മംഗളൂരുവിന് സമീപം ചരക്ക് കപ്പൽ മുങ്ങി; കുതിച്ചെത്തി ഇന്ത്യൻ കോസ്റ്റ് ഗാര്‍ഡ്, 6 പേരെ രക്ഷപ്പെടുത്തി

എം എസ് വി സലാമത്ത് എന്ന ചരക്ക് കപ്പലാണ് അപകടത്തിൽപ്പെട്ടത്. 

മം​ഗളൂരു: മം​ഗളൂരുവിന് സമീപം മുങ്ങിയ ചരക്ക് കപ്പലിലെ ആറ് ജീവനക്കാരെ രക്ഷപ്പെടുത്തി ഇന്ത്യൻ കോസ്റ്റ് ഗാർഡ്. മം​ഗളൂരുവിന് തെക്ക് പടിഞ്ഞാറ് ഏകദേശം 60-70 നോട്ടിക്കൽ മൈൽ അകലെ എം എസ് വി സലാമത്ത് എന്ന ചരക്ക് കപ്പലാണ് മുങ്ങിയത്. മെയ് 12 ന് മം​ഗളൂരു തുറമുഖത്ത് നിന്ന് ലക്ഷദ്വീപിലെ കാദ്മത്ത് ദ്വീപിലേക്കുള്ള യാത്രാമധ്യേ എം എസ് വി സലാമത്ത് മെയ് 14 ന് പുലർച്ചെ 05:30 ഓടെ മുങ്ങിയതായാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്. 

മെയ് 14 ന് ഉച്ചയ്ക്ക് 12:15 ഓടെ കർണാടകയിലെ സൂറത്ത്കൽ തീരത്ത് നിന്ന് ഏകദേശം 52 നോട്ടിക്കൽ മൈൽ അകലെ ആറ് പേരുള്ള ഒരു ചെറിയ ബോട്ട് കണ്ടതായി എംടി എപ്പിക് സുസുയി എന്ന ട്രാൻസിറ്റ് കപ്പലിൽ നിന്ന് കോസ്റ്റ് ​ഗാർഡിന് അപകട മുന്നറിയിപ്പ് ലഭിച്ചു. പ്രദേശത്ത് പതിവ് പട്രോളിംഗ് നടത്തുകയായിരുന്ന കോസ്റ്റ് ​ഗാർഡ് ഷിപ്പ് വിക്രം ഉടൻ തന്നെ അപകട സ്ഥലത്തേക്ക് വഴിതിരിച്ചുവിട്ടു. തുടർന്ന് ഡിങ്കി ബോട്ടിലുണ്ടായിരുന്ന ആറ് പേരെയും വേഗത്തിൽ കണ്ടെത്തി രക്ഷപ്പെടുത്തുകയായിരുന്നു. സിമന്റും നിർമ്മാണ സാമഗ്രികളും ഉൾപ്പെടെയുള്ള ചരക്കാണ് കപ്പൽ വഹിച്ചിരുന്നത്. എന്നാൽ, വെള്ളപ്പൊക്കത്തിന്റെ കൃത്യമായ കാരണം ഇതുവരെ കണ്ടെത്തിയിട്ടില്ല. 

ഇസ്മായിൽ ഷരീഫ്, അലേമുൻ അഹമ്മദ് ഭായ് ഗാവ്ദ, കാക്കൽ സുലെമാൻ ഇസ്മായിൽ, അക്ബർ അബ്ദുൾ സുരാനി, കസം ഇസ്മായിൽ മേപാനി, അസ്മൽ എന്നിവരെയാണ് രക്ഷപ്പെടുത്തിയത്. വിജയകരമായ രക്ഷാപ്രവർത്തനത്തിന് ശേഷം, രക്ഷപ്പെട്ടവരെ പ്രഥമ ശുശ്രൂഷ നൽകി സുരക്ഷിതമായി ന്യൂ മം​ഗളൂരു തുറമുഖത്തേക്ക് കൊണ്ടുപോയി. കപ്പൽ മുങ്ങാനുള്ള സാഹചര്യങ്ങൾ കണ്ടെത്തുന്നതിനായി അപകടത്തിൽ നിന്ന് രക്ഷപ്പെട്ട ജീവനക്കാരുമായി സംസാരിക്കുമെന്ന് അധികൃതർ അറിയിച്ചു.