27 വർഷത്തിന് ശേഷം അയോധ്യയിലെ രാംലല്ല വി​ഗ്രഹം മാറ്റി സ്ഥാപിച്ചു

1992 ഡിസംബർ 6 ന് ശേഷം ആദ്യമായാണ് വി​ഗ്രഹം മാറ്റി സ്ഥാപിക്കുന്നത്. ശ്രീരാം ജന്മഭൂമി ക്ഷേത്ര ട്രസ്റ്റ് അം​ഗങ്ങളും ചടങ്ങിൽ പങ്കെടുത്തു

ലഖ്‌നൗ:  27 വർഷത്തിന് ശേഷം അയോധ്യയിലെ രാം ലല്ല (രാമവി​ഗ്രഹം) വി​ഗ്രഹം മാറ്റി സ്ഥാപിച്ചു. ഇപ്പോൾ വി​ഗ്രഹം സ്ഥിതി ചെയ്തിരുന്ന താത്കാലിക കൂടാരത്തിൽ നിന്നും ശ്രീരാമ ക്ഷേത്രനിര്‍മ്മാണം നടക്കുന്നതിന് സമീപത്ത് പ്രത്യേകം നിര്‍മ്മിച്ച സ്ഥലത്തേക്ക് പ്രത്യേക പൂജകള്‍ക്ക് ശേഷമാണ് വിഗ്രഹം മാറ്റിയത്. ഉത്തർപ്രദേശ് മുഖ്യമന്ത്രി യോ​ഗി ആദിത്യനാഥ് ചടങ്ങിൽ പങ്കെടുത്തു. ഒൻപത് ദിവസം നീണ്ടുനിൽക്കുന്ന നവരാത്രി ആഘോഷത്തിന്റെ ആദ്യ ദിവസമായ ബുധനാഴ്ച പുലർച്ചെ നാലരയോടെയാണ് ചടങ്ങ് സംഘടിപ്പിച്ചത്. 1992 ഡിസംബർ 6 ന് ശേഷം ആദ്യമായാണ് വി​ഗ്രഹം മാറ്റി സ്ഥാപിക്കുന്നത്. ശ്രീരാം ജന്മഭൂമി ക്ഷേത്ര ട്രസ്റ്റ് അം​ഗങ്ങളും ചടങ്ങിൽ പങ്കെടുത്തു. 

ദില്ലി, വാരണാസി, അയോധ്യ എന്നിവിടങ്ങളിലെ പുരോഹിതർക്കൊപ്പമാണ് മുഖ്യമന്ത്രി യോ​ഗി ആദിത്യനാഥ് ചടങ്ങിൽ പങ്കാളിയായത്. മുഖ്യമന്ത്രിയുൾപ്പെടെ നാലുപേർ പല്ലക്കിൽ ചുമന്നാണ് വി​ഗ്രഹത്തെ താത്ക്കാലിക സ്ഥലത്ത് നിന്നും മീറ്ററുകൾ ദൂരമുള്ള ക്ഷേത്രത്തിലേക്ക് മാറ്റി സ്ഥാപിച്ചത്. രാമക്ഷേത്രം നിർമ്മിക്കുന്നതിനുള്ള ആദ്യപടി എന്ന നിലയിലാണ് ഈ രാമവി​ഗ്രഹം മാറ്റിയത്. 1992 ന് ശേഷം ആദ്യമായാണ് രാംലാലാ വിഗ്രഹം താത്കാലിക കൂടാരത്തില്‍ നിന്നും ക്ഷേത്രത്തിലേക്ക് മാറ്റുന്നത് എന്നും അധികൃതര്‍ വ്യക്തമാക്കി. ആന്ധ്രാപ്രദേശ്, ദില്ലി, ഹരിദ്വാർ, മഥുര, വരണാസി, അയോധ്യ എന്നിവിടങ്ങളിലെ പുരോഹിതർ ചടങ്ങിൽ പങ്കെടുത്തു. വി​ഗ്രഹം മാറ്റി സ്ഥാപിക്കുന്നതിന്റെ മുന്നോടിയായി തിങ്കളാഴ്ച രാവിലെ മുതൽ രാമജന്മഭൂമിയിൽ ആരംഭിച്ച ചടങ്ങുകൾ ചൊവ്വാഴ്ച വരെ നീണ്ടുനിന്നു.