സംസ്ഥാനത്ത് 39 പേര്‍ക്ക് കൂടി കൊവിഡ്, ആകെ 164 രോഗികള്‍; നിയന്ത്രണങ്ങള്‍ ശക്തമാക്കും: മുഖ്യമന്ത്രി |Live

കൊവിഡ് 19 ലോകമാകെ പടര്‍ന്ന സാഹചര്യത്തില്‍ സാമ്പത്തികാവസ്ഥ മാന്ദ്യകാലമായ 2008-2009നേക്കാള്‍ മോശമാകുമെന്ന് ഐഎംഎഫ് മേധാവി ക്രിസ്റ്റീന ജിയോര്‍ജിവ പറഞ്ഞു. കാര്യങ്ങള്‍ വ്യക്തമാണ്. നമ്മള്‍ മാന്ദ്യത്തിലേക്ക് കടന്നു. ഇങ്ങനെ തുടരുകയാണെങ്കില്‍ ആഗോള സാമ്പത്തിക മാന്ദ്യം നേരിട്ട 2009നേക്കാള്‍ കാര്യങ്ങള്‍ മോശമാകും. ലോകരാജ്യങ്ങളിലെ സാമ്പദ് വ്യവസ്ഥ പൊടുന്നനെ നിശ്ചലമായിരിക്കുകയാണ്.  വിപണിയെ ഉത്തേജിപ്പിക്കുന്നതിനായി കുറഞ്ഞത് രണ്ട് ലക്ഷം കോടി ഡോളറെങ്കിലും വേണ്ടി വരുമെന്നും അവര്‍ വാര്‍ത്താസമ്മേളനത്തില്‍ പറഞ്ഞു.

സൗദി അറേബ്യയില്‍ വെള്ളിയാഴ്ച കൊവിഡ് ബാധിച്ച് പുതിയ മരണങ്ങളൊന്നും റിപ്പോര്‍ട്ട് ചെയ്തില്ല. എന്നാല്‍ പുതുതായി 92 പേര്‍ക്ക് രോഗമുണ്ടെന്ന് കണ്ടെത്തി. ഇതോടെ രാജ്യത്ത് ആകെ രോഗികളുടെ എണ്ണം 1104 ആയി ഉയര്‍ന്നതായി സൗദി ആരോഗ്യമന്ത്രാലയ വക്താവ് ഡോ. മുഹമ്മദ് അബ്ദുല്‍ അലി വാര്‍ത്താസമ്മേളനത്തില്‍ അറിയിച്ചു

വയനാട് ജില്ലയില്‍ കൊവിഡ് 19 പ്രതിരോധത്തിന്റെ ഭാഗമായി നിരീക്ഷണത്തില്‍ കഴിയുന്നവരുടെ എണ്ണം അയ്യായിരത്തോട് അടുക്കുന്നു. 1355 പേര്‍ കൂടി ഇന്ന് നിരീക്ഷണത്തിലായി. ഇതോടെ നിലവില്‍ നിരീക്ഷണത്തില്‍ കഴിയുവരുടെ എണ്ണം 4281 ആയി. അഞ്ച് പേര്‍  ആശുപത്രിയില്‍  നിരീക്ഷണത്തിലുണ്ട്. 63 സാമ്പിളുകള്‍ പരിശോധനക്ക് അയച്ചതില്‍ 43 സാമ്പിളുകളുടെ ഫലം നെഗറ്റീവാണ്. 19 ഫലം ലഭിക്കുവാനുണ്ട്

