പഞ്ചാബിൽ ഇഡി സംഘത്തിന് നേരെ ആക്രമണം; ഉദ്യോഗസ്ഥർ റെയ്ഡിനെത്തിയ വാഹനം തകർത്ത് എഎപി പ്രവർത്തകർ

പഞ്ചാബിലെ മൊഹാലിയിൽ പരിശോധനയ്ക്ക് എത്തിയ ഇഡി ഉദ്യോഗസ്ഥർക്ക് നേരെ ആം ആദ്മി പ്രവർത്തകരുടെ ആക്രമണം. നിയമസഭാ തെരഞ്ഞെടുപ്പ് മുന്നിൽക്കണ്ട് കേന്ദ്ര സർക്കാർ വേട്ടയാടുകയാണെന്നാണ് എഎപി പ്രവർത്തകരുടെ ആരോപണം.

ചണ്ഡിഗഡ്: പഞ്ചാബിൽ ഇഡി സംഘത്തിന് നേരെ ആം ആദ്മി പ്രവർത്തകരുടെ ആക്രമണം. ഉദ്യോഗസ്ഥർ എത്തിയ വാഹനം പ്രവർത്തകർ തകർത്തു. ഗ്രേറ്റർ മൊഹാലി ഏരിയ ഡെവലപ്‌മെന്‍റ് അതോറിറ്റി (ജി എം ഡി എ) ഓഫീസിൽ പരിശോധനയ്ക്ക് എത്തിയതായിരുന്നു സംഘം. കള്ളപ്പണം വെളുപ്പിക്കൽ, കുടിശ്ശിക ഒഴിവാക്കൽ, ഭൂമി തരംമാറ്റ ലംഘനങ്ങൾ എന്നിവ അന്വേഷിക്കാൻ എത്തിയ സംഘത്തെയാണ് എ എ പി പ്രവർത്തകർ ആക്രമിച്ചത്.

ഇഡി റെയ്ഡ് മൂന്നാം ദിവസത്തിൽ എത്തിയപ്പോഴാണ് ആൾക്കൂട്ടം അക്രമാസക്തരായത്. ഇഡി ഉദ്യോഗസ്ഥർ എത്തിയ വാഹനത്തിന്‍റെ ടയറുകൾ കുത്തിക്കീറുകയും ചില്ലുകൾ തകർക്കുകയും ചെയ്തു. പ്രതിഷേധക്കാർ പൊലീസ് ബാരിക്കേഡുകൾ തകർത്ത് ഓഫീസിലേക്ക് ഇരച്ചെത്തുകയായിരുന്നു. തുടർന്ന് സീനിയർ പൊലീസ് സൂപ്രണ്ട് (എസ് എസ് പി) വരുൺ ശർമയുടെ നേതൃത്വത്തിലെത്തിയ പൊലീസ് സംഘം പ്രതിഷേധക്കാരെ നേരിട്ടു.

നിയമസഭാ തെരഞ്ഞെടുപ്പിന് മുന്നോടിയായി കേന്ദ്ര സർക്കാരും അന്വേഷണ ഏജൻസികളും സംസ്ഥാന സർക്കാരിനെ വേട്ടയാടുകയാണെന്ന് പ്രതിഷേധക്കാർ ആരോപിച്ചു. മുൻ മന്ത്രി സത്യേന്ദ്ര ജെയിന്‍റെ ചണ്ഡിഗഡിലെ വീട്ടിൽ ഇഡി റെയ്ഡ് നടത്തിയത് പ്രവർത്തകരെ പ്രകോപിപ്പിച്ചു. സത്യേന്ദ്ര ജെയിൻ സ്ഥലത്തില്ലാത്തപ്പോൾ വീടിന്‍റെ പൂട്ട് തകർത്താണ് ഇഡി സംഘം അകത്തു കയറിയതെന്ന് ആരോപണം ഉയർന്നു. റെയ്ഡിനിടെ തദ്ദേശ സ്വയംഭരണ വകുപ്പ് ഉദ്യോഗസ്ഥരെ അനധികൃതമായി തടഞ്ഞു വെച്ചിരിക്കുകയാണെന്ന് ആരോപിച്ച് ഹൈക്കോടതിയിൽ ഹേബിയസ് കോർപ്പസ് ഹർജി എത്തി. റെയ്ഡിൽ എന്തെങ്കിലും കണ്ടെത്തിയിട്ടുണ്ടോ എന്ന് ഇഡി ഉദ്യോഗസ്ഥർ വ്യക്തമാക്കിയിട്ടില്ല.