പേരില്ലാ പെണ്‍ കടുവയില്‍ നിന്ന് 'വൈഗ'യിലേക്ക്; അതിനിടെ ഒരു ഓട്ടത്തിന്‍റെ കഥയും !
First Published Nov 3, 2020, 10:22 AM ISTകൂട് പൊളിച്ച് ചാടിയാലെന്താ, അവള്‍ക്കിന്നൊരു പേരുണ്ട് വൈഗ ! വരൂ, വൈഗയുടെ കഥ കേള്‍ക്കാം. മൂന്ന് മാസത്തോളം സൗത്ത് വയനാട് ഫോറസ്റ്റ് ഡിവിഷന് കീഴിലെ ചെതലയം റെയ്ഞ്ചിൽ വരുന്ന ചീയമ്പം 73 ആദിവാസി കോളനിയിലും, ആനപ്പന്തി, ചെട്ടി പാമ്പ്ര, തുടങ്ങിയ സ്ഥലങ്ങളെയും വിറപ്പിച്ച പത്ത് വയസ്സുള്ള പെൺ കടുവയെ ഒടുവില്‍ വനം വകുപ്പ് പിടികൂടി. വനം വകുപ്പിന്‍റെ വലയില്‍ വീഴും മുമ്പ് 12 വളര്‍ത്ത് മൃഗങ്ങളെ കടുവ തീര്‍ത്തിരുന്നു. ഒരു യുവാവിനും കടുവയുടെ അക്രമണത്തില്‍ പരിക്കേറ്റിരുന്നു. ജനരോഷം ശമിപ്പിക്കാന്‍ കടുവയെ പിടി കൂടിയ വനം വകുപ്പ് പക്ഷേ പുലിവാല് പിടിച്ചത് പിന്നീടാണ്. കടുവയെ എവിടെ ഉപേക്ഷിക്കണമെന്നകാര്യത്തിലായിരുന്നു തര്‍ക്കം. തര്‍ക്കത്തെ തുടര്‍ന്ന് നാലുദിവസം ഇരുളത്തെ ഫോറസ്റ്റ് സ്‌റ്റേഷന്‍ പരിസരത്തെ കൂട്ടില്‍ ബന്ധിതനായി കടുവ കിടന്നു. വയനാട്ടിലെവിടെ തുറന്ന് വിട്ടാലും ജനങ്ങള്‍ വനം വകുപ്പിനെതിരെ തിരിയുമെന്നതായിരുന്നു പ്രശ്നം.