ലോക്ക്ഡൗണിന്റെ സാഹചര്യത്തില്‍ രാജ്യത്തിന്റെ വിവിധ ഭാഗങ്ങളിലെ വിദ്യാഭ്യാസ സ്ഥാപനങ്ങളില്‍ താമസിച്ചു പഠിക്കുന്ന  വിദ്യാര്‍ഥികള്‍ക്ക് ആവശ്യമായ സൗകര്യങ്ങളും സഹായവും നല്‍കണമെന്ന് അഭ്യര്‍ത്ഥിച്ച് രാഹുല്‍ ഗാന്ധി. ഇക്കാര്യം ചൂണ്ടിക്കാട്ടി മാനവവിഭവശേഷി മന്ത്രി ഡോ. രമേശ് പൊഖ്രിയാലിന് കത്തയച്ചു

സംസ്ഥാനത്തെ കൊവിഡ് പ്രതിരോധ പ്രവർത്തനങ്ങൾ പ്രധാനമന്ത്രി നരേന്ദ്രമോദി വിലയിരുത്തി. മുഖ്യമന്ത്രി പിണറായി വിജയനാണ് ഇക്കാര്യം അറിയിച്ചത്. വെള്ളിയാഴ്ച രാവിലെ പ്രധാനമന്ത്രി തന്നെ ഫോണിൽ ബന്ധപ്പെട്ടെന്നും സംസ്ഥാനത്തെ നിലവിലെ സ്ഥിതിഗതികളും കൊവിഡ് പ്രതിരോധ പ്രവർത്തനങ്ങളും വിലയിരുത്തിയതായും മുഖ്യമന്ത്രി അറിയിച്ചു. കൊവിഡ് വൈറസ് വ്യാപനത്തിനെതിരെ സംസ്ഥാനം ഇതുവരെ സ്വീകരിച്ച നടപടികളിൽ പ്രധാനമന്ത്രി മതിപ്പ് അറിയിച്ചെന്നും മുഖ്യമന്ത്രി പറഞ്ഞു

 മുഖ്യമന്ത്രിയുടെ ദുരിതാശ്വാസ നിധിയിലേക്ക് 10 കോടി രൂപ സംഭാവന നല്‍കുമെന്ന് ലുലു ഗ്രൂപ്പ് ചെയര്‍മാന്‍ ഡോ. എം എ യൂസഫലി അറിയിച്ചു.  കൊവിഡ് 19 വൈറസ് ബാധയുമായി ബന്ധപ്പെട്ട കാര്യങ്ങള്‍ വിശദീകരിക്കവെ മുഖ്യമന്ത്രി ദുരിതാശ്വാസ നിധിയിലേക്ക് സംഭാവന ചെയ്യണമെന്ന് ആഹ്വാനം ചെയ്തിരുന്നു. ഇതിന് ശേഷം മുഖ്യമന്ത്രി പിണറായി വിജയനെ നേരിട്ട് വിളിച്ചാണ് യൂസഫലി ഇക്കാര്യം അറിയിച്ചത്.

മാസ്കുകള്‍ക്കും സാനിറ്റൈസറുകള്‍ക്കും അമിത വില ഈടാക്കിയ കൊല്ലത്തെ ഒമ്പത് സ്ഥാപനങ്ങള്‍ക്കെതിരെ കേസ് രജിസ്റ്റര്‍ ചെയ്യുകയും 80000 രൂപ പിഴ ഈടാക്കുകയും ചെയ്തു. ലീഗല്‍ മെട്രോളജി വകുപ്പ് മെഡിക്കല്‍ ഷോപ്പുകളിലും സര്‍ജിക്കല്‍ സ്ഥാപനങ്ങളിലും നടത്തിയ മിന്നല്‍ പരിശോധനയെത്തുടര്‍ന്നാണ് നടപടി

ഒമാനിൽ 22 പേർക്ക് കൂടി കോവിഡ്‌ 19 സ്ഥിരീകരിച്ചു. സമൂഹവ്യാപനം ഉള്ളതായി ഒമാൻ ആരോഗ്യമന്ത്രാലയം അറിയിച്ചു, ഒമാനിൽ ആകെ 131 പേർക്കാണ് ഇത് വരെ കൊവിഡ് സ്ഥിരീകരിച്ചത്.

