്ചുപിടിച്ചത്. രാഷ്ട്രീയ പാരമ്പര്യം ഉണ്ടെങ്കിലും, കേവലം കുടുംബത്തിൻ്റെ തണലിലല്ല ദിയ വിജയിച്ചത്. വിദ്യാഭ്യാസം, സാങ്കേതിക പരിജ്ഞാനം, നിലവിലെ സാമൂഹ്യ വിഷയങ്ങളെക്കുറിച്ചുള്ള ആഴത്തിലുള്ള അറിവ് എന്നിവയോടെയാണ് ഈ ജെൻസി നേതാവ് ഭരണ രംഗത്തേക്ക് കടന്നുവരുന്നത്.

'ഒരു വോട്ട്' മതി ചരിത്രം തിരുത്താൻ: എൻകെ മുർഷിനയുടെ വിജയം

കേരളത്തിലെ തദ്ദേശ തെരഞ്ഞെടുപ്പിൽ, യുഡിഎഫ് കോട്ടകൾ തകർത്തുകൊണ്ട് ജെൻസി യുവത്വം അധികാരം പിടിച്ചെടുത്തതിലെ ഏറ്റവും ആവേശകരമായ കഥയാണ് മുർഷിനയുടേത്. ഇടത് പിന്തുണയോടെ മത്സരിച്ച സ്വതന്ത്ര സ്ഥാനാര്‍ത്ഥിയായിരുന്നു മുർഷിന. കേവലം ഒരു വോട്ടിൻ്റെ മാത്രം ഭൂരിപക്ഷത്തിൽ വിജയിച്ച്, 20 വർഷമായി കൈവിട്ടുപോയ വാനിമേൽ പഞ്ചായത്ത് ഭരണം ഇടതുമുന്നണിക്ക് തിരികെ നൽകിയ ഈ യുവനേതാവാണ് ഇന്ന് രാഷ്ട്രീയത്തിലെ താരം.

 ഈ വാർഡിലെ വിജയം ഉറപ്പിക്കാൻ എൽ.ഡി.എഫ് നടത്തിയ പോരാട്ടത്തിൽ മുർഷിനയുടെ പ്രകടനം നിർണ്ണായകമായിരുന്നു. യുഡിഎഫിൻ്റെ ഉറച്ച കോട്ടയായിരുന്ന വാണിമേൽ പഞ്ചായത്തിൽ ഭരണം പിടിച്ചെടുക്കാൻ ഇടതുമുന്നണിക്ക് സാധിച്ചത്, മുർഷിനയുടെ തീവ്രമായ പ്രചാരണത്തിൻ്റെയും യുവതലമുറയിലെ സ്വാധീനത്തിൻ്റെയും ഫലമാണ്.'ഓരോ വോട്ടും നിർണ്ണായകം' എന്ന ജനാധിപത്യ തത്വം കേരളത്തിലെ യുവത എത്രത്തോളം ഗൗരവത്തോടെ കാണുന്നു എന്നതിൻ്റെ ഉദാഹരണമാണ് മുർഷിനയുടെ വിജയം. ഈ ഒരു വോട്ട്, പഞ്ചായത്തിൻ്റെ ഭരണസമിതിയെ തന്നെ മാറ്റിമറിച്ചു.

നവ്യ സി. സന്തോഷ് : ഇരിട്ടിയിലെ ഏറ്റവും പ്രായം കുറഞ്ഞ കൗൺസിലർ

ഇരിട്ടി നഗരസഭയിലെ ഏറ്റവും പ്രായം കുറഞ്ഞ കൗൺസിലറാണ് നവ്യ സി. സന്തോഷ്. വെറും 22-ാം വയസ്സിൽ നഗരസഭയുടെ ഭരണരംഗത്തേക്ക് കടന്നുവന്ന നവ്യ, ചെറുപ്പം മുതലേ സംഘടനാ രംഗത്ത് സജീവമായിരുന്നു. കോളേജ് യൂണിയൻ തെരഞ്ഞെടുപ്പിലെ യു.യു.സി. എന്ന പദവി മുതൽ ബാലസംഘം, എസ്.എഫ്.ഐ., ഡി.വൈ.എഫ്.ഐ. എന്നിവയിലെ നേതൃസ്ഥാനങ്ങൾ വരെ വഹിച്ച ഈ യുവനേതാവ്, തൻ്റെ കന്നിയങ്കത്തിൽ തന്നെ വട്ടക്കയം വാർഡിൽ വിജയം ഉറപ്പിച്ചു. സംഘടനാ മികവും യുവത്വത്തിൻ്റെ ഊർജ്ജവും നവ്യയുടെ വിജയത്തിന് കരുത്തായി.