തോക്ക് പെൺസുഹൃത്തിനെ കാണിക്കുന്നതിനിടയിൽ അബദ്ധത്തിൽ യുവാവിന് വെടിയേറ്റു

സംഭവം നടക്കുന്ന സമയത്ത് സോനു മദ്യപിച്ചിരുന്നതായും അബദ്ധത്തിലാണ് പാദത്തിൽ വെടിയേറ്റതെന്നും ചോദ്യം ചെയ്യലിനിടയിൽ മേഘ പൊലീസിനോട് വെളിപ്പെടുത്തി.

ദില്ലി: സുഹൃത്തിനെ തോക്ക് കാണിക്കാൻ ശ്രമിക്കുന്നതിനിടയിൽ‌ അബദ്ധത്തിൽ വെടി പൊട്ടി യുവാവിന്റെ കാൽപാദത്തിൽ വെടിയേറ്റു. ദില്ലിയിലെ തിലക് ന​ഗറിൽ വെള്ളിയാഴ്ച രാത്രി പതിനൊന്നേമുക്കാലോടെയാണ് സംഭവം. ഇരുപത്തഞ്ചുകാരനായ സോനു ശർമ്മയ്ക്കാണ് സുഹൃത്ത് മേഘയെ തോക്ക് കാണിക്കാൻ ശ്രമിക്കുന്നതിനിടയിൽ വെടിയേറ്റത്. എന്നാൽ അജ്ഞാതരായ ഒരു സംഘം ആളുകൾ തന്നെ വെടിവെച്ചുവെന്നാണ് സോനു കഥ മെനഞ്ഞത്. 

സംഭവം നടക്കുന്ന സമയത്ത് സോനു മദ്യപിച്ചിരുന്നതായും അബദ്ധത്തിലാണ് പാദത്തിൽ വെടിയേറ്റതെന്നും ചോദ്യം ചെയ്യലിനിടയിൽ മേഘ പൊലീസിനോട് വെളിപ്പെടുത്തി. മേഘയുടെ വെളിപ്പെടുത്തലിന്റെ അടിസ്ഥാനത്തിൽ പൊലീസ് സോനു ശർമ്മയെ അറസ്റ്റ് ചെയ്തു. ശർമ്മയുടെ സുഹൃത്തായ മനോജിനെയും കസ്റ്റഡിയിലെടുത്തതായി പൊലീസ് വെളിപ്പെടുത്തി. തോക്ക് ഇയാളുടെ പക്കൽ നിന്നും കണ്ടെടുത്തു. ആയുധം കൈവശം വച്ചതിന്റെ പേരിൽ ഇരുവർക്കുമെതിരെ കേസ് രജിസ്റ്റർ ചെയ്തതായി പൊലീസ് അറിയിച്ചു.