
ഷെൻഷെൻ: ലോകം ഉറ്റുനോക്കിയ അമേരിക്കൻ പ്രസിഡന്റ് ഡോണൾഡ് ട്രംപ്, റഷ്യൻ പ്രസിഡന്റ് വ്ലാഡിമിർ പുടിൻ, ചൈനീസ് പ്രസിഡന്റ് ഷീ ജിൻപിങ് എന്നിവരുടെ നിർണ്ണായക ത്രികക്ഷി കൂടിക്കാഴ്ച ചൈനയിലെ ഷെൻഷെനിൽ പൂർത്തിയായി. 80 മിനിറ്റ് നീണ്ടുനിന്ന ചർച്ചയ്ക്ക് ശേഷം മൂന്ന് ലോകനേതാക്കളും സംയുക്ത പ്രഖ്യാപനം പുറത്തിറക്കി. പുടിനെ സുഹൃത്ത് എന്ന് അഭിസംബോധന ചെയ്ത ട്രംപ്, സൗഹൃദപരമായ നിലപാടാണ് സ്വീകരിച്ചത്. അമേരിക്കയും റഷ്യയും ചൈനയും ചരിത്രത്തിൽ നിന്ന് പാഠം ഉൾക്കൊണ്ട് ഒരുമിച്ച് നിൽക്കണമെന്ന് ഷീ ജിൻപിങ് ആഹ്വാനം ചെയ്തു. നിലവിലെ അന്താരാഷ്ട്ര സാഹചര്യങ്ങളെക്കുറിച്ച് മൂന്ന് രാഷ്ട്രത്തലവന്മാരും ആഴത്തിൽ ആശയവിനിമയം നടത്തിയതായി സംയുക്ത പ്രഖ്യാപനത്തിൽ വ്യക്തമാക്കുന്നു.
ആണവയുദ്ധം ഒരിക്കലും ഉണ്ടാകാൻ പാടില്ലെന്ന് മൂന്ന് നേതാക്കളും ഒരേസ്വരത്തിൽ വ്യക്തമാക്കി. ആണവ അപകടസാധ്യതകളും ആണവായുധ വ്യാപനവും കുറയ്ക്കുന്നതിനായി തുടർചർച്ചകൾ നടത്താൻ യോഗത്തിൽ ധാരണയായി. ആഗോള വെല്ലുവിളികളെ ഫലപ്രദമായി നേരിടുന്നതിനായി ഐക്യരാഷ്ട്രസഭയിൽ സമഗ്രമായ പരിഷ്കാരങ്ങൾ കൊണ്ടുവരുമെന്നും നേതാക്കൾ പ്രഖ്യാപിച്ചു.
ആഗോള വിപണിയിൽ സുഗമമായ ഊർജ്ജ പ്രവാഹം ഉറപ്പാക്കാൻ പെട്രോളിയം ഉൽപ്പന്നങ്ങളുടെ ഉൽപ്പാദനവും വിതരണവും വർധിപ്പിക്കാനും ചർച്ചയിൽ തീരുമാനമായി. എല്ലാ രാഷ്ട്രങ്ങളുടെയും പരമാധികാരത്തെ മാനിക്കണമെന്നും അന്താരാഷ്ട്ര ക്രിമിനൽ കോടതി തങ്ങളുടെ അധികാരപരിധി ദുരുപയോഗം ചെയ്യരുതെന്നും സംയുക്ത പ്രഖ്യാപനം ആവശ്യപ്പെടുന്നു. അന്താരാഷ്ട്ര സുരക്ഷയും സ്ഥിരതയും നിലനിർത്താൻ മൂന്ന് രാജ്യങ്ങളും പ്രതിജ്ഞാബദ്ധരാണെന്നും നേതാക്കൾ വ്യക്തമാക്കി.
ആശയങ്ങളുടെ ഉത്സവം- അഗോറയില് രജിസ്റ്റര് ചെയ്യാൻ ഇവിടെ ക്ലിക് ചെയ്യുക
ഇന്ത്യയിലെയും ലോകമെമ്പാടുമുള്ള എല്ലാ International News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam Live News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam