പുതിയ ചെരിപ്പ് വാങ്ങിക്കൊടുത്തില്ല; അപ്പൂപ്പനും അമ്മൂമ്മക്കുമൊപ്പം താമസിച്ചിരുന്ന പത്ത് വയസ്സുകാരൻ ജീവനൊടുക്കി

തിങ്കളാഴ്ചയാണ് കുട്ടി പുതിയ ചെരിപ്പ് വേണമെന്ന് ആവശ്യപ്പെട്ടത്. എന്നാൽ മുത്തശ്ശനും മുത്തശ്ശിയും ആവശ്യം അം​ഗീകരിച്ചില്ല. 

ഔ​റം​ഗബാദ്: പുതിയ ചെരിപ്പ് വാങ്ങിക്കൊടുക്കാത്തതിന്റെ പേരിൽ പത്തുവയസ്സുകാരൻ ജീവനൊടുക്കി. മഹാരാഷ്ട്രയിലെ ബീഡ് ജില്ലയിലാണ് പത്തുവയസ്സുകാരൻ തൂങ്ങിമരിച്ചതെന്ന് പൊലീസ് ഉദ്യോ​ഗസ്ഥർ വ്യക്തമാക്കി. തിങ്കളാഴ്ച ഉച്ചയോടെയാണ്  സംഭവം. കുട്ടി അമ്മയുടെ മാതാപിതാക്കൾക്കൊപ്പമാണ് താമസിച്ചിരുന്നത്. കുട്ടിയുടെ മാതാപിതാക്കൾ അയൽ​​ഗ്രാമത്തിലാണുള്ളത്. ഇവർ കർഷകരാണ്. തിങ്കളാഴ്ചയാണ് കുട്ടി പുതിയ ചെരിപ്പ് വേണമെന്ന് ആവശ്യപ്പെട്ടത്. എന്നാൽ മുത്തശ്ശനും മുത്തശ്ശിയും ആവശ്യം അം​ഗീകരിച്ചില്ല. 

തുടർന്ന് താൻ മാതാപിതാക്കളുടെ വീട്ടിൽ പോകുകയാണെന്ന് കുട്ടി ഇവരോട് പറഞ്ഞതായി പൊലീസ് ഉദ്യോ​ഗസ്ഥർ വെളിപ്പെടുത്തി. മാതാപിതാക്കളുടെ വീട്ടിലേക്കുള്ള യാത്രാമധ്യേയാണ് കുട്ടി മരത്തിൽ തൂങ്ങി മരിച്ചതെന്നാണ് പ്രാഥമിക അന്വേഷണത്തിൽ വ്യക്തമായതെന്നും പൊലീസ് അറിയിച്ചു. സംഭവത്തെക്കുറിച്ച് അന്വേഷണം പ്രഖ്യാപിച്ചതായും പൊലീസ് കൂട്ടിച്ചേർത്തു.