ഓണം ബമ്പർ: 30 കോടിയിൽ കയ്യിൽ കിട്ടുന്നത് എത്ര ? വിറ്റഴിഞ്ഞത് 500 രൂപയുടെ 90 ലക്ഷം ടിക്കറ്റുകൾ

കേരള ലോട്ടറി ചരിത്രത്തിലെ ഏറ്റവും വലിയ സമ്മാനത്തുകയായ 30 കോടി രൂപ ഒന്നാം സമ്മാനം നൽകുന്ന തിരുവോണം ബമ്പർ നറുക്കെടുപ്പ് ഇന്ന് തിരുവനന്തപുരത്ത് നടക്കും. അച്ചടിച്ച 90 ലക്ഷം ടിക്കറ്റുകളും പൂർണ്ണമായും വിറ്റഴിഞ്ഞു.

തിരുവനന്തപുരം: ഒരു വർഷം നീണ്ട ഭാ​ഗ്യാന്വേഷികളുടെ കാത്തിരിപ്പിന് ഒടുവിൽ തിരുവോണം ബമ്പർ BR 111 നറുക്കെടുപ്പ് ഇന്ന് നടക്കും. ഉച്ചയ്ക്ക് 2 മണിക്ക് തിരുവനന്തപുരം ​ഗോർഖി ഭവനിൽ വച്ചാണ് നറുക്കെടുപ്പ് നടക്കുന്നത്. 30 കോടി രൂപയാണ് ഒന്നാം സമ്മാനാർഹന് ലഭിക്കുക. കേരള ലോട്ടറി ചരിത്രത്തിലെ ഏറ്റവും വലിയ സമ്മാനത്തുക നൽകുന്ന തിരുവോണം ബമ്പറിന്റെ ഒന്നാം സമ്മാനം ഇത്തവണ സർക്കാർ വർദ്ധിപ്പിച്ചിരുന്നു. കഴിഞ്ഞ വർഷം ഇത് 25 കോടി രൂപ ആയിരുന്നു. ബമ്പർ നറുക്കെടുപ്പിന് ഏതാനും മണിക്കൂറുകൾ മാത്രം ബാക്കി നിൽക്കെ 30 കോടിയിൽ എത്ര രൂപ ഭാ​ഗ്യശാലിയ്ക്ക് ലഭിക്കുമെന്ന് നോക്കാം.

30 കോടി രൂപ സമ്മാനം അടിച്ചാൽ 10 ശതമാനം ഏജൻസി കമ്മീഷനായി പിടിക്കും. ഏകദേശം മൂന്നു കോടി രൂപ. ബാക്കിയുള്ള 27 കോടി രൂപയിൽ നിന്നും നികുതി ഈടാക്കും. 30 ശതമാനം ടിഡിഎസ് ഈടാക്കും(ടിഡിഎസ് 8.10 കോടി). ഈ നികുതിക്ക് മുകളിൽ 25 ശതമാനം(2,02,50,000 രൂപ) സർചാർജ് വരും. ഒപ്പം ഹെല്‍ത്ത് ആന്‍ഡ് എജ്യുക്കേഷന്‍ സെസ് കൊടുക്കണം. ഇതെല്ലാം കഴിഞ്ഞ് 30 കോടി രൂപയിൽ നിന്നും ഏകദേശം 16.47 കോടി രൂപ ഭാ​ഗ്യശാലിയ്ക്ക് ലഭിക്കും.

ഇത്തവണ 90 ലക്ഷം ടിക്കറ്റുകളാണ് തിരുവോണം ബമ്പറിന്റേതായി അച്ചടിച്ചത്. ഇതിൽ എല്ലാ ടിക്കറ്റുകളും വിറ്റഴിഞ്ഞതായി ലോട്ടറി വകുപ്പ് അറിയിച്ചിട്ടുണ്ട്. ഏറ്റവും കൂടുതൽ വില്പന നടന്നത് പാലക്കാട് ജില്ലയിലാണ് (20,95,300 ടിക്കറ്റുകൾ). തൃശൂർ ജില്ല വില്പനയിൽ രണ്ടാം സ്ഥാനത്തും (10,62,000 ), തിരുവനന്തപുരം ജില്ല(8,64,100 ) മൂന്നാം സ്ഥാനത്തുമാണ്. കാസർഗോഡ് ജില്ലയിലാണ് ഏറ്റവും കുറവ് വില്പന (2,71,400 ) നടന്നത്.

ഓണം ബമ്പർ സമ്മാനഘടന ഇങ്ങനെ

• ഒന്നാം സമ്മാനം: 30 കോടി രൂപ
• രണ്ടാം സമ്മാനം: 1 കോടി രൂപ വീതം 20 പേർക്ക്
• മൂന്നാം സമ്മാനം: 25 ലക്ഷം രൂപ വീതം 20 പേർക്ക്
• നാലാം സമ്മാനം: 5 ലക്ഷം രൂപ വീതം 10 പേർക്ക്
• അഞ്ചാം സമ്മാനം: 2 ലക്ഷം രൂപ വീതം 10 പേർക്ക്
• ആറാം സമ്മാനം: 5,000 രൂപ വീതം 54,000 പേർക്ക്
• ഏഴാം സമ്മാനം: 2,000 രൂപ വീതം 81,000 പേർക്ക്
• എട്ടാം സമ്മാനം: 1,000 രൂപ വീതം 1,24,200 പേർക്ക്
• ഒൻപതാം സമ്മാനം: 500 രൂപ വീതം 2,75,400 പേർക്ക്
• സമാശ്വാസ സമ്മാനം: 5 ലക്ഷം രൂപ വീതം 9 പേർക്ക്
• 125 .54 കോടി രൂപയാണ് ആകെ സമ്മാന തുക.