അടുത്ത 72 മണിക്കൂറുകൾ അതിനി‌ർണായകം; യുഎസ് എന്തോ പ്ലാൻ ചെയ്യുന്നു, ഉന്നത ഉദ്യോ​ഗസ്ഥരെല്ലാം വൈറ്റ് ഹൗസിൽ എത്തിയതോടെ അഭ്യൂഹം ശക്തം

ഇറാനുമായുള്ള വെടിനിർത്തൽ ഉടമ്പടി അവസാനിക്കാനിരിക്കെ, അമേരിക്കൻ ഭരണകൂടത്തിലെ ഉന്നതർ വൈറ്റ് ഹൗസിൽ അടിയന്തര യോഗങ്ങൾ ചേരുന്നു. നയതന്ത്രം പരാജയപ്പെട്ടാൽ പശ്ചിമേഷ്യയിൽ വീണ്ടും സംഘർഷം പൊട്ടിപ്പുറപ്പെടുമോ എന്ന ആശങ്ക ശക്തമായിരിക്കുകയാണ്, അടുത്ത 72 മണിക്കൂർ നിർണ്ണായകമാണ്.

വാഷിം​ഗ്ടൺ: ഇറാനുമായുള്ള വെടിനിർത്തൽ ഉടമ്പടി അവസാനിക്കാൻ ദിവസങ്ങൾ മാത്രം ബാക്കിനിൽക്കെ, അമേരിക്കൻ ഭരണകൂടത്തിലെ ഉന്നത ഉദ്യോഗസ്ഥർ വൈറ്റ് ഹൗസിലേക്ക് ഒഴുകിയെത്തി. ശനിയാഴ്ച വൈറ്റ് ഹൗസിൽ നടന്ന ഈ തിരക്കിട്ട നീക്കങ്ങൾ മേഖലയിൽ വലിയ ആശങ്കയ്ക്ക് വഴിതുറന്നിട്ടുണ്ട്. ചർച്ചകൾക്കിടയിൽ ഇറാൻ ചില കൗശലങ്ങൾ പ്രയോഗിക്കാൻ ശ്രമിക്കുന്നുണ്ടെന്ന് പ്രസിഡന്റ് ഡോണൾഡ് ട്രംപ് പ്രസ്താവിച്ചതിന് പിന്നാലെയാണ് ഈ അടിയന്തര നീക്കങ്ങൾ.

വാരാന്ത്യത്തിലും വാഷിംഗ്ടണിൽ തുടരുന്ന ട്രംപ്, ദേശീയ സുരക്ഷാ ടീമിലെ പ്രമുഖരുമായി നിരന്തരം ചർച്ചകൾ നടത്തുകയാണ്. വൈസ് പ്രസിഡന്റ് ജെ ഡി വാൻസ്, പ്രതിരോധ സെക്രട്ടറി പീറ്റ് ഹെഗ്‌സെത്ത്, സിഐഎ ഡയറക്ടർ ജോൺ റാറ്റ്‌ക്ലിഫ്, ജനറൽ ഡാൻ കെയ്ൻ എന്നിവർ വൈറ്റ് ഹൗസിലെത്തുകയും ചർച്ചകളിൽ പങ്കെടുക്കുകയും ചെയ്തു. നിലവിൽ വിർജീനിയയിലെ തന്റെ ഗോൾഫ് കോഴ്സിലുള്ള ട്രംപ്, അവിടെയിരുന്നും സ്ഥിതിഗതികൾ നിരീക്ഷിച്ചു വരികയാണ്.

നയതന്ത്ര ചർച്ചകൾ ഒരുവശത്ത് നടക്കുമ്പോഴും, വെടിനിർത്തൽ കാലാവധി കഴിഞ്ഞാൽ എന്ത് സംഭവിക്കും എന്നതിനെക്കുറിച്ചുള്ള അന്തിമ തീരുമാനങ്ങൾ കൈക്കൊള്ളാനാണ് ഈ യോഗങ്ങൾ ചേരുന്നതെന്നാണ് സൂചന. ചീഫ് ഓഫ് സ്റ്റാഫ് സൂസി വൈൽസ്, എച്ച്.എച്ച്.എസ് സെക്രട്ടറി ആർ.എഫ്.കെ ജൂനിയർ എന്നിവരും വൈറ്റ് ഹൗസിലുണ്ട്. ഒരു ഔദ്യോഗിക യോഗം ചേർന്നോ എന്ന കാര്യത്തിൽ വൈറ്റ് ഹൗസ് ഇതുവരെ പ്രതികരിച്ചിട്ടില്ല. നയതന്ത്രം പരാജയപ്പെട്ടാൽ മേഖലയിൽ വീണ്ടും സംഘർഷം പൊട്ടിപ്പുറപ്പെടാനുള്ള സാധ്യത നിലനിൽക്കുന്നത് ലോകരാജ്യങ്ങളെ കടുത്ത ആശങ്കയിലാക്കുന്നുണ്ട്. അടുത്ത 72 മണിക്കൂറുകൾ പശ്ചിമേഷ്യൻ സമാധാനത്തിന് അതീവ നിർണ്ണായകമാണ്.