വീഡിയോ വൈറൽ: ഇത് മുറിക്കാൻ തനിക്ക് കഴിയില്ലെന്ന് ഒമർ അബ്‌ദുള്ള; ദേശീയപതാകയുടെ നിറങ്ങളുള്ള റിബൺ മുറിക്കാൻ വിസമ്മതിച്ചു

ശ്രീനഗറിൽ നടന്ന ഒരു പ്രദർശനത്തിന്റെ ഉദ്ഘാടന ചടങ്ങിനിടെ, ദേശീയ പതാകയുടെ നിറങ്ങളുള്ള റിബൺ മുറിക്കാൻ ജമ്മു കശ്മീർ മുഖ്യമന്ത്രി ഒമർ അബ്‌ദുള്ള വിസമ്മതിച്ചു. ദേശീയ പതാകയോടുള്ള ആദരസൂചകമായി റിബൺ അഴിച്ചുമാറ്റി സൂക്ഷിക്കാൻ അദ്ദേഹം നിർദ്ദേശിച്ചു, ഈ പ്രവൃത്തിക്ക് സമൂഹമാധ്യമങ്ങളിൽ വലിയ പ്രശംസ ലഭിച്ചു.

ശ്രീനഗർ: ശ്രീനഗറിൽ നടന്ന ഉദ്ഘാടന ചടങ്ങിനിടെ ദേശീയ പതാകയോടുള്ള ആദരസൂചകമായി ത്രിവർണ്ണ റിബൺ മുറിക്കാൻ വിസമ്മതിച്ച് ജമ്മു കശ്മീർ മുഖ്യമന്ത്രി ഒമർ അബ്‌ദുള്ള. ബുധനാഴ്ച ശ്രീനഗറിലെ കാശ്മീർ ഹാറ്റിൽ നടന്ന 'നോ യുവർ ആർട്ടിസാൻ' എന്ന പ്രദർശനത്തിന്റെ ഉദ്ഘാടനത്തിനിടെയാണ് സംഭവം. ഉദ്ഘാടനത്തിനായി കെട്ടിയിരുന്ന റിബൺ ദേശീയ പതാകയുടെ നിറത്തിലുള്ളതാണെന്ന് ശ്രദ്ധയിൽപ്പെട്ട മുഖ്യമന്ത്രി അത് മുറിക്കാൻ തയ്യാറല്ലെന്ന് സംഘാടകരോട് പറയുകയായിരുന്നു.

റിബൺ അഴിച്ചുമാറ്റാൻ അദ്ദേഹം നിർദ്ദേശിച്ചു. അഴിച്ചുമാറ്റിയ റിബൺ മടക്കി ആദരവോടെ സൂക്ഷിക്കണമെന്നും അദ്ദേഹം ഉദ്യോഗസ്ഥരോട് ആവശ്യപ്പെട്ടു. ഈ സംഭവത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചു. ഒമർ അബ്‌ദുള്ളയുടെ നിലപാടിനെ നെറ്റിസൺസ് പ്രശംസിച്ചു. യഥാർത്ഥ രാജ്യസ്നേഹം പ്രവൃത്തിയിലാണെന്നും, ദേശീയ പതാകയോടുള്ള ആദരവ് ഉയർത്തിപ്പിടിച്ച മുഖ്യമന്ത്രിയുടെ നടപടി മാതൃകാപരമെന്നുമാണ് കമൻ്റ് ബോക്സുകളിൽ പലരും അഭിപ്രായപ്പെട്ടത്.

അതേസമയം, ഒരു സർക്കാർ പരിപാടിയിൽ ദേശീയ പതാകയിലെ നിറങ്ങളുള്ള റിബൺ ഉപയോഗിച്ച സംഘാടകരെ ചിലർ വിമർശിച്ചിട്ടുണ്ട്. കശ്മീരിലെ കരകൗശല തൊഴിലാളികളെ പ്രോത്സാഹിപ്പിക്കുന്നതിനായി സംഘടിപ്പിച്ച 'സൗൾഫുൾ കാശ്മീർ' കാമ്പയിന്റെ ഭാഗമായാണ് ഈ പരിപാടി സംഘടിപ്പിച്ചത്.