നിക്ഷേപകര്‍ക്ക് തിരിച്ചടി; എസ്ബിഐയും എച്ച്ഡിഎഫ്‌സിയും ഉള്‍പ്പെടെ പ്രമുഖ ബാങ്കുകള്‍ എഫ്ഡി പലിശ നിരക്ക് കുറച്ചു

റിസര്‍വ് ബാങ്ക് റിപ്പോ നിരക്കില്‍ കുറവ് വരുത്തിയതിന് പിന്നാലെയാണ് എസ്.ബി.ഐ, എച്ച്.ഡി.എഫ്.സി, ഐ.സി.ഐ.സി.ഐ, ആക്‌സിസ്, കാനറ ബാങ്ക് എന്നിവ പലിശ നിരക്കുകള്‍ പരിഷ്‌കരിച്ചത്

രാജ്യത്തെ പ്രമുഖ പൊതുമേഖല-സ്വകാര്യ ബാങ്കുകള്‍ സ്ഥിരനിക്ഷേപങ്ങളുടെ പലിശ നിരക്ക് കുറച്ചു. റിസര്‍വ് ബാങ്ക് റിപ്പോ നിരക്കില്‍ കുറവ് വരുത്തിയതിന് പിന്നാലെയാണ് എസ്.ബി.ഐ, എച്ച്.ഡി.എഫ്.സി, ഐ.സി.ഐ.സി.ഐ, ആക്‌സിസ്, കാനറ ബാങ്ക് എന്നിവ പലിശ നിരക്കുകള്‍ പരിഷ്‌കരിച്ചത്.ഡിസംബര്‍ 5-ന് നടന്ന വായ്പാ അവലോകന യോഗത്തില്‍ ആര്‍.ബി.ഐ റിപ്പോ നിരക്ക് 5.50 ശതമാനത്തില്‍ നിന്ന് 5.25 ശതമാനമായി കുറച്ചിരുന്നു. ഇതിന്റെ ചുവടുപിടിച്ചാണ് ബാങ്കുകളും നിക്ഷേപ പലിശയില്‍ മാറ്റം വരുത്തിയത്.

ബാങ്കുകളിലെ പുതിയ നിരക്കുകള്‍ :

എസ്.ബി.ഐ (ഡിസംബര്‍ 15 മുതല്‍): രണ്ട് വര്‍ഷം മുതല്‍ മൂന്ന് വര്‍ഷം വരെയുള്ള നിക്ഷേപങ്ങള്‍ക്ക് സാധാരണക്കാര്‍ക്ക് 6.40 ശതമാനമാണ് പുതിയ പലിശ. മുതിര്‍ന്ന പൗരന്മാര്‍ക്ക് ഇത് 6.90 ശതമാനമായിരിക്കും.

എച്ച്.ഡി.എഫ്.സി ബാങ്ക് (ഡിസംബര്‍ 17 മുതല്‍): 18 മാസം മുതല്‍ 21 മാസം വരെയുള്ള നിക്ഷേപങ്ങള്‍ക്ക് പലിശയില്‍ 0.15 ശതമാനം കുറവ് വരുത്തി. സാധാരണക്കാര്‍ക്ക് 6.45 ശതമാനവും മുതിര്‍ന്ന പൗരന്മാര്‍ക്ക് 6.95 ശതമാനവുമാണ് പുതിയ നിരക്ക്.

ഐ.സി.ഐ.സി.ഐ ബാങ്ക് (ഡിസംബര്‍ 18 മുതല്‍): നിക്ഷേപ കാലാവധി അനുസരിച്ച് സാധാരണക്കാര്‍ക്ക് 2.75% മുതല്‍ 6.60% വരെയും മുതിര്‍ന്ന പൗരന്മാര്‍ക്ക് 3.25% മുതല്‍ 7.20% വരെയുമാണ് പലിശ ലഭിക്കുക.

ആക്‌സിസ് ബാങ്ക് (ഡിസംബര്‍ 18 മുതല്‍): സാധാരണക്കാര്‍ക്ക് 3.00% മുതല്‍ 6.60% വരെയും മുതിര്‍ന്ന പൗരന്മാര്‍ക്ക് 3.50% മുതല്‍ 7.35% വരെയും പലിശ നല്‍കും.

കാനറ ബാങ്ക് (ഡിസംബര്‍ 8 മുതല്‍): കാനറ ബാങ്ക് തങ്ങളുടെ ഉയര്‍ന്ന പലിശ നിരക്ക് 6.50 ശതമാനത്തില്‍ നിന്നും 6.15 ശതമാനമായി കുറച്ചു. 555 ദിവസത്തെ നിക്ഷേപങ്ങള്‍ക്കാണ് ഈ നിരക്ക് ബാധകം.

എന്തുകൊണ്ട് ഈ മാറ്റം?

ബാങ്കുകള്‍ക്ക് റിസര്‍വ് ബാങ്ക് നല്‍കുന്ന വായ്പയുടെ പലിശയാണ് റിപ്പോ നിരക്ക്. റിപ്പോ നിരക്ക് കുറയുമ്പോള്‍ ബാങ്കുകളുടെ വായ്പാ ചെലവ് കുറയും. ഇത് സാധാരണയായി ഭവന, വാഹന വായ്പകളുടെ പലിശ കുറയാന്‍ സഹായിക്കുമെങ്കിലും, ബാങ്കുകള്‍ ചെലവ് കുറയ്ക്കുന്നതിനായി നിക്ഷേപ പലിശയും കുറയ്ക്കാറുണ്ട്.

പുതിയ നിരക്കുകള്‍ പുതുതായി നിക്ഷേപം നടത്തുന്നവര്‍ക്കും കാലാവധി കഴിഞ്ഞ് പുതുക്കുന്നവര്‍ക്കും മാത്രമേ ബാധകമാകൂ. നിലവിലുള്ള നിക്ഷേപങ്ങളുടെ പലിശയില്‍ മാറ്റമുണ്ടാകില്ല. മുതിര്‍ന്ന പൗരന്മാര്‍ക്ക് ഇപ്പോഴും സാധാരണക്കാരേക്കാള്‍ കൂടുതല്‍ പലിശ എല്ലാ ബാങ്കുകളും വാഗ്ദാനം ചെയ്യുന്നുണ്ട്. വരും ദിവസങ്ങളില്‍ കൂടുതല്‍ ബാങ്കുകള്‍ പലിശ നിരക്ക് കുറയ്ക്കാന്‍ സാധ്യതയുണ്ടെന്നാണ് വിലയിരുത്തുന്നത്