ശബരിമല നട ഉത്സവത്തിനായി നാളെ തുറക്കില്ല. ഉത്സവം മാറ്റി വെച്ചിരുന്നു

കൊറോണ വ്യാപനം നിയന്ത്രിക്കാന്‍ പ്രധാനമന്ത്രിയും മുഖ്യമന്ത്രിയും പ്രഖ്യാപിച്ചിട്ടുള്ള നിയന്ത്രണങ്ങള്‍ പൂര്‍ണ്ണമായും അനുസരിക്കാന്‍ എല്ലാവരും തയ്യാറാകണമെന്ന് എ കെ ആന്‍റണി

ഇടുക്കി സ്വദേശിയായ പൊതുപ്രവർത്തകന് രോഗം സ്ഥിരീകരിച്ചത് സമ്പർക്കം വഴിയെന്ന് സൂചന ലഭിച്ചതായി മുഖ്യമന്ത്രി. 

മുഖ്യമന്ത്രിയുടെ ദുരിതാശ്വാസ നിധി വഴി പണം സമാഹരിക്കുമെന്ന് മുഖ്യമന്ത്രി. വാഗ്ദാനം നൽകിയവർ അത് ചെയ്യണം, ആകുന്ന സംഭാവന എല്ലാവരും നൽകണമെന്ന് മുഖ്യമന്ത്രി.

പ്രധാനമന്ത്രി രാവിലെ വിളിച്ച് സംസ്ഥാനത്തെ സ്ഥിതിഗതികൾ അന്വേഷിച്ചുവെന്ന് മുഖ്യമന്ത്രി. കേരളത്തിന്‍റെ പ്രവർത്തനങ്ങളിൽ പ്രധാനമന്ത്രി മതിപ്പി പ്രകടിപ്പിച്ചു. കടന്നു പോകുന്ന പ്രതിസന്ധി ഘട്ടം പരീക്ഷണ ഘട്ടമാണ് ഇത് നമ്മുക്ക് അതിജീവിക്കണമെന്ന് മുഖ്യമന്ത്രി. 

സംസ്ഥാനങ്ങളുടെ വായ്‌പ പരിധി ഉയർത്തണമെന്ന് മുഖ്യമന്ത്രി. മൂന്ന് ശതമാനമെന്നത് അഞ്ച് ശതമാനമാക്കണമെന്ന് മുഖ്യമന്ത്രി.

ഓട്ടോ ടാക്സി അമിത നിരക്ക് പാടില്ലെന്ന് മുഖ്യമന്ത്രി. കേന്ദ്ര പാക്കേജിൽ സ്വകാര്യ ആശുപത്രി ജീവനക്കാരെയും ഉൾപ്പെടുത്തണമെന്നാവശ്യം. 

തൊണ്ട വേദനയും പനിയുമുള്ളവർ ആശുപത്രിയുമായി ബന്ധപ്പെടണം

എസ്എസ്എൽസി പ്ലസ്ടു പരീക്ഷകളുടെ ഉത്തരപേപ്പർ സ്ട്രോംഗ് റൂമിലേക്ക് മാറ്റും, നിലവിൽ സുരക്ഷാ ജീവനക്കാർ രാത്രിയും കാവലിരിക്കേണ്ട സാഹചര്യം ഒഴിവാക്കും. 

തെരുവ് നായക്കൾ ഭക്ഷണം കിട്ടാതെ വന്നാൽ അക്രമാസക്തരാവാൻ ഇടയുണ്ട്. അത് കൊണ്ട് ഇവയ്ക്ക് ഭക്ഷണം നൽകേണ്ടതായിട്ടുള്ള സംവിധാനെ ഒരുക്കണം. ഇത് തദ്ദേശ സ്വയംഭരണ സ്ഥാപനങ്ങൾ ശ്രദ്ധിക്കണം. 

