'ഇന്ത്യക്കെതിരേ യുദ്ധംചെയ്തു'; പഹൽ​ഗാം ഭീകരാക്രമണത്തിൽ കൊടുംഭീകരനും ലഷ്കർ സ്ഥാപകനുമായ ഹാഫിസ് സയീദിനെതിരേ NIA കുറ്റപത്രം

26 പേർ കൊല്ലപ്പെട്ട പ​ഹൽ​ഗാം ഭീകരാക്രമണത്തിൽ കഴിഞ്ഞ ഡിസംബറിലാണ് എൻഐഎ ആദ്യകുറ്റപത്രം സമർപ്പിച്ചത്. 1597 പേജുകളുള്ള ആദ്യ കുറ്റപത്രത്തിൽ ലഷ്കറെ തൊയ്ബയുടെയും അനുബന്ധ സംഘടനയായ ദി റെസിസ്റ്റൻസ് ഫ്രണ്ടി(ടിആർഎഫ്)ന്റെയും അം​ഗങ്ങളായ ഏഴ് ഭീകരരായിരുന്നു പ്രതികൾ.

ന്യൂഡൽഹി: പഹൽ​ഗാം ഭീകരാക്രമണത്തിൽ കൊടുംഭീകരനും പാക് ഭീകരസംഘടനയായ ലഷ്കറെ തൊയ്ബയുടെ സ്ഥാപകനുമായ ഹാഫിസ് സയീദിനെതിരേ ദേശീയ അന്വേഷണ ഏജൻസി(എൻഐഎ) കുറ്റപത്രം സമർപ്പിച്ചു. ഇന്ത്യക്കെതിരേ യുദ്ധം ചെയ്തു, വിദേശത്തിരുന്ന് രാജ്യത്തിനെതിരേ ​ഗൂഢാലോചന നടത്തി തുടങ്ങിയ കുറ്റങ്ങൾ ചുമത്തിയാണ് പഹൽ​ഗാം കേസിൽ എൻഐഎ അധിക കുറ്റപത്രം സമർപ്പിച്ചത്.

26 പേർ കൊല്ലപ്പെട്ട പ​ഹൽ​ഗാം ഭീകരാക്രമണത്തിൽ കഴിഞ്ഞ ഡിസംബറിലാണ് എൻഐഎ ആദ്യകുറ്റപത്രം സമർപ്പിച്ചത്. 1597 പേജുകളുള്ള ആദ്യ കുറ്റപത്രത്തിൽ ലഷ്കറെ തൊയ്ബയുടെയും അനുബന്ധ സംഘടനയായ ദി റെസിസ്റ്റൻസ് ഫ്രണ്ടി(ടിആർഎഫ്)ന്റെയും അം​ഗങ്ങളായ ഏഴ് ഭീകരരായിരുന്നു പ്രതികൾ. ഇതിനുപിന്നാലെയാണ് ലഷ്കർ സ്ഥാപകൻ ഹാഫിസ് സയീദിനെയും പ്രതിചേർത്ത് അന്വേഷണസംഘം ജമ്മുവിലെ എൻഐഎ പ്രത്യേക കോടതിയിൽ അധിക കുറ്റപത്രം സമർപ്പിച്ചത്.

പഹൽ​ഗാം ഭീകരാക്രമണത്തിൽ ഹാഫിസ് സയീദിനും പങ്കുള്ളതായി അന്വേഷണത്തിൽ കണ്ടെത്തിയതായാണ് എൻഐഎ കുറ്റപത്രത്തിൽ പറയുന്നത്. ഇത് തെളിയിക്കുന്ന ശാസ്ത്രീയ തെളിവുകളടക്കം കണ്ടെടുത്തിട്ടുണ്ടെന്നും എൻഐഎ പറഞ്ഞിരുന്നു.