മനുഷ്യത്വരഹിതം, നിയമവിരുദ്ധം; വരവരറാവുവിന്റെ ആരോ​ഗ്യപ്രശ്നങ്ങൾ അറിയിക്കുന്നില്ല; ആരോപണവുമായി കുടുംബാം​ഗങ്ങള്‍

ജയിലിൽ നിന്ന് ഒന്നിലധികം ആശുപത്രികളിലേക്ക് മാറ്റിയതിന് ശേഷമാണ് കൊവിഡ് രോ​ഗബാധയെക്കുറിച്ചുള്ള വിവരം അറിയിച്ചതെന്നും ഇവർ കൂട്ടിച്ചേർത്തു. 

ദില്ലി: കവിയും എഴുത്തുകാരനുമായ വരവരറാവുവിന്റെ ആരോ​ഗ്യപ്രശനങ്ങളെക്കുറിച്ച് അധികൃതർ തുറന്നു പറയുന്നില്ലെന്ന ആരോപണവുമായി കുടുംബാം​ഗങ്ങൾ. ജയിൽ സെല്ലിൽ നിന്ന് ആശുപത്രിയിലേക്ക് മാറ്റിയ സമയത്ത് അദ്ദേഹത്തിന്റെ തലയ്ക്ക് മുറിവേറ്റ വിവരം മാധ്യമവാർത്തകളിൽ നിന്നാണ് അറിയാൻ സാധിച്ചതെന്നും ഇവർ പറഞ്ഞു. നവി മുംബൈയിലെ തലോജ ജയിലിൽ കഴിയുന്ന വരവരറാവുവിന് കൊവിഡ് 19 സ്ഥീരികരിച്ചിരുന്നു.

'അദ്ദേഹത്തിന്റെ ആരോ​ഗ്യത്തെക്കുറിച്ച് ഔദ്യോ​ഗികമായി കുടുംബാം​ഗങ്ങളെ അറിയിച്ചിട്ടില്ല. ജുഡീഷ്യൽ കസ്റ്റഡിയിലുള്ള ഒരാളുടെ ആരോ​ഗ്യത്തെക്കുറിച്ച് കുടുംബവുമായി പങ്കിടാതിരിക്കുന്നത് നിയമവവിരുദ്ധവും മനുഷ്യത്വരഹിതവുമായ നടപടിയാണ്.' വരവരറാവുവിന്റെ ഭാര്യ ഹേമതലയും മക്കളും പ്രസ്താവനയിൽ പറഞ്ഞു. ജയിലിൽ നിന്ന് ഒന്നിലധികം ആശുപത്രികളിലേക്ക് മാറ്റിയതിന് ശേഷമാണ് കൊവിഡ് രോ​ഗബാധയെക്കുറിച്ചുള്ള വിവരം അറിയിച്ചതെന്നും ഇവർ കൂട്ടിച്ചേർത്തു. 

'തലയ്ക്ക് മുറിവേറ്റ വിവരവും മാധ്യമ സുഹൃത്തുക്കളിൽ നിന്നാണ് അറിഞ്ഞത്. ഓദ്യോ​ഗികവും സുതാര്യവുമായ വിവരങ്ങളുടെ അഭാവത്തിൽ ഊഹങ്ങളും കിംവദന്തികളും പ്രചരിക്കുകയാണ്. കുടുംബാം​ഗങ്ങൾക്കും സുഹൃത്തുക്കൾക്കും ഇതുമൂലം വളരെയധികം ആശങ്കയുണ്ടാകുന്നുണ്ട്. അദ്ദേഹത്തിന്റെ ആരോ​ഗ്യ സ്ഥിതി, ചികിത്സ, അപകട സാധ്യത എന്നിവയെക്കുറിച്ച് ഔദ്യോ​ഗികമായ അറിയിപ്പ് ലഭിക്കുക എന്നത് കുടുംബത്തിന്റെ അവകാശമാണ്. എന്നാൽ ഈ വിവരങ്ങൾ ഒന്നും തന്നെ ബന്ധപ്പെട്ട ഉദ്യോ​ഗസ്ഥർ ആരും തന്നെ അറിയിച്ചിട്ടില്ല. 'കുടുംബം ആരോപിച്ചു.

വരവരറാവുവിന്റെ കുടുംബാം​ഗങ്ങൾ ചില ആവശ്യങ്ങൾ മഹാരാഷ്ട്ര സർക്കാരിനോട് ഉന്നയിച്ചിട്ടുണ്ട്. മറ്റൊരാളുടെ സഹായമില്ലാതെ സ്വന്തമായി കാര്യങ്ങൾ ചെയ്യാൻ സാധിക്കുന്നത് വരെ ഇ​ദ്ദേഹത്തൊടൊപ്പം നിൽക്കാൻ കുടംബാം​ഗങ്ങളിലാരെയെങ്കിലും അനുവദിക്കുക, ആശുപത്രി, ജയിൽ അധികൃതർ അദ്ദേഹത്തിന്റെ ആരോ​ഗ്യത്തെക്കുറിച്ചും ചികിത്സകളെക്കുറിച്ചും  കൃത്യമായ അറിയിപ്പുകൾ നൽകുക, കുറഞ്ഞത് രണ്ട് ദിവസത്തിലൊരിക്കലെങ്കിലും വിവരങ്ങൾ പങ്കിടണം. മെഡിക്കൽ രേഖകളെക്കുറിച്ച് കുടുംബാം​ഗങ്ങളെ അറിയിക്കുക, വരവരറാവുവിന്റെ പ്രായവും ആരോ​​ഗ്യ സ്ഥിതിയും കണക്കിലെടുത്ത് ഇടക്കാല ജാമ്യം അനുവ​ദിക്കുക. കുടുംബാം​ഗങ്ങളുടെ താത്പര്യപ്രകാരമുളള ആശുപത്രിയിൽ അദ്ദേഹത്തിന് ചികിത്സ നൽകാൻ ഇതുവഴി സാധിക്കും.

2018ലാണ് ഭീമ കോറേ​ഗാവ് സംഘർഷവുമായി ബന്ധപ്പെട്ട് വരവരറാവുവിനെ അറസ്റ്റ് ചെയ്തത്. ആദ്യം പൂനെ പൊലീസ് അന്വേഷിച്ച കേസ് പിന്നീട് എൻഐഎയ്ക്ക് കൈമാറുകയായിരുന്നു.