ആരോഗ്യ പ്രവർത്തകരെ ഒറ്റപ്പെടുത്തരുതെന്ന് മുഖ്യമന്ത്രി. ഇത് അനുവദിക്കില്ല. വാക്കിലോ നോക്കിലോ പ്രവർത്തിയിലോ അനാദരവ് പാടില്ലെന്നും മുഖ്യമന്ത്രി. 

സംസ്ഥാനത്ത് ഇപ്പോൾ ഒരു തരം ഒഴിപ്പിക്കലും പാടില്ലെന്ന് മുഖ്യമന്ത്രി പിണറായി വിജയൻ. വാടക കടമുറികൾ അടക്കം ഒഴിപ്പിക്കരുത്. വിലക്കയറ്റം തടയുമെന്നും മുഖ്യമന്ത്രി. 

സംസ്ഥാനത്തെ ആയുർവേദ മരുന്ന് വിൽപ്പന ശാലകളും തുറന്ന് പ്രവർത്തിക്കാമെന്ന് മുഖ്യമന്ത്രി. 

ബാറുകള് അടച്ചത് ചില ഗുരുതര പ്രശനങ്ങൾ ഉണ്ടാക്കുന്നുവെന്ന് മുഖ്യമന്ത്രി. ഒരാൾ ഇന്ന് ആത്മഹത്യ ചെയ്തു. മദ്യാസക്തിയുള്ളവർക്ക് ചികിത്സ ഉറപ്പാക്കും, ഇതിനായി എക്സൈസ് വകുപ്പ് മുൻകൈ എടുക്കണം.

 ഒഴിച്ചു കൂടാൻ പറ്റാത്ത സ്ഥിതിയിൽ മാത്രം പുറത്തു ഇറങ്ങാമെന്ന് മുഖ്യമന്ത്രി. സത്യവാങ്ങ് മൂലം ഇതിന് അനുവദിക്കും കബളിപ്പിച്ചാൽ കർശന നടപടിയെന്നും മുഖ്യമന്ത്രി.

ക്യൂബയിൽ നിന്നുള്ള മരുന്ന് കൊണ്ട് വരുന്നത് പരിഗണിക്കുമെന്ന് മുഖ്യമന്ത്രി. ഇതിനായി ഡ്രഗ്സ് കണ്ട്രോളറിൽ നിന്ന് അനുമതി തേടും.

കണ്ണൂർ മെഡിക്കൽ കോളേജ് കോവിഡ് ആശുപത്രി ആക്കുമെന്ന് മുഖ്യമന്ത്രി. രോഗം മൂർച്ഛിച്ചവരെ അവിടെ ചികിത്സിപ്പിക്കും. കാസ‍ർകോട് സെൻട്രൽ യൂണിവേഴ്സിറ്റി കൊവിഡ് പ്രാഥമിക ചികിത്സാ കേന്ദ്രമാക്കും. അവിടെയും പരിശോധന തുടങ്ങുമെന്ന് മുഖ്യമന്ത്രി.

നേരത്തെ കൊവിഡ് നെഗറ്റീവായ ഒരാൾക്ക് വീണ്ടും കൊവിഡ് 19 പൊസീറ്റാവായതായി മുഖ്യമന്ത്രി. 

അതിർത്തിയിൽ കർണ്ണാടക മണ്ണ് ഇട്ടു ഗതാഗതം തടയുന്നു. ഇതു കേന്ദ്ര സർക്കാർ നിര്ദേശത്തിന് വിരുദ്ധമാണെന്ന് മുഖ്യമന്ത്രി.  മണ്ണ് മാറ്റാമെന്ന് കർണാടക ചീഫ് സെക്രട്ടറി സമ്മതിച്ചുവെന്ന് മുഖ്യമന്ത്രി. 

