ബിഹാറിലെ ​ഗ്രാമത്തിലെ മരണം ഉയരുന്നു, 70% പേർക്കും രോ​ഗം, കൊവിഡ് പരിശോധന നടത്തുന്നവർ വിരളം

കൈമൂർ ജില്ലയിൽ 23 പുതിയ കൊവിഡ് കേസുകൾ റിപ്പോർട്ട് ചെയ്തിട്ടുണ്ടെന്നാണ് സംസ്ഥാന ആരോ​ഗ്യ വകുപ്പ് ട്വീറ്റ് ചെയ്തിരിക്കുന്നത്. എന്നാൽ ജില്ലയിലെ ബംഹാർ ​ഗ്രാമത്തിൽ കഴിഞ്ഞ 25 ദിവസത്തിനിടെ മരിച്ചത് 34 പേരാണ്...

പാറ്റ്ന:  സംസ്ഥാനത്ത് കൊവിഡ് രോഗികളുടെയും കൊവിഡ് ബാധിച്ച് മരിക്കുന്നവരുടെയും എണ്ണം ഉയരുന്ന സാഹചര്യത്തിൽ ലോക്ക് ഡൗൺ മെയ് 25 വരെ നീട്ടിയിരിക്കുകയാണ് ബിഹാർ. പാറ്റ്നയിൽ നിന്ന് 195 കിലോമീറ്റർ അകലെയുള്ള കൈമൂർ ജില്ലയിലെ ബംഹാർ ഖാസ്​ ഗ്രാമത്തിലെ കൊവിഡ് രോ​ഗികളുടെ എണ്ണം , യഥാർത്ഥ കണക്ക് റിപ്പോർട്ട് ചെയ്യപ്പെടുന്നുണ്ടോ എന്ന ചോദ്യം ഉയർത്തുകയാണ്. 

കൈമൂർ ജില്ലയിൽ 23 പുതിയ കൊവിഡ് കേസുകൾ റിപ്പോർട്ട് ചെയ്തിട്ടുണ്ടെന്നാണ് സംസ്ഥാന ആരോ​ഗ്യ വകുപ്പ് ട്വീറ്റ് ചെയ്തിരിക്കുന്നത്. എന്നാൽ ബംഹാർ ​ഗ്രാമത്തിൽ കഴിഞ്ഞ 25 ദിവസത്തിനിടെ മരിച്ചത് 34 പേരാണ്. ഇവിടുത്തെ 70 ശതമാനം പേരും രോ​ഗബാധിതരാണെന്ന് എൻഡിടിവി റിപ്പോർട്ട് ചെയ്യുന്നു. 

മരിച്ചവരിൽ മിക്കവർക്കും കൊവിഡ് ലക്ഷണങ്ങൾ ഉണ്ടായിരുന്നു. ചിലർക്ക് കൊവിഡ് പരിശോധന നടത്തിയിരുന്നില്ല. ചിലരാകട്ടെ കൊവി‍ഡ് പരിശോധനാ ഫലം പുറത്തുവരും മുമ്പ് മരിച്ചുവെന്ന് ​ഗ്രാമവാസികൾ പറയുന്നു. 

''ആദ്യം പനി ആയിരുന്നു. പിന്നീട് ചുമ തുടങ്ങുന്നു. തുടർന്ന് അവർ മരിച്ചു. കൊവിഡ് പരിശോധന ഉണ്ടായിരുന്നു, പക്ഷേ ഞങ്ങൾ ഫലത്തിനായി കാത്തുനിന്നില്ല.''  - ബന്ധുവിനെ നഷ്ടപ്പെട്ട അശോക് കുമാർ ചൗധരിയെന്നയാൾ പറഞ്ഞു. അലോക് കുമാർ എന്നയാൾക്ക് പിതാവിനെ നഷ്ടപ്പെട്ടു. രണ്ടാം ഡോസ് വാക്സിൻ സ്വീകരിച്ചതിന് ശേഷമാണ് അലോകിന് പിതാവിനെ നഷ്ടമായത്. 

''രണ്ടാമത്തെ വാക്സിൻ എടുത്തതിന് പിന്നാലെ അദ്ദേഹത്തിന് പനി ബാധിച്ചു. അദ്ദേഹം ഒരു ഹൃദ്‍രോ​ഗി ആയിരുന്നു. ഉയർന്ന രക്ത സമ്മർദ്ദവും ഉണ്ടായിരുന്നു. ഞങ്ങൾ അദ്ദേഹത്തെ ഒരു ആശുപത്രിയിൽ കൊണ്ടുപോയി. അവിടെ വച്ച് ഒരു ഇഞ്ചെക്ഷൻ എടുത്തു. പക്ഷേ അദ്ദേഹത്തിന്റെ ജീവൻ നിലനിർത്താനായില്ല. ഒരു പനി വന്നതുകൊണ്ട് മാത്രം ഇത്ര പെട്ടന്ന് മരിക്കുമെന്ന് ഞങ്ങൾ കരുതുന്നില്ല. ഇത് കൊവിഡ് ബാധിച്ചതാകാം''- അലോക് കുമാർ പറഞ്ഞു. 

മിക്കവർക്കും കൊവിഡ് ലക്ഷണങ്ങളുണ്ട്. എന്നാൽ ടൈഫോയ്ഡ് മലേറിയ തുടങ്ങിയ പരിശോധനകളാണ് നടത്തുന്നത് എന്നതിനാൽ രോ​ഗം കണ്ടെത്താനാകുന്നില്ലെന്നും നാട്ടുകാർ പറഞ്ഞു. ടൈഫോയ്ഡ് ചികിത്സയ്ക്കുള്ള മരുന്ന് പലരെയും രക്ഷിക്കുന്നില്ല.  

കൊവിഡ് മഹാമാരിയുടെ രണ്ടാം വരവിന്റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്‌സിന്‍ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്‍ത്ഥിക്കുന്നു. ഒന്നിച്ച് നിന്നാല്‍ നമുക്കീ മഹാമാരിയെ തോല്‍പ്പിക്കാനാവും. #BreakTheChain #ANCares #IndiaFightsCorona