ലോക നേതാക്കളുടെ അപ്രൂവല്‍ റേറ്റിംഗില്‍ ഒന്നാം സ്ഥാനത്ത് നരേന്ദ്രമോദി

സെപ്തംബര്‍ 2ന് പ്രസിദ്ധീകരിച്ച അപ്ഡേറ്റ് പ്രകാരം പ്രധാനമന്ത്രി നരേന്ദ്രമോദിയുടെ അപ്രൂവല്‍ റേറ്റിംഗ് 70 ശതമാനത്തിലാണ്.

ദില്ലി: ലോക നേതാക്കളുടെ അപ്രൂവല്‍ റേറ്റിംഗില്‍ ഒന്നാം സ്ഥാനത്ത് എത്തി ഇന്ത്യന്‍ പ്രധാനമന്ത്രി നരേന്ദ്രമോദി. മോണിംഗ് കണ്‍സള്‍ട്ട് പൊളിറ്റിക്കല്‍ ഇന്‍റലിജന്‍സാണ് ഈ പട്ടിക പ്രസിദ്ധീകരിക്കുന്നത്. ഓസ്ട്രേലിയ, ബ്രസീല്‍, കാനഡ, ഫ്രാന്‍സ്, ജര്‍മ്മനി, ഇന്ത്യ, ഇറ്റലി, ജപ്പാന്‍, മെക്സിക്കോ, ദക്ഷിണ കൊറിയ, സ്പെയിന്‍, യുകെ, യുഎസ്എ എന്നീ രാജ്യങ്ങളിലെ രാഷ്ട്ര തലവന്മാരാണ് ഈ പട്ടികയില്‍ ഉള്ളത്.

സെപ്തംബര്‍ 2ന് പ്രസിദ്ധീകരിച്ച അപ്ഡേറ്റ് പ്രകാരം പ്രധാനമന്ത്രി നരേന്ദ്രമോദിയുടെ അപ്രൂവല്‍ റേറ്റിംഗ് 70 ശതമാനത്തിലാണ്. മെക്സിക്കന്‍ പ്രസിഡന്‍റ് ലോപ്പസ് ഓബ്റഡാറോയാണ് രണ്ടാം സ്ഥാനത്ത് ഇദ്ദേഹത്തിന്‍റെ റേറ്റിംഗ് 64 ശതമാനമാണ്. അമേരിക്കന്‍ പ്രസിഡന്‍റ് ജോ ബൈഡന്‍ ഈ പട്ടികയില്‍ അഞ്ചാം സ്ഥാനത്താണ് ഇദ്ദേഹത്തിന്‍റെ റേറ്റിംഗ് 48 ശതമാനമാണ്. ജാപ്പനീസ് പ്രധാനമന്ത്രി യോഷിഹിഡെ സുഗായാണ് ഈ റേറ്റിംഗില്‍ ഏറ്റവും അവസാനം അദ്ദേഹത്തിന്‍റെ റേറ്റിംഗ് 25 ശതമാനമാണ്. 

മെയ് മാസത്തോടെ മോദിയുടെ അപ്രൂവല്‍ റേറ്റിംഗില്‍ ചെറിയ ഇടിവ് സംഭവിച്ചെങ്കിലും ആഗസ്റ്റ് മാസം കഴിയുമ്പോള്‍ അത് കൂടിയെന്നാണ് മോണിംഗ് കണ്‍സള്‍ട്ടിന്‍റെ ഗ്രാഫുകള്‍ നല്‍കുന്ന സൂചന. 2,126 സംപിളുകളില്‍ നിന്നാണ് ഇത്തരം ഒരു ഡാറ്റ തയ്യാറാക്കിയത് എന്നാണ് കണക്കുകള്‍ പറയുന്നത്. 

കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്‌സിന്‍ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്‍ത്ഥിക്കുന്നു. ഒന്നിച്ച് നിന്നാല്‍ നമുക്കീ മഹാമാരിയെ തോല്‍പ്പിക്കാനാവും. #BreakTheChain #ANCares #IndiaFightsCorona