റോൾസ് റോയ്‌സിൽ യാത്ര, സൗജന്യ താമസവും ഭക്ഷണവും, കുടുങ്ങിപ്പോയ സഞ്ചാരികൾക്ക് തണലായി അജ്മാനിലെ ധീരജ് ജെയിനും കുടുംബവും

യുഎഇയിലെ അജ്മാനിൽ വിമാനങ്ങൾ റദ്ദാക്കിയതിനെ തുടർന്ന് കുടുങ്ങിപ്പോയ വിനോദസഞ്ചാരികൾക്ക് ഇന്ത്യൻ വ്യവസായിയായ ഡോ. ധീരജ് ജെയിൻ തന്റെ കൂറ്റൻ ഫാംഹൗസ് തുറന്നുകൊടുത്തു. റോൾസ് റോയ്‌സ് കാറുകളിൽ സഞ്ചാരികളെ എത്തിക്കുകയും, പതിനായിരത്തോളം ഭക്ഷണപ്പൊതികൾ വിതരണം ചെയ്യുകയും ചെയ്തു. 

അജ്മാൻ: യുഎഇയിലെ അജ്മാനിലുള്ള ഹീലിയോ 2-ലെ ഒരു കൂറ്റൻ ഫാംഹൗസ് ഇപ്പോൾ വാർത്തകളിൽ നിറയുന്നത് അതിന്റെ ആഡംബരം കൊണ്ടല്ല, മറിച്ച് അവിടെ നൽകുന്ന സ്നേഹവും കരുതലും കൊണ്ടാണ്. ഗൾഫ് മേഖലയിലെ സംഘർഷങ്ങളെത്തുടർന്ന് വിമാനങ്ങൾ റദ്ദാക്കിയതോടെ നാട്ടിലേക്ക് മടങ്ങാൻ കഴിയാതെ കുടുങ്ങിപ്പോയ വിനോദസഞ്ചാരികൾക്കാണ് വൺഎക്സ്എൽ ഹോൾഡിംഗ്സ് ചെയർമാൻ ഡോ. ധീരജ് ജെയിൻ തന്റെ വീട് തുറന്നുകൊടുത്തത്.

ഹോട്ടലുകളിൽ നിന്നും മറ്റും കുടുങ്ങിയ സഞ്ചാരികളെ ഫാംഹൗസിലേക്ക് എത്തിക്കാൻ ആറ് റോൾസ് റോയ്‌സ് കാറുകൾ ഉൾപ്പെടെ 11 വാഹനങ്ങളാണ് ധീരജ് ജെയിൻ വിട്ടുനൽകിയിരിക്കുന്നത്. 11 കിടപ്പുമുറികളും 4 വലിയ ഹാളുകളുമുള്ള വീട് ഇപ്പോൾ ഒരു വലിയ കമ്മ്യൂണിറ്റി സെന്റർ പോലെയാണ്. 500 മെത്തകളും 700 പുതപ്പുകളും അതിഥികൾക്കായി ഒരുക്കി. ഇതുവരെ പതിനായിരത്തോളം ഭക്ഷണപ്പൊതികൾ ഇവിടെ വിതരണം ചെയ്തു. "അതിഥികൾക്ക് ഇതൊരു രണ്ടാം വീടായി തോന്നണം" എന്നാണ് ധീരജ് ജെയിൻ പറയുന്നത്. രാവിലെ യോഗയും വൈകുന്നേരങ്ങളിൽ സിനിമയും ക്രിക്കറ്റും ഒക്കെയായി സജീവമാണ് ഈ ഫാംഹൗസ്.

കഴിഞ്ഞ 11 വർഷമായി യുഎഇയിൽ താമസിക്കുന്ന രാജസ്ഥാൻ സ്വദേശിയായ ധീരജിന്റെ ഈ ദൗത്യത്തിൽ ഭാര്യ മമതയും മക്കളായ ജൈനവും ജീവികയും ഒപ്പമുണ്ട്. പുലർച്ചെ 6 മണിക്ക് തുടങ്ങുന്ന ഇവരുടെ സേവനം അർദ്ധരാത്രി വരെ നീളുന്നു. ശൗചാലയങ്ങളുടെ കുറവ് പരിഹരിക്കാൻ പോർട്ടബിൾ വാഷ്റൂമുകളും ഇവർ സജ്ജമാക്കിയിട്ടുണ്ട്. ഒരു ഘട്ടത്തിൽ 260-ഓളം പേർ ഇവിടെയുണ്ടായിരുന്നു. വിമാന സർവീസുകൾ ഭാഗികമായി പുനരാരംഭിച്ചതോടെ പലരും മടങ്ങിയെങ്കിലും, കുടുങ്ങിക്കിടക്കുന്ന അവസാനത്തെ യാത്രക്കാരനും മടങ്ങുന്നതുവരെ ഈ സേവനം തുടരുമെന്ന് ജെയിൻ കുടുംബം ഉറപ്പുനൽകുന്നു.