യുഎസിൽ വീണ്ടും വെടിവയ്പ്; പ്രൈമറി സ്കൂളിൽ 3 കുട്ടികളും ഒരു അധ്യാപകനും ദാരുണാന്ത്യം, 16 കാരനായ അക്രമിയെ വെടിവെച്ച് കൊന്ന് പ്രദേശവാസി

ബെൻഡ് നഗരത്തിലുള്ള സിൽവർ റെയിൽ എലിമെന്ററി സ്കൂളിൽ പ്രാദേശിക സമയം ഉച്ചയ്ക്ക് ഒരു മണിയോടെയാണ് വെടിവെപ്പുണ്ടായത്. 5, 8, 11 വയസ്സ് പ്രായമുള്ള കുട്ടികളാണ് കൊല്ലപ്പെട്ടത്. പൊലീസെത്തുമ്പോഴേക്കും അക്രമി കൊല്ലപ്പെട്ടിരുന്നു.

വാഷിങ്ടൺ: ഒറിഗണിലെ ബെൻഡിലുള്ള എലിമെന്ററി സ്കൂളിലുണ്ടായ വെടിവയ്പിൽ മൂന്ന് കുട്ടികളും ഒരു അധ്യാപികയും കൊല്ലപ്പെട്ടു. 5, 8, 11 വയസ്സ് പ്രായമുള്ള കുട്ടികളാണ് കൊല്ലപ്പെട്ടത്. 16 വയസ്സുള്ള അക്രമിയെ സ്കൂളിനുള്ളിൽ മരിച്ച നിലയിൽ കണ്ടെത്തി. പ്രദേശവാസിയായ ഒരാൾ അക്രമിയെ വെടിവയ്ക്കുകയായിരുന്നു. ആക്രമണത്തിൽ ഏഴ് വയസ്സുള്ള ഒരു കുട്ടിക്കും മറ്റൊരു അധ്യാപകനും പരിക്കേറ്റിട്ടുണ്ട്. മരണസംഖ്യ ഉയരാൻ സാധ്യതയുണ്ടെന്ന് പൊലീസ് അറിയിച്ചു. ബെൻഡ് നഗരത്തിലുള്ള സിൽവർ റെയിൽ എലിമെന്ററി സ്കൂളിൽ പ്രാദേശിക സമയം ഉച്ചയ്ക്ക് ഒരു മണിയോടെയാണ് വെടിവെപ്പുണ്ടായത്.

പൊലീസെത്തുമ്പോഴേക്കും അക്രമി കൊല്ലപ്പെട്ടിരുന്നു. സംഭവത്തിൽ എഫ്.ബി.ഐ പ്രദേശിക പൊലീസുമായി ചേർന്ന് സംഭവത്തെക്കുറിച്ച് അന്വേഷണം ആരംഭിച്ചു. സ്കൂളിന് സമീപമുള്ള കാറിന് നേരെ അപരിചിതനായ ഒരാൾ വെടിവെച്ചതായിട്ടാണ് പൊലീസിന് ആദ്യ സന്ദേശം ലഭിക്കുന്നത്. തൊട്ടുപിന്നാലെ അക്രമി സ്കൂളിൽ പ്രവേശിച്ച് വെടിയുതിർക്കുകയായിരുന്നു. സന്ദേശം ലഭിച്ച് നിമിഷങ്ങൾക്കകം പൊലീസ് സംഘം സ്ഥലത്തെത്തിയെങ്കിലും അക്രമി കൊല്ലപ്പെട്ടിരുന്നു.

അക്രമിയായ 16 വയസുകാരനെ പിന്തുടർന്ന് സ്കൂളിൽ കയറിയ പ്രദേശവാസിയുടെ വെടിയേറ്റാണ് അക്രമി കൊല്ലപ്പെട്ടതെന്ന് ബെൻഡ് പൊലീസ് ചീഫ് മൈക്ക് ക്രാന്റ്സ് അറിയിച്ചു. കിന്റർഗാർട്ടൻ മുതൽ അഞ്ചാം ക്ലാസ് വരെയുള്ള കുട്ടികൾ പഠിക്കുന്ന ഈ സ്കൂളിൽ കഴിഞ്ഞ വർഷത്തെ കണക്കനുസരിച്ച് 459 വിദ്യാർഥികളാണുള്ളത്. അതേസമയം ആക്രണത്തിന് പിന്നിലെ കാരണം എന്താണെന്ന് വ്യക്തമായിട്ടില്ലെന്നും അന്വേഷണം പുരോഗമിക്കുകയാണെന്നും പൊലീസ് അറിയിച്ചു.