മുംബൈയിലെ 3 ശതമാനം വിവാഹമോചനങ്ങൾക്കും കാരണം ​ഗതാ​ഗതക്കുരുക്ക്; പ്രസ്താവനയുമായി അമൃത ഫഡ്നാവിസ്

ഗതാ​ഗതക്കുരുക്ക് മൂലം കുടുംബാ​ഗങ്ങൾക്കൊപ്പം ചെലവഴിക്കാൻ ആളുകൾക്ക് സമയം ലഭിക്കുന്നില്ല. ഇത് വിവാഹമോചനത്തിലേക്ക് നയിക്കുന്നു എന്നും ഇവർ വിശദീകരിച്ചു. 

മഹാരാഷ്ട്ര: മുംബൈയിലെ (Mumbai) 3 ശതമാനം വിവാഹമോചനങ്ങൾക്കും (Divorce) കാരണം ന​ഗരത്തിലെ ​ഗതാ​ഗതക്കുരുക്കാണെന്ന പ്രസ്താവനയുമായി മഹാരാഷ്ട്ര മുൻമുഖ്യമന്ത്രി ദേവേന്ദ്ര ഫഡ്നാവിസിന്റെ ഭാര്യ അമൃത ഫഡ്നാവിസ്. റോ‍ഡുകളുടെ അവസ്ഥയെക്കുറിച്ചും ​ഗതാ​ഗതത്തെ കുറിച്ചും  മാധ്യമപ്രവർത്തകരോട് സംസാരിക്കവേയാണ് അമൃത ഫഡ്നാവിസ് ഇങ്ങനെ പറഞ്ഞത്. ​ഗതാ​ഗതക്കുരുക്ക് മൂലം കുടുംബാ​ഗങ്ങൾക്കൊപ്പം ചെലവഴിക്കാൻ ആളുകൾക്ക് സമയം ലഭിക്കുന്നില്ല. ഇത് വിവാഹമോചനത്തിലേക്ക് നയിക്കുന്നു എന്നും ഇവർ വിശദീകരിച്ചു. 

ഈ പ്രസ്താവനക്കെതിരെ നിരവധി വിമർശനങ്ങളാണ് ഉയരുന്നത്. 'റോഡുകളിലെ ട്രാഫിക് ജാം മൂലമാണ് മുംബൈയിലുള്ള 3 ശതമാനം ആളുകൾ വിവാഹ മോചനം നേടുന്നുവെന്ന് പറഞ്ഞ ഇവർക്കാണ് ഈ ദിവസത്തെ മികച്ച യുക്തിരഹിത പ്രസ്താവന നടത്തിയവർക്കുള്ള അവാർഡ് നൽകേണ്ടത്.' ശിവസേന നേതാവ് പ്രിയങ്ക ചതുർവേദി ട്വീറ്റിൽ വിമർശിച്ചു. അമൃത ഫഡ്നാവിസിനെ വിമർശിച്ചു കൊണ്ട്  നിരവധി പേർ രം​ഗത്തെത്തിയിട്ടുണ്ട്.