പോലീസ് വിലക്കുകൾ മറികടന്ന് 'ലെഹ്‌രാ ദോ തിരംഗ' മാർച്ച് വിജയം കണ്ടെന്ന് സി.ജെ.പി; അഭിജിത് ദീപ്കെയുടെ അറസ്റ്റിൽ പ്രതിഷേധം ശക്തം

കോക്ക്റോച്ച് ജനതാ പാർട്ടി ഡൽഹിയിൽ സംഘടിപ്പിച്ച 'ലെഹ്‌രാ ദോ തിരംഗ' കാമ്പയിനിടെ സ്ഥാപകൻ അഭിജിത് ദീപ്കെയെ പോലീസ് കസ്റ്റഡിയിലെടുത്തു. അറസ്റ്റ് വകവെക്കാതെ ജനങ്ങൾ തടിച്ചുകൂടി ദേശീയ പതാക ഉയർത്തി. തിരഞ്ഞെടുപ്പ് പരിഷ്കാരങ്ങൾ ആവശ്യപ്പെട്ടുള്ള പ്രതിഷേധത്തിൽ പങ്കെടുത്തവരെ വിട്ടയക്കണമെന്ന് ആനി രാജ ഉൾപ്പെടെയുള്ള നേതാക്കൾ ആവശ്യപ്പെട്ടു.

ന്യൂഡൽഹി: കൊണാട്ട് പ്ലേസിലെ സെൻട്രൽ പാർക്കിൽ കോക്ക്റോച്ച് ജനതാ പാർട്ടി സംഘടിപ്പിച്ച 'ലെഹ്‌രാ ദോ തിരംഗ' കാമ്പയിൻ വൻ വിജയമെന്ന് കോക്രോച്ച് ജനതാ പാര്‍ട്ടി. സിജെപി സ്ഥാപകനും ദേശീയ കൺവീനറുമായ അഭിജിത് ദീപ്കെയെ പൊലീസ് നിയമവിരുദ്ധമായി കസ്റ്റഡിയിലെടുത്തെങ്കിലും, വൻതോതിൽ ജനങ്ങൾ തടിച്ചുകൂടി ദേശീയ പതാക ഉയർത്തി. അഭിജിത് ദീപ്കെയെ രാവിലെ വസതിയിൽ വെച്ച് തനിയെ നടക്കുന്നതിനിടയിലാണ് പോലീസ് കസ്റ്റഡിയിലെടുത്തത്. അറസ്റ്റിലായി മണിക്കൂറുകൾ കഴിഞ്ഞിട്ടും അദ്ദേഹത്തെ പാർപ്പിച്ചിരിക്കുന്ന കൃത്യമായ സ്ഥലം കുടുംബാംഗങ്ങൾക്കോ നിയമ സംഘത്തിനോ പോലീസ് ഇതുവരെ വെളിപ്പെടുത്തിയിട്ടില്ല.

തിരഞ്ഞെടുപ്പ് കമ്മീഷന്റെ പ്രവർത്തനത്തിലും നിയമനങ്ങളിലും പരിഷ്കാരങ്ങൾ ആവശ്യപ്പെട്ട് ജനങ്ങൾ തെരുവിൽ ഇറങ്ങുന്നതിൽ നിന്ന് ഇത്തരം അറസ്റ്റുകൾക്ക് തടയാനാകില്ലെന്ന് പാർട്ടി വ്യക്തമാക്കി. ദേശീയ പതാകയേന്തി സമാധാനപരമായി പ്രതിഷേധിച്ച വിദ്യാർത്ഥികൾക്കും യുവാക്കൾക്കും പൊതുജനങ്ങൾക്കുമെതിരെ പോലീസ് നടത്തിയ അതിക്രമങ്ങളുടെ വീഡിയോ തെളിവുകളും പാർട്ടി പുറത്തുവിട്ടിട്ടുണ്ട്. അഭിജിത് ദീപ്കെയെ എവിടെയാണ് പാർപ്പിച്ചിരിക്കുന്നത് എന്ന വിവരം ഉടൻ വെച്ച് പുറത്തുവിടണമെന്നും അദ്ദേഹത്തെ വിട്ടയക്കണമെന്നും സമഗ്രമായ തിരഞ്ഞെടുപ്പ് പരിഷ്കാരങ്ങൾ നടപ്പിലാക്കണമെന്നും സി.ജെ.പി ആവശ്യപ്പെട്ടു.

അതിനിടെ, നേഹ ബോറ ഉൾപ്പെടെയുള്ള കസ്റ്റഡിയിലായ മുഴുവൻ ആളുകളെയും വിട്ടയക്കണമെന്ന് ആവശ്യപ്പെട്ട് ആനി രാജ അടക്കമുള്ള വനിതാ നേതാക്കൾ പാർലമെന്റ് സ്ട്രീറ്റ് പോലീസ് സ്റ്റേഷനിലെത്തി ദില്ലി പോലീസ് ഉദ്യോഗസ്ഥരെ കണ്ട് ശക്തമായ ആവശ്യം ഉന്നയിച്ചിട്ടുണ്ട്.