ഇടുക്കി സ്വദേശിയുടെ യാത്ര വിവരം അമ്പരപ്പിക്കുന്നതെന്ന് മുഖ്യമന്ത്രി. റൂട്ട് മാപ്പ് വല്ലാതെ നീളുന്നു. ഇയാൾ നിയമസഭ മന്ദിരവും സന്ദർശിച്ചു. രോഗം സ്ഥിരീകരിച്ച പൊതുപ്രവർത്തകൻ കാസർ​ഗോഡ് മുതൽ തിരുവനന്തപുരം വരേയും മൂന്നാർ മുതൽ ഷൊളായാർ വരേയും സ‍ഞ്ചരിച്ചിട്ടുണ്ട്. സ്കൂളുകൾ. പൊതുസ്ഥാപനങ്ങൾ നിയമസഭാ മന്ദിരം തുടങ്ങി വലിയ വലിയ സ്ഥാപനങ്ങൾ അദ്ദേഹം സന്ദർശിച്ചിട്ടുണ്ട്.

Read more at:  കൊവിഡ് സമ്പര്‍ക്ക പട്ടിക; ഇടുക്കിയിലെ കോണ്‍ഗ്രസ് നേതാവിന് പിണറായിയുടെ ശകാരം ...

 

സംസ്ഥാനത്ത് സ്ഥിതി അതീവ ഗുരുതരമാണെന്ന് മുഖ്യമന്ത്രി. ഏത് സാഹചര്യത്തെയും നേരിടാൻ തയ്യാറാകണം. പുതുതായി കണ്ടെത്തിയ രോഗികൾ നിരവധി പേരുമായി സമ്പർക്ക് പുലർത്തി. 

സംസ്ഥാനത്ത് 39 പേർക്ക് കൂടി കൊവിഡ് സ്ഥിരീകരിച്ചു. 34 പേരും കാസർകോട്, കണ്ണൂരിൽ 2 പേർക്കും രോഗം സ്ഥിരീകരിച്ചു. 
 

Read more at: കൊവിഡിൽ ഞെട്ടി കേരളം; ഇന്ന് മാത്രം 39 പേര്‍ക്ക് കൊവിഡ്, കാസര്‍കോട് 34 കേസ് ...

അടച്ചുപൂട്ടല്‍ ലംഘനത്തിന് സംസ്ഥാനത്ത്  ഇന്ന് 1381 കേസുകള്‍രജിസ്റ്റർ ചെയ്തു 1383 പേരെ അറസ്റ്റ് ചെയ്തിട്ടുണ്ട് 923 വാഹനങ്ങള്‍ പിടിച്ചെടുത്തുവെന്നും പൊലീസ്. 

ഫെബ്രുവരി 29 മുതൽ താനുമായി അടുത്ത് ഇടപഴകിയവർ മുൻകരുതൽ എടുക്കണമെന്ന അഭ്യർ‍ത്ഥനയുമായി തൊടുപുഴയിലെ കൊവിഡ് ബാധിതൻ. അടുത്ത് ഇടപഴകിയ പരിചയക്കാരും സുഹൃത്തുക്കളും ആരോഗ്യവകുപ്പിനെ ബന്ധപ്പെടണമെന്നും പൊതുപ്രവർത്തകനായതിനാൽ ബന്ധപ്പെട്ട എല്ലാവരെയും ഓർത്തെടുക്കാനാകുന്നില്ലെന്നും ഇയാൾ വിശദീകരിച്ചു. 

തിരുവനന്തപുരത്ത് ചികിത്സയിലുളള മലപ്പുറം സ്വദേശിയുടെ റൂട്ട് മാപ്പ് തയ്യാറാക്കുന്നു. വിമാനത്താവളത്തിൽ വച്ച് ഇയാൾക്ക് ടാക്സി പിടിക്കാൻ സഹായിച്ച പൊലീസുകാരെ നിരീക്ഷണത്തിനയക്കും. നാട്ടിലേക്ക് പോകാനായി ഇയാൾ റെയിവേ സ്റ്റേഷനിലുമെത്തിയിരുന്നു. 

