കേരളത്തില്‍ വീണ്ടും മഴ... ഈ വര്‍ഷത്തെ ആദ്യത്തെ തീവ്രന്യൂന മർദ്ദം നാളെ കരയിലേക്ക് പ്രവേശിക്കും, മഴ സാധ്യത ഇങ്ങനെ, മുന്നറിയിപ്പ് പ്രഖ്യാപിച്ചു

ബംഗാൾ ഉൾക്കടലിൽ രൂപപ്പെട്ട തീവ്രന്യൂന മർദ്ദം നാളെ ശ്രീലങ്കൻ തീരത്ത് പ്രവേശിക്കും. ഇതിന്റെ ഫലമായി കേരളത്തിൽ ജനുവരി 9 മുതൽ 11 വരെ മഴയ്ക്ക് സാധ്യതയുണ്ട്. ജനുവരി 10ന് പത്തനംതിട്ട, ഇടുക്കി ജില്ലകളിൽ യെല്ലോ അലർട്ട് പ്രഖ്യാപിച്ചു.

കൊളംബോ: രാജ്യത്ത് കനത്ത നാശനഷ്ടങ്ങളുണ്ടാക്കിയ ഡിറ്റ് വാ ചുഴലിക്കാറ്റിന് ശേഷം ശ്രീലങ്കയിൽ വീണ്ടും തീവ്ര ന്യൂന മർദ്ദ മുന്നറിയിപ്പ്. ശ്രീലങ്കയുടെ തെക്കുകിഴക്കൻ ഭാഗത്ത് ബംഗാൾ ഉൾക്കടലിൽ സ്ഥിതിചെയ്യുന്ന അതി ന്യൂനമർദ്ദം നാളെ ( 2026 ജനുവരി 9) വൈകിട്ട് 5.30 മുതൽ രാത്രി 11.30 വരെ ഹംബൻടോട്ടയും കൽമുനാക്കുമിടയിൽ പ്രവേശിക്കാൻ സാധ്യതയെന്ന് കാലാവസ്ഥാ വിദ​ഗ്ധർ പറയുന്നു. ദ്വീപിന്റെ ഭൂരിഭാഗം പ്രദേശങ്ങളിലും മേഘാവൃതമാകും. കിഴക്കൻ പ്രവിശ്യയിലെ ചില ഭാഗങ്ങളിലും മുല്ലൈത്തീവ് വവുനിയ, കിളിനോച്ചി, പോളൊന്നറുവ ജില്ലകളിലും 150 മില്ലീമീറ്ററിന് മുകളിൽ ശക്തമായ മഴ ലഭിക്കാൻ സാധ്യതയുണ്ട്.

ഈ സാഹചര്യത്തിൽ കേരളത്തിൽ 3 ദിവസം (ജനുവരി 9 , 10, 11) മഴ സാധ്യത ശക്തമായിരിക്കും. ജനുവരി 10 ന് ഒറ്റപ്പെട്ട ശക്തമായ മഴക്കും കേരളത്തിൽ സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇത് പ്രകാരം അന്ന് പത്തനംതിട്ട, ഇടുക്കി ജില്ലകളിൽ യെല്ലോ അലർട്ട് പ്രഖ്യാപിച്ചു. അതേസമയം കേരള - കർണാടക - ലക്ഷദ്വീപ് തീരങ്ങളിൽ ഇന്ന് (07/01/2026) മത്സ്യബന്ധനത്തിന് തടസമില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.