പുതിയ വിമാനത്താവളം, ടാറ്റയുടെ റിസോർട്ടുകൾ...; വികസനക്കുതിപ്പിനൊരുങ്ങി ലക്ഷദ്വീപ്, മാറുമോ ദ്വീപിന്റെ തലവര 

മിനിക്കോയ് ദ്വീപുകളിൽ എയർസ്ട്രിപ്പ് വേണമെന്ന് കോസ്റ്റ് ​ഗാർഡ് പ്രതിരോധ മന്ത്രാലയത്തിന് മുന്നിൽ നിർദേശം വെച്ചിരുന്നു. നിലവിലെ റിപ്പോർട്ട് അനുസരിച്ച്, മിനിക്കോയിയിൽ ഇന്ത്യൻ എയർഫോഴ്‌സിനായിരിക്കും വിമാനത്താവളത്തിന്റെ ചുമതല.

ദില്ലി: പ്രധാനമന്ത്രി നരേന്ദ്രമോദിയുടെ സന്ദർശനത്തിന് പിന്നാലെ ലക്ഷദ്വീപിലേക്ക് വമ്പൻ പദ്ധതികൾ പ്രഖ്യാപിക്കാൻ കേന്ദ്ര സർക്കാർ. ലക്ഷദ്വീപിൽ വിനോദസഞ്ചാരം പ്രോത്സാഹിപ്പിക്കാനായി വാണിജ്യ, യുദ്ധവിമാനങ്ങൾ സർവീസിന് സാധിക്കുന്ന പുതിയ വിമാനത്താവളം മിനിക്കോയ് ദ്വീപുകളിൽ നിർമിക്കാൻ ഇന്ത്യ പദ്ധതിയിടുന്നതായി ദേശീയമാധ്യമങ്ങൾ റിപ്പോർട്ട് ചെയ്തു. യുദ്ധവിമാനങ്ങൾ, സൈനിക-ഗതാഗത വിമാനങ്ങൾ, വാണിജ്യ വിമാനങ്ങൾ എന്നിവ പ്രവർത്തിപ്പിക്കാൻ സാധിക്കുന്ന സംയുക്ത വിമാനത്താവളം നിർമിക്കാനാണ് പദ്ധതിയെന്ന് സർക്കാർ വൃത്തങ്ങൾ വാർത്താ ഏജൻസിയായ എഎൻഐയോട് പറഞ്ഞു. 

മിനിക്കോയ് ദ്വീപുകളിൽ പുതിയ വിമാനത്താവളം വികസിപ്പിക്കുന്നതിനുള്ള നിർദേശം മുമ്പും സർക്കാരിന് മുന്നിലെത്തിയിരുന്നു. പ്രതിരോധ എയർഫീൽഡ് പദ്ധതി ഈ അടുത്ത കാലത്തായി വീണ്ടും പൊടി തട്ടിയെടുക്കുകയും ചർച്ചകൾ സജീവമാക്കുകയും ചെയ്തു. അറബിക്കടലിലും ഇന്ത്യൻ മഹാസമുദ്ര മേഖലയിലും നിരീക്ഷണം നടത്തുന്നതിനുള്ള സൈനിക താവളമായി ഉപയോഗിക്കാവുന്ന തരത്തിലായിരിക്കും നിർമാണം. 

മിനിക്കോയ് ദ്വീപുകളിൽ എയർസ്ട്രിപ്പ് വേണമെന്ന് കോസ്റ്റ് ​ഗാർഡ് പ്രതിരോധ മന്ത്രാലയത്തിന് മുന്നിൽ നിർദേശം വെച്ചിരുന്നു. നിലവിലെ റിപ്പോർട്ട് അനുസരിച്ച്, മിനിക്കോയിയിൽ ഇന്ത്യൻ എയർഫോഴ്‌സിനായിരിക്കും വിമാനത്താവളത്തിന്റെ ചുമതല. മിനിക്കോയ് വിമാനത്താവളം പ്രതിരോധ സേനക്കും ടൂറിസം രം​ഗത്തിനും ഉത്തേജനം നൽകുമെന്നാണ് വിലയിരുത്തൽ. ദ്വീപിൽ നിലവിൽ അ​ഗത്തിയിലെ ഒരു വിമാനത്താവളം മാത്രമാണുള്ളത്. നിലവിലുള്ള വിമാനത്താവളം വികസിപ്പിക്കാനും ആലോചനയുണ്ട്.

Read More... അടുക്കരുത്, ഒപ്പം നീന്തരുത്; ദ്വീപിനടുത്ത് കണ്ടെത്തിയത് കൊലയാളി തിമിംഗലത്തെ, ഫറസാനിൽ ജാഗ്രതാ നി‍ര്‍ദേശം

ടാറ്റ ഗ്രൂപ്പിന്റെ രണ്ട് റിസോർട്ടുകൾ ലക്ഷദ്വീപിലെ സുഹേലി, കദ്മത്ത് ദ്വീപുകളിൽ 2026-ൽ തുറക്കുമെന്നും റിപ്പോർട്ടുകൾ പറയുന്നു. കഴിഞ്ഞ വർഷം ജനുവരിയിൽ, ടാറ്റ ഗ്രൂപ്പിന്റെ അനുബന്ധ സ്ഥാപനമായ ഇന്ത്യൻ ഹോട്ടൽസ് കമ്പനി ലക്ഷദ്വീപിൽ രണ്ട് താജ് ബ്രാൻഡഡ് റിസോർട്ടുകൾ തുറക്കുമെന്ന് പ്രഖ്യാപിച്ചിരുന്നു. പ്രോജക്ടുകൾ 2026 ൽ തുറക്കുമെന്ന് കമ്പനി അറിയിച്ചു.