അതിക്രൂരം: 3 പെൺകുട്ടികൾക്ക് നേരെ ആസിഡ് ആക്രമണം; നിലമ്പൂർ സ്വദേശി അറസ്റ്റിൽ, സംഭവം മംഗളൂരുവിൽ
Synopsis
ഒരു പെണ്കുട്ടിയുടെ മുഖത്ത് ഗുരുതര പൊള്ളല്, രക്ഷിക്കാന് തീവ്രശ്രമം
മംഗളുരു: മംഗളുരുവിൽ മൂന്ന് കോളേജ് വിദ്യാർഥിനികൾക്ക് നേരെ ആസിഡാക്രമണം നടത്തി മലയാളി യുവാവ്. മലപ്പുറം നിലമ്പൂർ സ്വദേശി അഭിനാണ് പെൺകുട്ടികളുടെ മുഖത്തേക്ക് ആസിഡ് എറിഞ്ഞതിന് അറസ്റ്റിലായത്. മംഗളുരു കടബ സർക്കാർ പിയുസി കോളേജിലെ രണ്ടാം വർഷ വിദ്യാർഥിനികൾക്ക് നേരെയാണ് അഭിൻ ആക്രമണം നടത്തിയത്. പരീക്ഷയ്ക്ക് മുമ്പ് കോളേജ് വരാന്തയിലിരുന്ന് പഠിക്കുകയായിരുന്ന പെൺകുട്ടികൾക്ക് നേരെ അഭിൻ കയ്യിൽ കരുതിയ ആസിഡ് ഒഴിക്കുകയായിരുന്നു.
പതിനേഴുകാരിയായ പെൺകുട്ടിക്ക് നേരെ ആക്രമണം നടത്താനാണ് അഭിൻ ശ്രമിച്ചത്. ആക്രമണം തടഞ്ഞ മറ്റ് രണ്ട് പെൺകുട്ടികളുടെ മുഖത്തും ആസിഡ് വീഴുകയായിരുന്നു. ഇതിലൊരാളുടെ മുഖത്ത് സാരമായി പൊള്ളലേറ്റിട്ടുണ്ട്. മറ്റ് രണ്ട് പേരുടെ ദേഹത്താണ് ആസിഡ് വീണത്. ആക്രമിക്കപ്പെട്ടവരിൽ ഒരു പെൺകുട്ടിയോട് നേരത്തെ അഭിൻ പ്രണയാഭ്യർത്ഥന നടത്തിയിരുന്നു. പെൺകുട്ടി ഇത് നിരസിച്ചിരുന്നു.
ഇതിൽ പക മൂത്താണ് അഭിൻ കോളേജിലെത്തി ആക്രമണം നടത്തിയത്. ആക്രമണത്തിന് ശേഷം സ്ഥലത്ത് നിന്ന് ഓടി രക്ഷപ്പെടാൻ ശ്രമിച്ച അഭിനെ പെൺകുട്ടിയുടെ സഹപാഠികൾ ഓടിച്ചിട്ട് പിടിച്ച് പൊലീസിൽ ഏൽപിക്കുകയായിരുന്നു. രണ്ടാം വർഷ എംബിഎ വിദ്യാർഥിയാണ് അഭിൻ