കൊറോണക്കാലത്തെ വിനായക ചതുര്‍ത്ഥി; 'സാനിട്ടൈസര്‍ ഗണേശ വിഗ്രഹ'ങ്ങളുമായി മുംബൈ ആര്‍ട്ടിസ്റ്റ്

ഈ വർഷം കൊവിഡ് 19 വ്യാപനത്തെ കണക്കിലെടുത്താണ് ഈ ​ഗണേശവി​ഗ്രഹങ്ങളിൽ ഇത്തരമൊരു മാറ്റം കൊണ്ടുവന്നിരിക്കുന്നതെന്ന് പ്രഞ്ജാൽ ആർട്ട് സെന്ററിലെ ആർട്ടിസ്റ്റായ നിതിൻ രാംദാസ് ചൗധരി എഎൻഐയോട് വ്യക്തമാക്കി.   

മുംബൈ: ​ഗണേശ ചതുർത്ഥി ദിനാഘോഷങ്ങളോട് അനുബന്ധിച്ച് സാനിട്ടൈസർ ​ഗണേശ വി​ഗ്രഹം നിർമ്മിച്ചിരിക്കുകയാണ് മുംബൈയിലെ ​ഗട്കാപൂർ പ്രദേശത്തുള്ള ആർട്ടിസ്റ്റ്. ഗണേശ വി​ഗ്രഹത്തിനുള്ളിൽ സെൻസര്‍ മെഷീനുകൾ ഘടിപ്പിച്ചിരിക്കുകയാണ്. വി​ഗ്രഹത്തിന് താഴെ കൈകൾ നീട്ടുമ്പോൾ സാനിട്ടൈസർ ലഭിക്കും. എല്ലാവർഷവും നൂതനവും വ്യത്യസ്തവുമായ രീതിയിൽ വി​ഗ്രഹങ്ങൾ നിർമ്മിക്കാറുണ്ട്. ഈ വർഷം കൊവിഡ് 19 വ്യാപനത്തെ കണക്കിലെടുത്താണ് ഈ ​ഗണേശവി​ഗ്രഹങ്ങളിൽ ഇത്തരമൊരു മാറ്റം കൊണ്ടുവന്നിരിക്കുന്നതെന്ന് പ്രഞ്ജാൽ ആർട്ട് സെന്ററിലെ ആർട്ടിസ്റ്റായ നിതിൻ രാംദാസ് ചൗധരി എഎൻഐയോട് വ്യക്തമാക്കി. 

'​ഗണപതി എല്ലാ വിഘ്നങ്ങളും പ്രതിസന്ധികളും പരിഹരിക്കുന്നു എന്ന് ഞങ്ങൾ വിശ്വസിക്കുന്നു. അതുകൊണ്ടാണ് വി​ഗ്രഹത്തിൽ സാനിട്ടൈസർ ഘടിപ്പിച്ചത്. ​ഗണപതി ഭ​ഗവാൻ ഈ വൈറസിനെ നമ്മിൽ നിന്നും മാറ്റുമെന്നതിന്റെ പ്രതീകമാണിത്. ഭക്തർ വി​ഗ്രഹത്തിന് അടുത്തെത്തുമ്പോൾ സ്വാഭാവികമായി തന്നെ അവർക്ക് സാനിട്ടൈസർ ലഭിക്കും. സർക്കാരും അധികൃതരും കഠിനമായി പരിശ്രമിച്ചിട്ടും കൊവിഡ് വ്യാപനം കുറയുന്നില്ല.' ചൗധരി പറഞ്ഞു. 

കൊവിഡ് ബാധയെ തുടർന്ന് ഈ വർ‌ഷം വി​ഗ്രഹ വിൽപന കുറവാണെങ്കിലും ഇത്തരം സവിശേഷമായ വി​ഗ്രഹങ്ങളിൽ ജനങ്ങൾ ആ​ഗ്രഹം പ്രകടിപ്പിക്കുന്നുണ്ടെന്നും വിൽപനയിൽ വർദ്ധനവുണ്ടെന്നും അദ്ദേഹം കൂട്ടിച്ചേർത്തു. മൂന്ന് വി​ഗ്രഹങ്ങൾ മാത്രമാണ് ഇപ്പോൾ നിർമ്മിച്ചത്. എന്നാൽ ഇത്തരം വി​ഗ്രഹങ്ങൾക്ക് ജനങ്ങൾ‌ ആ​ഗ്രഹം പ്രകടിപ്പിക്കുന്നതിനാൽ കൂടുതൽ നിർമ്മിക്കാനാണ് തീരുമാനം. ഓ​ഗസ്റ്റ് 22 നാണ് പത്ത് ദിവസം നീണ്ടുനിൽക്കുന്ന ​ഗണേശ ചതുർത്ഥി ആഘോഷങ്ങൾ ആരംഭിക്കുന്നത്.