സമാധാന നിർദ്ദേശം ട്രംപ് തള്ളിയിട്ടും നിലപാട് ആവർത്തിച്ച് ഇറാൻ; 'പ്രതിസന്ധികൾക്ക് ചർച്ചകളിലൂടെയേ പരിഹാരം കാണാനാകൂ'

ഹോർമുസ് കടലിടുക്ക് തുറക്കുന്നതുമായി ബന്ധപ്പെട്ട് ഇറാൻ മുന്നോട്ടുവെച്ച സമാധാന നിർദ്ദേശം അമേരിക്കൻ പ്രസിഡന്റ് ഡൊണാൾഡ് ട്രംപ് തള്ളി. ഉപരോധങ്ങൾ പിൻവലിക്കണമെന്ന ഇറാന്റെ ആവശ്യമാണ് അമേരിക്കയെ പിന്തിരിപ്പിച്ചത്. നയതന്ത്ര ചർച്ചകളിലൂടെ മാത്രമേ പ്രശ്നപരിഹാരം സാധ്യമാകൂ എന്ന് ഇറാൻ വ്യക്തമാക്കുമ്പോഴും മേഖലയിൽ യുദ്ധഭീതി തുടരുകയാണ്.

ടെഹ്റാൻ: ഹോർമുസ് കടലിടുക്ക് വീണ്ടും തുറക്കുന്നതിനും യുദ്ധം അവസാനിപ്പിക്കുന്നതിനുമായി മുന്നോട്ടുവെച്ച സമാധാന നിർദ്ദേശം അമേരിക്കൻ പ്രസിഡന്റ് ഡൊണാൾഡ് ട്രംപ് തള്ളിയതിനു പിന്നാലെ നിലപാട് ആവർത്തിച്ച് ഇറാൻ. നയതന്ത്ര ചർച്ചകളിലൂടെ മാത്രമേ തർക്കങ്ങൾ പരിഹരിക്കാൻ സാധിക്കൂ എന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി സോഷ്യൽ മീഡിയയിലൂടെ വ്യക്തമാക്കി. തങ്ങളുടെ വ്യവസ്ഥകൾ വ്യക്തമാണെന്ന് പറഞ്ഞ അദ്ദേഹം, ഹോർമുസ് കടലിടുക്ക് തുറക്കുന്നതുമായി ബന്ധപ്പെട്ട ഏതൊരു നീക്കവും ഉപാധികൾ അംഗീകരിക്കുന്നതിനെ ആശ്രയിച്ചിരിക്കുമെന്നും പ്രതികരിച്ചു.

ന്യൂയോർക്കിൽ നടന്ന യു.എൻ പൊതുസഭയിലാണ് ഖത്തറി മധ്യസ്ഥർ മുഖേന ഇറാൻ സമാധാന നിർദ്ദേശം മുന്നോട്ടുവെച്ചത്. ശനിയാഴ്ച മാധ്യമങ്ങളെ കണ്ട യു.എസ് പ്രസിഡന്റ് ഡൊണാൾഡ് ട്രംപ് ഈ നിർദ്ദേശം നിരസിച്ചതായി അറിയിച്ചു. ഇറാന്റെ പരാജയവും നിരാശയുമാണ് ഇത്തരമൊരു കരാറിനായി അവരെ പ്രേരിപ്പിക്കുന്നതെന്ന് ട്രംപ് ആരോപിച്ചു. എന്നാൽ, നയതന്ത്ര ചർച്ചക്കുള്ള വാതിലുകൾ അടച്ചിട്ടില്ലെന്ന് വ്യക്തമാക്കിയ ട്രംപ്, ഈ ആഴ്ച യു.എസ് പ്രതിനിധികൾ കൂടുതൽ ചർച്ചകളിൽ പങ്കെടുത്തേക്കുമെന്നും മറ്റൊരു അഭിമുഖത്തിൽ സൂചിപ്പിച്ചു.

യു.എസ് ഔദ്യോഗികമായി ഇറാന്റെ നിർദ്ദേശം തള്ളിയ വിവരം മധ്യസ്ഥർ ഇതുവരെ തങ്ങളെ അറിയിച്ചിട്ടില്ലെന്ന് അരാഗ്ചി പറഞ്ഞു. മധ്യസ്ഥരിൽ നിന്നുള്ള അന്തിമ നിലപാടിനായി കാത്തിരിക്കുകയാണെന്നും അതിനനുസരിച്ച് തീരുമാനമെടുക്കുമെന്നും അദ്ദേഹം കൂട്ടിച്ചേർത്തു. അതേസമയം, ഉപരോധങ്ങൾ ഉടനടി പിൻവലിക്കണമെന്നും മരവിപ്പിച്ച സ്വത്തുക്കൾ വിട്ടുനൽകണമെന്നും ഇറാൻ ആവശ്യപ്പെട്ടതിനാലാണ് ട്രംപ് പദ്ധതി നിരസിച്ചതെന്ന് യു.എന്നിലെ യു.എസ് അംബാസഡർ മൈക്ക് വാൾട്സ് വ്യക്തമാക്കി. ഇറാൻ ആത്മാർത്ഥതയോടെയാണോ ചർച്ചയ്ക്ക് എത്തുന്നതെന്ന് സംശയമുണ്ടെന്നും അദ്ദേഹം പറഞ്ഞു.

ഹോർമുസ് കടലിടുക്കിലൂടെയുള്ള കപ്പൽ ഗതാഗതം തടയുന്ന ആക്രമണങ്ങൾ അവസാനിപ്പിക്കാൻ അമേരിക്ക ഇറാന് മേൽ സാമ്പത്തിക ഉപരോധം ഏർപ്പെടുത്തിയിട്ടുണ്ട്. ഇറാന് വ്യാപാരം നടത്താൻ സാധിക്കാത്ത സാഹചര്യത്തിൽ മറ്റാർക്കും ഈ മേഖലയിലൂടെ വ്യാപാരം നടത്താൻ കഴിയില്ലെന്ന് ഇറാന്റെ സൈനിക തലവൻ ആമിർ ഹാതമി മുന്നറിയിപ്പ് നൽകി. ഫെബ്രുവരി 28-ന് യു.എസും ഇസ്രായേലും സംയുക്ത ആക്രമണങ്ങളോടെ തുടങ്ങിയ യുദ്ധം ഇതിനോടകം പതിനായിരക്കണക്കിന് ആളുകളുടെ ജീവനെടുക്കുകയും ആഗോള എണ്ണ വിതരണത്തെ ബാധിക്കുകയും ചെയ്തിട്ടുണ്ട്. തങ്ങൾ യുദ്ധം ആഗ്രഹിക്കുന്നില്ലെന്നും എന്നാൽ ഏത് തരം സമ്മർദ്ദങ്ങളെയും ഭീഷണികളെയും നേരിടാൻ തയ്യാറാണെന്നും ഇറാൻ പ്രസിഡന്റ് മസൂദ് പെസെഷ്കിയാൻ വ്യക്തമാക്കി.