ചൈനീസ് ചാര വനിതയുമായുള്ള ബന്ധം, തെറ്റ് പറ്റിയെന്ന് തുറന്നുസമ്മതിച്ച് എൻവീഡിയ സിഇഒ; രഹസ്യങ്ങൾ ചോർന്നോ എന്നതിൽ അന്വേഷണം

ചൈനീസ് ചാരവനിതയുമായുള്ള ബന്ധത്തിൽ എൻവീഡിയ സിഇഒ ജെൻസൻ ഹുവാങിനെതിരെ കമ്പനി അന്വേഷണം പ്രഖ്യാപിച്ചു. ചിപ് നിർമാണ വിദ്യ ചോർത്താൻ ശ്രമം നടന്നെന്ന അമേരിക്കൻ രഹസ്യാന്വേഷണ ഏജൻസികളുടെ കണ്ടെത്തലിനെ തുടർന്നാണിത്. വിവരങ്ങൾ ചോർന്നിട്ടില്ലെന്നാണ് പ്രാഥമിക നിഗമനം.

വാഷിംഗ്ടൺ: ചൈനീസ് ചാര വനിതയുമായുള്ള ബന്ധത്തിൽ അമേരിക്കൻ ചിപ് നിർമ്മാണ കമ്പനി എൻവീഡിയയുടെ മേധാവിക്കെതിരെ അന്വേഷണം. രഹസ്യങ്ങൾ ചോർന്നോ എന്നതിലടക്കമാണ് അന്വേഷണം. ആലീസ് ഹുവാങ് എന്ന സ്ത്രീയുമായി വിവാഹേതര ബന്ധം ഉണ്ടായിരുന്നെന്ന് ബോർഡിന് മുന്നിൽ ജെൻസൻ ഹുവാങ് തുറന്ന് സമ്മതിച്ചിരുന്നു. എൻവീഡിയയുടെ ചിപ് നിർമാണ വിദ്യ ചോർത്താൻ ശ്രമിച്ചെന്ന് കണ്ടെത്തിയത് അമേരിക്കൻ രഹസ്യാന്വേഷണ ഏജൻസികളാണ്.

ചൈനീസ് ചാരവനിതയുമായി ബന്ധം പുലർത്തിയ എൻവീഡീയയുടെ സിഇഒയ്ക്ക് എതിരെ കമ്പനി ആഭ്യന്തര അന്വേഷണം പ്രഖ്യാപിച്ചിട്ടുണ്ട്. 33 വർഷമായി കമ്പനിയുടെ സിഇഒയാണ് ജെൻസൻ ഹുവാങ്. ഇദ്ദേഹത്തിൽ നിന്ന് ഏതെല്ലാം വിവരങ്ങൾ ചോർന്നു എന്ന വിവരങ്ങൾ അന്വേഷിക്കും. സെൻസിറ്റീവായ വിവരങ്ങൾ ചോർന്നിട്ടില്ല എന്നാണ് കമ്പനിയുടെ പ്രാഥമിക നിഗമനം. ആലീസ് ഹുവാങ് എന്ന ചൈനീസ് ചാര വനിതയുമായി ബന്ധമുണ്ടായിരുന്നു എന്ന് തുറന്ന് സമ്മതിച്ചുകൊണ്ടുള്ള ഹുവാങിന്‍റെ വാർത്താക്കുറിപ്പ് ഇതിനിടെ പുറത്ത് വന്നിരുന്നു.

തെറ്റ് പറ്റിയെന്നും ഭാര്യയോടും മക്കളോടും മാപ്പ് പറയുന്നു എന്നും വിശദീകരിച്ച ഹുവാങ് ഏത് അന്വേഷണത്തിനും തയാറാണെന്നും വാർത്താക്കുറിപ്പിൽ പറയുന്നുണ്ട്. ഹുവാങിൽ നിന്ന് നിർണായക വിവരങ്ങൾ ചോർത്തപ്പെട്ടിട്ടില്ല എന്നാണ് എൻവീഡിയയുടെ നിഗമനം. എഐ ടെക് ലോകത്തെ സുപ്രധാന ചിപ്പ്, പ്രോസസർ നിർമാതാക്കളാണ് എൻവീഡിയ. ഓപ്പൺ എഐയും മെറ്റയും അടക്കം ഉപയോഗിക്കുന്നത് എൻവീഡിയ പ്രോസസറുകളാണ്. ഈ ടെക്നോളജി ചോർത്താൻ ശ്രമിച്ചെന്നാണ് യുഎസ് രഹസ്യാന്വേഷണ ഏജൻസികൾ കണ്ടെത്തിയത്. സിംഗപ്പൂർ ആസ്ഥാനമായ ഒരു സ്റ്റാർട്ടപ്പിന്‍റെ മേധാവിയാണ് ആലിസ് ഹുവാങ്. ആലിസ് വഴി ചൈന എൻവീഡിയയുടെ ടെക് രഹസ്യം ചോർത്താൻ ശ്രമിച്ചെന്നാണ് സിഐഎയുടെ കണ്ടെത്തൽ.