ലോക്ക് ഡൗൺ ലംഘിച്ച് പള്ളിയിൽ നമസ്കാരം നടത്തിയതിന് ഇന്ന് മലപ്പുറത്ത് അഞ്ചു കേസുകൾ രജിസ്റ്റർ ചെയ്തു.പോത്തുകൽ,  വഴിക്കടവ് സ്റ്റേഷനുകളിൽ 1 കേസ് വീതവും മേലാറ്റൂരിൽ 3 കേസുമാണ് രജിസ്റ്റർ ചെയ്തത്. 

കണ്ണൂർ ജില്ലയിലെ മാക്കൂട്ടത്തെ സംസ്ഥാന അതിർത്തി കർണ്ണാടകം അടച്ചു. റോഡിൽ ഒരാൾ പൊക്കത്തിൽ മണ്ണിട്ടാണ് വഴിയടച്ചത്. കേരളത്തിലേക്കുള്ള പച്ചക്കറി അടക്കമുള്ള ചരക്കു വാഹനങ്ങൾ കുടുങ്ങിക്കിടക്കുകയാണ്. കണ്ണൂർ എസ്‍പി കർണാട ഉദ്യോഗസ്ഥരുമായി ചർച്ച നടത്തുന്നു.

ബിഎസ് ഫോർ വാഹനങ്ങൾ വിൽക്കുന്നതിനുള്ള അവസാന തീയതി നീട്ടി. മാർച്ച് 31 വരെയായിരുന്നു സമയപരിധി. ലോക്ക്ഡൗൺ അവസാനിച്ച് പത്തു ദിവസത്തിൽ ഇപ്പോൾ വിറ്റഴിക്കാത്ത വാഹനങ്ങളിൽ 10 ശതമാനം വില്ക്കാമെന്ന് സുപ്രീം കോടതി. ഇവയുടെ രജിസ്ട്രേഷൻ വാങ്ങി പത്തുദിവസത്തിൽ പൂർത്തിയാക്കണം. ദില്ലി ഒഴികെയുള്ള സ്ഥലങ്ങളിലാണ് ഇളവ്

ബ്രിട്ടീഷ് പ്രധാനമന്ത്രി ബോറിസ് ജോൺസണ് കൊവിഡ് സ്ഥിരീകരിച്ചു .

പൊതുമേഖലാസ്ഥാപനമായ ബിഇഎൽ 30000 വെൻറിലേറ്റർ രണ്ടു മാസത്തിനുള്ളിൽ തയ്യാറാക്കും. 10,000 വെൻറിലേറ്റർ മറ്റൊരു പൊതുമേഖലാ സ്ഥാപനം നിർമ്മിക്കും. 

രാജ്യത്തു കോവിഡ് ബാധിതരുടെ എണ്ണം 724ആയി. ഇത് വരെ 17 പേരാണ് രോഗം ബാധിച്ച് മരിച്ചത്. കഴിഞ്ഞ 24 മണിക്കൂറിനിടെ 4 പേരാണ് മരണത്തിന് കീഴടങ്ങിയത്. 

ജനുവരി പതിനെട്ടിന് ശേഷം വിദേശത്തു നിന്ന് വന്ന എല്ലാവരെയും നിരീക്ഷിക്കണമെന്ന് കേന്ദ്രം. 15 ലക്ഷം പേർ 18 നു ശേഷം ഇന്ത്യയിലെത്തി. നിലവിൽ നീരീക്ഷണത്തിലുള്ളവരുടെ എണ്ണം കുറവെന്ന് കേന്ദ്രം. കഴിഞ്ഞ 24 മണിക്കൂറിൽ 75 പുതിയ കൊവിഡ് കേസുകൾ രാജ്യത്ത് റിപ്പോർട്ട് ചെയ്തു,