സിങ്കപ്പൂരിലേക്ക് പുറപ്പെടാൻ മിനിറ്റുകൾ മാത്രം; പോക്സോ പ്രതിയും വ്യവസായിയുമായ വീരമണിയുടെ മകളുടെ യാത്ര തടഞ്ഞ് പൊലീസ്, വിമാനത്തിൽനിന്ന് ഇറക്കി

ചെന്നൈ വിമാനത്താവളത്തിൽനിന്ന് വെള്ളിയാഴ്ച ഉച്ചയ്ക്ക് 2.20നുള്ള ഇൻഡി​ഗോ വിമാനത്തിലാണ് അർച്ചന വീരമണി സിങ്കപ്പൂരിലേക്ക് യാത്രതിരിക്കാനിരുന്നത്. എന്നാൽ, വിവരമറിഞ്ഞ് എസ്ഐടി വിമാനത്താവളത്തിലേക്ക് കുതിച്ചെത്തി. വിമാനത്താവള അധികൃതരെ വിവരമറിയിച്ചു.

ചെന്നൈ: പോക്സോ കേസുകളിലെ പ്രതിയും ​ഗ്രാനൈറ്റ് വ്യവസായിയുമായ ആർ വീരമണിയുടെ മകളുടെ വിദേശയാത്ര പൊലീസ് തടഞ്ഞു. ചെന്നൈയിൽനിന്ന് സിങ്കപ്പൂരിലേക്ക് പോകാൻ ശ്രമിച്ച വീരമണിയുടെ മകൾ അർച്ചന വീരമണിയുടെ യാത്രയാണ് പൊലീസ് ഇടപെട്ട് തടഞ്ഞത്. വിമാനത്താവളത്തിലെത്തിയ പ്രത്യേക അന്വേഷണസംഘം(എസ്ഐടി) അർച്ചനയെ വിമാനത്തിൽനിന്ന് ഇറക്കുകയായിരുന്നു.

ചെന്നൈ വിമാനത്താവളത്തിൽനിന്ന് വെള്ളിയാഴ്ച ഉച്ചയ്ക്ക് 2.20നുള്ള ഇൻഡി​ഗോ വിമാനത്തിലാണ് അർച്ചന വീരമണി സിങ്കപ്പൂരിലേക്ക് യാത്രതിരിക്കാനിരുന്നത്. എന്നാൽ, വിവരമറിഞ്ഞ് എസ്ഐടി വിമാനത്താവളത്തിലേക്ക് കുതിച്ചെത്തി. വിമാനത്താവള അധികൃതരെ വിവരമറിയിച്ചു. തുടർന്നാണ് സിങ്കപ്പൂർ വിമാനത്തിൽനിന്ന് അർച്ചനയെ ഇറക്കിയത്. ഇതുകാരണം വിമാനം പത്തുമിനിറ്റിലേറെ വൈകി 2.32നാണ് ചെന്നൈയിൽനിന്ന് പുറപ്പെട്ടത്.

വിമാനത്തിൽനിന്ന് ഇറക്കിയ അർച്ചന വീരമണിയെ വിമാനത്താവളത്തിൽവെച്ച് തന്നെ എസ്ഐടി ചോദ്യംചെയ്തു. ശേഷം പൊലീസ് വാഹനത്തിൽ വിമാനത്താവളത്തിൽനിന്ന് കൊണ്ടുപോവുകയായിരുന്നു.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

വീരമണിക്കെതിരായ പോക്സോ കേസുകളിൽ എസ്ഐടി അന്വേഷണം വ്യാപിപ്പിക്കുന്നതിനിടെയാണ് മകളുടെ വി​ദേശയാത്ര അന്വേഷണസംഘം തടഞ്ഞിരിക്കുന്നത്. ഇതുവരെ ഏഴ് പോക്സോ കേസുകളാണ് വീരമണിക്കെതിരേ രജിസ്റ്റർ ചെയ്തിരിക്കുന്നത്. 11 പെൺകുട്ടികളാണ് ഇതുവരെ പ്രതിക്കെതിരേ പൊലീസിന് മൊഴി നൽകിയത്.

പ്രായപൂർത്തിയാകാത്ത പെൺകുട്ടികളെ പീഡിപ്പിച്ചതിനാണ് തമിഴ്നാട്ടിലെ പ്രമുഖ ​ഗ്രാനൈറ്റ് വ്യവസായിയായ വീരമണി അറസ്റ്റിലായത്. വീരമണി പെൺകുട്ടികളെ ഉപദ്രവിക്കുന്ന ദൃശ്യങ്ങളടങ്ങിയ പെൻഡ്രൈവ് പൊലീസിന് ലഭിച്ചതോടെയാണ് പൊലീസ് ഇയാളെ അറസ്റ്റ് ചെയ്തത്. വീരമണിക്ക് ഒത്താശചെയ്തുനൽകിയ കൂട്ടാളികളായ ശാന്തിയെയും ഇവരുടെ ഭർത്താവ് മഹേന്ദ്ര സിംഹനെയും പൊലീസ് അറസ്റ്റ് ചെയ്തിരുന്നു. ഇതിനുപിന്നാലെ പെൺകുട്ടികളെ എത്തിച്ചുനൽകിയ മൂന്ന് ഡ്രൈവർമാരും പിടിയിലായി. ഇവരെല്ലാം ജയിലിലാണ്.