പക്ഷി ഇടിച്ച് വിമാനത്തിന് തീപിടിച്ചു, സ്പൈസ് ജെറ്റ് വിമാനം അടിയന്തരമായി നിലത്തിറക്കി, വൻ അപകടം ഒഴിവായി

പക്ഷി ഇടിച്ചത് പാറ്റ്ന വിമാനത്താവളത്തിൽ നിന്ന് പറന്നുയരുന്നതിനിടെ, വിമാനത്തിലെ 185 യാത്രക്കാരും സുരക്ഷിതർ, അന്വേഷണം പ്രഖ്യാപിച്ച് ഡിജിസിഎ

പാറ്റ്ന: ബിഹാറിലെ പാറ്റ്നയിൽ പക്ഷി ഇടിച്ചതിനെ തുടർന്ന് വിമാനത്തിന് തീ പിടിച്ചു.സ്പൈസ് ജെറ്റിന്റെ പാറ്റ്ന-ദില്ലി വിമാനത്തിനാണ് തീപിടിച്ചത്. വിമാനം അടിയന്തരമായി പാറ്റ്ന വിമാനത്താവളത്തിൽ ഇറക്കിയതായി ഡിജിസിഎ (DGCA) അറിയിച്ചു. വിമാനത്തിലെ 185 യാത്രക്കാരും സുരക്ഷിതരാണെന്ന് പാറ്റ്ന വിമാനത്താവള അധികൃതർ അറിയിച്ചു. പക്ഷി ഇടിച്ചതിനെ തുടർന്ന് വിമാനത്തിന് തീപിടിച്ച കാര്യം പ്രദേശവാസികളാണ് അധികൃതരെ അറിയിച്ചത്.  പാറ്റ്ന ജില്ലാ മജിസ്ട്രേറ്റ് ചന്ദ്രശേഖർ സിംഗ് ഇക്കാര്യം സ്ഥിരീകരിച്ചു. വൻ ദുരന്തമാണ് ഒഴിവായതെന്നും അദ്ദേഹം വ്യക്തമാക്കി. 

പാറ്റ്ന വിമാനത്താവളത്തിൽ നിന്ന് പറന്നുയരുന്നതിനിടെ, വിമാനത്തിന്റെ എഞ്ചിനുകളിൽ ഒന്നിൽ പക്ഷി ഇടിക്കുകയും തുടർന്ന് തീപിടിക്കുകയായിരുന്നുവെന്നും ഡിജിസിഎ അറിയിച്ചു. തുടർന്ന് എഞ്ചിൻ ഓഫ് ചെയ്ത പൈലറ്റ് വിമാനം അടിയന്തരമായി തിരിച്ചിറക്കുകയായിരുന്നു. ഇക്കാര്യം സ്പൈസ് ജെറ്റ് അധികൃതരും സ്ഥിരീകരിച്ചു. യാത്രക്കാരായ 185 പേരും സുരക്ഷിതരാണെന്നും ഇവരെ വിമാനത്തിൽ നിന്ന് പുറത്തെത്തിച്ചതായും അധികൃതർ അറിയിച്ചു. യാത്രക്കാരെ മറ്റൊരു വിമാനത്തിൽ ദില്ലിയിൽ എത്തിക്കുമെന്നും പാറ്റ്ന വിമാനത്താവള അധികൃതർ അറിയിച്ചു.