പികെ ബിജുവിനെയും കെ രാധാകൃഷ്ണനെയും പരിശോധിച്ചെന്ന് വിജയരാഘവൻ; 'ഷാഫിയും രാഹുലും കോൺഗ്രസിലെ ന്യൂജൻ'

ഷാഫി പറമ്പിലും രാഹുൽ മാങ്കൂട്ടത്തിലും കോൺഗ്രസിലെ ന്യൂജൻ ആണെന്നും ഭീഷണിയെ രാഷ്ട്രീയമായി കാണേണ്ടെന്നും സിപിഎം

മലപ്പുറം: വാഹന പരിശോധന എല്ലാ തെരഞ്ഞെടുപ്പിലും നടക്കുന്നതാണെന്ന് സിപിഎം പിബി അംഗം എ വിജയരാഘവൻ. പരിശോധന അപമാനിക്കലോ അവഹേളിക്കലോ ആയി കരുതേണ്ടതില്ല. നമ്മളെ ഒക്കെ പരിശോധിക്കും. അത് അവഹേളനമായി തോന്നിയിട്ടില്ല. പികെ ബിജുവിൻ്റെയും കെ രാധാകൃഷ്ണൻ്റെയും അബ്ദുൾ വഹാബിൻ്റെയും വാഹനം പരിശോധിച്ചിട്ടുണ്ട്. രാഹുലും ഷാഫിയും ന്യൂജൻ കോൺഗ്രസാണെന്നും അവരുടെ ഉദ്യോഗസ്ഥർക്കെതിരായ ഭീഷണിയെ രാഷ്ട്രീയമായി കാണേണ്ടതില്ലെന്നും എ വിജയരാഘവൻ പറഞ്ഞു.

കോൺഗ്രസ് നേതാക്കളുടെ പ്രതികരണം പ്രായത്തിൻ്റെ പക്വതയില്ലായ്മയായി കണ്ടാൽ മതി. ആരും ആരെയും ഭീഷണിപ്പെടുത്തരുത്. പരിശോധനകൾ സാധാരണ നിലയിൽ നടക്കുന്നതാണ്. നാട്ടുനടപ്പ് പോലെ സ്ഥിരമായി തിരഞ്ഞെടുപ്പിൽ കാണുന്ന കാര്യമാണ് പരിശോധന. പരിശോധന അപമാനിക്കലോ അവഹേളിക്കലോ ആയി കരുതേണ്ടതില്ല. പ്രതികരിക്കേണ്ട എന്ന് ആദ്യം തീരുമാനിച്ചതാണ്. വീണ്ടും വീണ്ടും വിഷയം ചർച്ച ആയതു കൊണ്ടാണ് സംസാരിച്ചത്.

പി കെ ബിജുവിൻ്റെ വാഹനം നാലുവട്ടം പരിശോധിച്ചു. കെ രാധാകൃഷ്ണന്റെ വാഹനവും പരിശോധിച്ചു. ഇന്നോവയിൽ പോകുന്നവരെയാണ് കൂടുതലായി പരിശോധിക്കുന്നത്. രാഹുലിനെയും ഷാഫിയെയും വിമർശിക്കേണ്ട കാര്യമില്ല. ചെറുപ്പക്കാരായ കോൺഗ്രസ് ജനപ്രതിനിധികൾ ഊർജ്ജസ്വലത കൂടി കാണിച്ചതാണ്. അതിൽ അസ്വാഭാവികതയില്ല. അവർ എങ്ങനെ പെരുമാറണമെന്ന് തീരുമാനിക്കേണ്ടത് അവർ തന്നെയാണ്. പാലക്കാട് നിന്നും നിലമ്പൂരിലേക്ക് ഒരുപാട് ദൂരം ഉണ്ടെന്നും വിജയരാഘവൻ ചൂണ്ടിക്കാട്ടി.