ഇന്ത്യയിലെ നി​ഗൂഢമായ തടാകം; മഞ്ഞ് ഉരുകുമ്പോൾ തെളിയുന്നത് തലയോട്ടികൾ, രൂപ്കുണ്ഡ് തടാകത്തിലെ ഞെട്ടിക്കുന്ന കാഴ്ചകൾ

ഉത്തരാഖണ്ഡിലെ ഹിമാലയൻ മലനിരകളിൽ സ്ഥിതി ചെയ്യുന്ന രൂപ്കുണ്ട് തടാകം, 'അസ്ഥികൂടം തടാകം' എന്ന പേരിലാണ് അറിയപ്പെടുന്നത്. നൂറുകണക്കിന് മനുഷ്യ അസ്ഥികൂടങ്ങളാണ് ഇവിടെ കാണപ്പെടാറുള്ളത്. 

ഉത്തരാഖണ്ഡിലെ ചമോലി ജില്ലയിൽ, സമുദ്രനിരപ്പിൽ നിന്ന് ഏകദേശം 16,500 അടി ഉയരത്തിൽ സ്ഥിതി ചെയ്യുന്ന ഒരു തടാകമുണ്ട്. ലോകത്തെ തന്നെ അതിശയിപ്പിക്കുന്നതും ഭീതിയുണർത്തുന്നതുമായ ഒരു അസ്ഥികൂടം തടാകം. രൂപ്കുണ്ട് തടാകം എന്ന പേരിലാണ് ഇത് അറിയപ്പെടുന്നത്. മഞ്ഞുമൂടിയ ഹിമാലയൻ മലനിരകളുടെ നടുവിൽ ഒളിഞ്ഞിരിക്കുന്ന ഈ തടാകം, സാഹസിക യാത്രികർക്കും ഗവേഷകർക്കും പ്രിയപ്പെട്ട ഇടമാണ്.

മഞ്ഞ് ഉരുകുമ്പോൾ പുറത്തുവരുന്ന അസ്ഥികൂടങ്ങൾ

വർഷത്തിലെ ഭൂരിഭാഗം സമയവും കട്ടിയുള്ള മഞ്ഞും ഐസും മൂടിക്കിടക്കുന്ന രൂപ്കുണ്ട് തടാകം, വേനൽക്കാലത്ത് മഞ്ഞ് ഉരുകുമ്പോൾ ഒരു ഭീകര രഹസ്യം പുറത്തെടുക്കും. തടാകത്തിനുള്ളിലും ചുറ്റുപാടുകളിലുമായി നൂറുകണക്കിന് മനുഷ്യ അസ്ഥികൂടങ്ങളും തലയോട്ടികളും തെളിഞ്ഞുകാണാം. ഇതാണ് ‘സ്കെൽട്ടൺ ലേക്ക്’ എന്ന പേര് ലോകം മുഴുവൻ അറിയപ്പെടാൻ കാരണം.

അസ്ഥികൂടങ്ങൾ എവിടെ നിന്നെത്തി?

1940-കളിലാണ് ബ്രിട്ടീഷ് ഭരണകാലത്ത് ഈ തടാകത്തെക്കുറിച്ചുള്ള ആദ്യ ഔദ്യോഗിക രേഖകൾ പുറത്തുവന്നത്. തുടക്കത്തിൽ ഇത് യുദ്ധവുമായി ബന്ധപ്പെട്ട സംഭവമാണെന്നായിരുന്നു സംശയം. എന്നാൽ പിന്നീട് നടന്ന ശാസ്ത്രീയ പഠനങ്ങൾ വ്യത്യസ്തമായ കഥയാണ് പറയുന്നത്. ഡിഎൻഎ പരിശോധനകളും കാർബൺ ഡേറ്റിങ്ങും നടത്തിയപ്പോൾ, ഈ അസ്ഥികൂടങ്ങൾ ഒരേ കാലഘട്ടത്തിലേതല്ല എന്നും, വ്യത്യസ്ത കാലങ്ങളിൽ ഇവിടെ മരിച്ച ആളുകളുടേതാണെന്നും കണ്ടെത്തി. ചില അസ്ഥികൂടങ്ങൾ ഏകദേശം 9-ാം നൂറ്റാണ്ടിലേതാണെന്ന് ഗവേഷകർ പറയുന്നു.

ശാസ്ത്രലോകത്ത് കൂടുതൽ അംഗീകരിക്കപ്പെട്ടിരിക്കുന്ന ഒരു സിദ്ധാന്തം അനുസരിച്ച്, രൂപ്കുണ്ടിന് സമീപം യാത്ര ചെയ്തിരുന്ന ഒരു സംഘം ഭീകരമായ ആലിപ്പഴ വർഷത്തിൽ അകപ്പെട്ട് മരിച്ചതാകാമെന്നാണ് വിലയിരുത്തൽ. നന്ദാദേവി ക്ഷേത്രത്തിലേക്കുള്ള തീർത്ഥാടകരാകാം ഇതെന്നും കരുതുന്നു. അസ്ഥികൂടങ്ങളിൽ കണ്ട ആഴമുള്ള മുറിവുകളാണ് ഈ നിഗമനത്തിന് കാരണം. അതേസമയം, പ്രാദേശികമായി ഒരു രാജാവും അനുയായികളും നടത്തിയ തീർത്ഥയാത്ര ദുരന്തത്തിൽ കലാശിച്ചതാണെന്ന കഥകളും നിലനിൽക്കുന്നു.

സാഹസിക യാത്രികർക്കുള്ള ലക്ഷ്യസ്ഥാനം

ഇന്ന് രൂപ്കുണ്ട് തടാകം ഒരു ട്രെക്കിംഗ് ഡെസ്റ്റിനേഷൻ ആണ്. കടുത്ത കാലാവസ്ഥയും കഠിനമായ പാതകളും കാരണം, പരിചയസമ്പന്നരായ ട്രെക്കർമാർക്കാണ് ഈ യാത്ര ശുപാർശ ചെയ്യപ്പെടുന്നത്. മികച്ച സമയം മെയ് മുതൽ ജൂൺ വരെയും സെപ്റ്റംബർ മുതൽ ഒക്ടോബർ വരെയും ആണ്. അസ്ഥികൂടങ്ങൾ സംരക്ഷിക്കേണ്ട പുരാവസ്തുവായതിനാൽ, സർക്കാർ അധികൃതർ അസ്ഥികൾ നീക്കം ചെയ്യുകയോ സ്പർശിക്കുകയോ ചെയ്യരുതെന്ന് കർശന നിർദേശം നൽകിയിട്ടുണ്ട്. പ്രകൃതിയെയും ചരിത്രത്തെയും മാനിച്ച് യാത്ര ചെയ്യണമെന്ന് അധികൃതർ മുന്നറിയിപ്പ് നൽകുന്നു.

പ്രകൃതിയുടെ മനോഹാരിതയും ചരിത്രത്തിന്റെ ഭീകരതയും ഒരുമിച്ചുകൂടുന്ന അപൂർവമായ സ്ഥലമാണ് രൂപ്കുണ്ഡ് തടാകം. ഒരു യാത്ര, ഇവിടെ എത്തുന്നവർക്ക് കാഴ്ചയുടെ അനുഭവം മാത്രമല്ല, മനസ്സിൽ ഒരിക്കലും മായാത്ത ഒരു രഹസ്യവും സമ്മാനിക്കും, ഉറപ്പ്...