കഴിഞ്ഞ 25 വർഷത്തിനിടെ ലോക്സഭയിൽ ബിജെപിയും കോൺ​ഗ്രസും നേരിട്ട് ഏറ്റുമുട്ടിയപ്പോൾ ആർക്കായിരുന്നു ജയം, കണക്കുകൾ

2009ലാണ് കോൺ​ഗ്രസ് ബിജെപിയുമായി പിടിച്ചുനിന്നത്. കോൺ​ഗ്രസിന്റെ നേതൃത്വത്തിലുള്ള യുപിഎ ഭരണത്തുടർച്ച നേടിയ വർഷമായിരുന്നു അത്.

ദില്ലി: കഴിഞ്ഞ 25 വർഷത്തെ ലോക്സഭാ തെരഞ്ഞെടുപ്പിന്റെ ചരിത്രമെടുക്കുമ്പോൾ കോൺ​ഗ്രസ്-ബിജെപി നേരിട്ടുള്ള ഏറ്റുമുട്ടലലിൽ മുൻതൂക്കം ബിജെപിക്ക്. 1998ലെ തെരഞ്ഞെടുപ്പിൽ 477 സീറ്റിൽ കോൺ​ഗ്രസ് മത്സരിച്ചു. ബിജെപി 388 സീറ്റിലും. ഇതിൽ നേർക്കുനേർ 173 സീറ്റുകളിൽ ഇരു പാർട്ടികളും ഏറ്റുമുട്ടി. 95 സീറ്റിൽ ബിജെപി വിജയക്കൊടി പാറിച്ചപ്പോൾ കോൺ​ഗ്രസ് 78 ഇടത്ത് വിജയിച്ചു. 1999ൽ അടൽ ബിഹാരി വാജ്പേയിയുടെ നേതൃത്വത്തിൽ ബിജെപിയും സോണിയാ ​ഗാന്ധിയുടെ നേതൃത്വത്തിൽ കോൺ​ഗ്രസും തെരഞ്ഞെടുപ്പ് ​ഗോദയിലിറങ്ങി.

ബിജെപി 399 സീറ്റിലാണ് മത്സരിച്ചത്. കോൺ​ഗ്രസ് 453 സീറ്റിൽ മത്സരിച്ചു. ഇരുപാർട്ടികളും 197 സീറ്റിൽ നേർക്കുനേർ ഏറ്റുമുട്ടിയപ്പോൾ 137 സീറ്റിൽ ബിജെപി വിജയിച്ചു. 60 സീറ്റിൽ കോൺ​ഗ്രസും. 2004ൽ ഇന്ത്യ തിളങ്ങുന്ന എന്ന മുദ്രാവാക്യവുമായി വാജ്പേയിയുടെ നേതൃത്വത്തിൽ ബിജെപി വീണ്ടും 364 സീറ്റിൽ മത്സരിച്ചു. കോൺ​ഗ്രസ് 417 ഇടത്തും മത്സരിച്ചു. 181 സീറ്റിലാണ് നേർക്കുനേർ ഏറ്റുമുട്ടിയത്. 110 മണ്ഡലങ്ങളിൽ ബിജെപി വിജയിച്ചപ്പോൾ 71 ഇടത്ത് കോൺ​ഗ്രസ് വിജയിച്ചു.

2009ലാണ് കോൺ​ഗ്രസ് ബിജെപിയുമായി പിടിച്ചുനിന്നത്. കോൺ​ഗ്രസിന്റെ നേതൃത്വത്തിലുള്ള യുപിഎ ഭരണത്തുടർച്ച നേടിയ വർഷമായിരുന്നു അത്. 440 സീറ്റിൽ കോൺ​ഗ്രസും 433 സീറ്റിൽ ബിജെപിയും മത്സരിച്ചു. 174 സീറ്റിൽ നേർക്കുനേർ ഏറ്റുമു‌ട്ടി. നേർക്കുനേർ പോരാട്ടത്തിൽ 89 സീറ്റിൽ കോൺ​ഗ്രസും 85 സീറ്റിൽ ബിജെപിയും വിജയിച്ചു. 2014ലും 2019 കോൺ​ഗ്രസിന്റേത് ദയനീയ പ്രകടനമായിരുന്നു.

Read More... മോദി നിർമ്മിച്ചത് വെള്ളമില്ലാത്ത കക്കൂസ്, നടക്കാത്ത ഗ്യാരന്റി കൾ ചത്തുമലച്ചു കിടക്കുന്നു: ബിനോയ് വിശ്വം

2014ൽ കോൺ​ഗ്രസ് 464 മണ്ഡലങ്ങളിലും ബിജെപി 428 മണ്ഡലങ്ങളിലും മത്സരിച്ചു. 187 മണ്ഡലങ്ങളിൽ നേർക്കുനേർ മത്സരിച്ചു. 167 സീറ്റ് നേടി ബിജെപി കരുത്തുകാട്ടിയപ്പോൾ വെറും 20 സീറ്റിലാണ് കോൺ​ഗ്രസ് ജയിച്ചത്. 2019ൽ ബിജെപി 436 മണ്ഡലങ്ങളിലും കോൺ​ഗ്രസ് 303 മണ്ഡലങ്ങളിലും മത്സരിച്ചു. 190 സീറ്റിൽ നേരിട്ട് മത്സരിച്ചു. ബിജെപി 175 മണ്ഡലങ്ങളിൽ ജയിച്ചപ്പോൾ കോൺ​ഗ്രസിന്റെ സംഖ്യ വെറും 15ലേക്ക് ചുരുങ്ങി.