എല്ലാ തെരഞ്ഞെടുപ്പിലും ബൂത്തിലെത്തി വോട്ട് ചെയ്തു, ഇത്തവണ വീട്ടിൽ, പിന്നാലെ തങ്കമ്മ യാത്രയായി

എല്ലാ തെരഞ്ഞെടുപ്പ് കാലത്തും ബൂത്തിലെത്തി വോട്ട് ചെയ്തു, ഇപ്രാവശ്യം അവസാന വോട്ട് വീട്ടിൽ വെച്ച് രേഖപ്പെടുത്തി തങ്കമ്മ യാത്രയായി

കൊച്ചി: ജീവിതത്തിലെ അവസാന വോട്ടും രേഖപ്പെടുത്തി ഒരു ദിവസം പിന്നിടും മുൻപേ തങ്കമ്മ (93) വിട പറഞ്ഞു. പറവൂർ വടക്കേക്കര മുറവന്തുരുത്ത് കളത്തിൽ സ്വദേശിനിയായ തങ്കമ്മ, പ്രായാധിക്യവും ആരോഗ്യ പ്രശ്നങ്ങളും മൂലം കിടപ്പിലായിരുന്നു. തെരഞ്ഞെടുപ്പ് കമ്മീഷൻ ഒരുക്കിയ വീട്ടിലെ വോട്ടെടുപ്പ് സൗകര്യം ഉപയോഗിച്ചാണ് വ്യാഴാഴ്ച തങ്കമ്മ വോട്ടവകാശം വിനിയോഗിച്ചത്. മൂന്ന് മാസത്തിലേറെയായി കിടപ്പിലായിരുന്ന തങ്കമ്മ വെള്ളിയാഴ്ച ഉച്ചയോടെയാണ് അന്തരിച്ചത്.

ആരോഗ്യ സംബന്ധമായ ബുദ്ധിമുട്ടുകൾ ഉണ്ടായിരുന്നെങ്കിലും ഓരോ തിരഞ്ഞെടുപ്പിലും പോളിങ് ബൂത്തിലെത്തി വോട്ട് രേഖപ്പെടുത്തുന്നതിൽ യാതൊരു വിട്ടുവീഴ്ചയും ചെയ്തിരുന്നില്ലെന്ന് ബന്ധുക്കൾ പറയുന്നു. അതിനാൽ അവസാനമായി വീട്ടിൽ നിന്ന് തന്നെ വോട്ട് രേഖപ്പെടുത്താൻ കഴിഞ്ഞത് വലിയ കാര്യമാണെന്ന് കുടുംബാംഗങ്ങൾ കൂട്ടിച്ചേർത്തു.