അമ്മയുടെ കാര്യത്തിൽ ഏതൊരു മകനെയും പോലെ ആശങ്കപ്പെട്ടു, പക്ഷേ ഒരു കാര്യത്തിൽ മാത്രം എനിക്ക് ആശ്വാസമായി...; കേരളത്തിലെ നഴ്സുമാരെ പ്രകീർത്തിച്ച് രാഹുൽ

അമ്മ സോണിയാ ഗാന്ധിയെ ആശുപത്രിയിൽ പ്രവേശിപ്പിച്ചപ്പോൾ തനിക്ക് ആശ്വാസമായത് കേരളത്തിൽ നിന്നുള്ള നഴ്സാണെന്ന് രാഹുൽ ഗാന്ധി. ലോകമെമ്പാടുമുള്ള കേരളത്തിലെ സ്ത്രീകൾ ആളുകളെ ആശ്വസിപ്പിക്കുകയും അവർക്ക് ആശ്വാസം നൽകുകയും ചെയ്യുന്നുവെന്നും ഇതാണ് കേരളത്തിൻ്റെ ആത്മാവെന്നും അദ്ദേഹം കുറിച്ചു.

ദില്ലി: കേരളത്തിലെ നഴ്സുമാരെ പ്രശംസിച്ച് രാഹുൽ ​ഗാന്ധി. കഴിഞ്ഞ ദിവസം അമ്മ സോണിയാ ​ഗാന്ധിയെ ആശുപത്രിയിൽ പ്രവേശിപ്പിച്ചതിന് പിന്നാലെയാണ് രാഹുൽ പ്രശംസയുമായി എത്തിയത്. ഇന്നലെ രാത്രി, ഏതൊരു മകനെയും പോലെ, ഞാൻ ആശുപത്രിയിലെ എന്റെ അമ്മയുടെ മുറിയിലെ ഒരു ചെറിയ സോഫയിൽ ഉറങ്ങുകയായിരുന്നു. അവരുടെ ആരോഗ്യത്തെക്കുറിച്ച് ഞാൻ വളരെയധികം ആശങ്കാകുലനായിരുന്നു.

എന്നാൽ രാത്രി മുഴുവൻ, ഒരു കാര്യം മാത്രം എന്നെ ആശ്വസിപ്പിച്ചു. എന്റെ അമ്മയെ പരിശോധിക്കാൻ ഓരോ മണിക്കൂറിലും വരുന്ന കേരളത്തിൽ നിന്നുള്ള നഴ്‌സായിരുന്നു എന്നതായിരുന്നു അത്. ഓരോ മണിക്കൂറിലും അവർ വന്ന് പരിശോധിക്കും. പുഞ്ചിരിക്കും, അവരുടെ കൈ പിടിക്കും. കേരളത്തിലെ നഴ്‌സുമാർ എത്ര ആൺമക്കളെയും, പെൺമക്കളെയും, സഹോദരന്മാരെയും, സഹോദരിമാരെയും അവരുടെ ഏറ്റവും പ്രയാസകരമായ നിമിഷങ്ങളിൽ ആശ്വസിപ്പിച്ചിട്ടുണ്ടെന്ന് ഞാൻ ചിന്തിച്ചു.

രാത്രി ഉറങ്ങുമോ, അതോ രാത്രി മുഴുവൻ ജോലി ചെയ്യുമോ എന്ന് ഞാൻ ചോദിച്ചു. രാത്രി മുഴുവൻ ജോലി ചെയ്യുന്നുവെന്നായിരുന്നു മറുപടി. അങ്ങനെ, ലോകം മുഴുവൻ ഉറങ്ങുമ്പോൾ, കേരളത്തിൽ മാത്രമല്ല, ദില്ലിയിലും, രാജ്യത്തുടനീളവും, ലോകമെമ്പാടുമുള്ള, കേരളത്തിലെ സ്ത്രീകൾ, ആളുകളെ ആശ്വസിപ്പിക്കുകയും, അവരുടെ കൈകൾ പിടിച്ച്, അവർക്ക് ആശ്വാസം നൽകുകയും ചെയ്യുന്നു. ഇതാണ് കേരള സംസ്ഥാനത്തിന്റെ ആത്മാവ്- രാഹുൽ കുറിച്ചു.