1000 കിലോമീറ്റർ നീളത്തിൽ ഇന്ത്യക്ക് മുകളിൽ കൂറ്റൻ മേഘപാളി? ആശങ്കപ്പെടാനൊന്നുമില്ല, വാർത്തകളിൽ അതിശയോക്തി!

ഇന്ത്യക്ക് മുകളിൽ ദൃശ്യമായ 1000 കിലോമീറ്റർ നീളമുള്ള മേഘപാളി ആശങ്കാജനകമല്ലെന്ന് കാലാവസ്ഥാ നിരീക്ഷകർ. വെസ്റ്റേൺ ഡിസ്റ്റർബൻസ് എന്ന ഈ സാധാരണ പ്രതിഭാസം ഉത്തരേന്ത്യയിൽ ശൈത്യകാല മഴയ്ക്കും മഞ്ഞിനും കാരണമാകും. മാധ്യമ വാർത്തകളിലെ അതിശയോക്തിക്ക് വിപരീതമായി, ഇത് ഒരു സാധാരണ കാലാവസ്ഥാ മാറ്റം മാത്രമാണ്.

ദില്ലി: ഇന്ത്യയുടെ ആകാശത്ത് 1000 കിലോമീറ്റർ നീളത്തിൽ മേഘങ്ങൾ വന്നുചേർന്നത് വിചിത്രവും ആശങ്കയുമുയർത്തുന്ന പ്രതിഭാസമായി മാധ്യമങ്ങൾ റിപ്പോർട്ട് ചെയ്തിരുന്നു. കഴിഞ്ഞ വെള്ളിയാഴ്ചയാണ് വമ്പൻ മേഘപാളി ദൃശ്യമായത്. ഇന്ത്യയുടെയും പാക്കിസ്ഥാന്റെയും അതിർത്തികളിൽ 1,000 കിലോമീറ്റർ നീളത്തിൽ വ്യാപിച്ചു കിടക്കുന്ന മേഘപാളിയുടെ സാറ്റലൈറ്റ് ചിത്രങ്ങളിൽ ഈ മേഘക്കൂട്ടം വരും ദിവസങ്ങളിൽ മേഖലയിലെ കാലാവസ്ഥയെ ബാധിക്കുമെന്നും ഐഎംഡി മുന്നറിയിപ്പ് പ്രകാരം, ഈ വാരാന്ത്യം വടക്ക്-പടിഞ്ഞാറൻ ഇന്ത്യയെ സംബന്ധിച്ചിടത്തോളം കാറ്റിന്റെയും മഴയുടെയും ദിനങ്ങളായിരിക്കുമെന്നും മുന്നറിയിപ്പ് നൽകി. 

എന്നാൽ, 1000 കിലോമീറ്റർ നീളമുള്ള മേഘങ്ങൾ വിചിത്ര പ്രതിഭാസമല്ലെന്നാണ് കാലാവസ്ഥാ നിരീക്ഷകരുടെ വിലയിരുത്തൽ. ഈ മേഘങ്ങൾ അസാധാരണമോ വിചിത്ര മായതോ ആയ പ്രതിഭാസമല്ല. വെസ്റ്റേൺ ഡിസ്റ്റർബ്ൻസ് എന്ന പ്രതിഭാസമാണ് ഈ മേഘപാളി. മെഡിറ്ററേനിയൻ കടിന്റെ പടിഞ്ഞാറ് ഭാഗത്ത് നിന്ന് വരുന്ന ഒരു തണുത്ത, ഈർപ്പമുള്ള കാറ്റാണ് ഈ മേഘപാളികളെ എത്തിക്കുന്നത്. ഈ മേഘപാളി ഇന്ത്യയിലെ കാലാവസ്ഥയെ ബാധിക്കുമെന്നത് ശരിയാണ്. ഉത്തരേന്ത്യയിൽ മഴയും മഞ്ഞും ഉണ്ടാക്കാൻ ഈ മേഘപാളികൾ കാരണമാകും. ശീതകാലത്ത് മഴ ലഭിക്കാൻ പ്രധാന കാരണം ഈ മേഘമായിരിക്കും. 

അതുകൊണ്ട് തന്നെ താപനിലയിൽ കുറവുണ്ടാകും. കേരളത്തിൽ ന്യൂന മർദ്ദ മഴ പോലെ വടക്കേ ഇന്ത്യയിൽ ശൈത്യ കാലത്തു പ്രധാനമായും മഴ ലഭിക്കുന്നത് ഈ പ്രതിഭാസം കാരണമാണ്. വാർത്തകളിൽ കാണുന്നത പോലെ അതിശയോക്തിയോ ആശങ്കയോ ഒന്നുമില്ലെന്നും വരും ദിവസങ്ങളിൽ അതോടൊപ്പം മഴ / മഞ്ഞ് / ആലിപ്പഴ മഴ സാധ്യതയുണ്ടെന്നും പറയുന്നു.